السلام عليكم ورحمة الله
اليوم أكتب لكم قصة صارت معي صحيح إني ما أكتب كثير بس حبيت أشارككم بعد غيبة طويلة شوي
وذلك بسبب السفر .
وبكتب لكم قصت سفري بإختصار
مسكت الجوال وأتصلت على الشباب وقابلتهم وقلت لهم إني بأسافر لدولة الإمارات الشقيقة لأن عندي كم شغلة بأخلصها هناك
من وده يخاويني ؟
قالوا الشباب قدام يالسنايدي وكان عددنا 4 أشخاص ولكن حدثت خيانة في السفرة للأسف
راحوا وخلوني ( من جد خيانات ذا الأصدقاء ) المهم راحوا للكويت مع إنه ودي أروح معهم بس للأسف
كنت مشغول جداً في الرياض لذلك أعتذرت عن سفرة الكويت والتركيز على الإمارات ( لأنها الأهم لدي )
بالفعل مر يومان والشباب مالهم حس ولا خبر فأتصلت عليهم لأجدهم متوجهين ( في الطريق ) للمنطقة الشرقية وتحديداً الخبر
وبعد يوم سيتوجهون لدولة قطر لذا أصريت وعصبت عليهم ( أمحق لغة عربي فصحى ) المهم قلت أنتظروني أنا جاي لكم
وبالفعل خرجت من مدينة الرياض متوجهاً للخبر قبل المغرب بشوي وقد كنت مسرعاً ( طاير ) وصلت هناك في ساعة و أربعين دقيقة
هذي عيوب كاشف الرادار
وصلت وحصلت الشباب مبسوطين ويقولون يالله نروح لقطر ؟
قلت لهم أصبروا شوي خلونا نرتاح ترى كثرة السواقة تجيب البواسير
وأنا أنظر (لـ إبراهيم ) الذي أصبح وجهة أحمر ويسألني بتوتر ( صدق تجيني البواسير وإلا تستهبل ) ؟
وأنا أنظر له بجدية مربوط الحواجب منتفخ الخدود عاض على البراطم
أية ياخوي ما تصدق ؟!!؟
جرب وأنت تشوف أتحداك نوصل للإمارات وأنت تجلس طبيعي
أخذ الشباب يضحكون إلا إبراهيم أصبح يفكر في موضوع الجلوس الطبيعي وفجأة وبدون سابق إنذار
وقف في صفي وطلب المكوث في الخبر يوم واحد
طبعاً لازم نروح لأي مقهى وكنت أحب كثيراً الذهاب لمقهى البحيرة الذي في الكورنيش
عاد قلت لهم تعالوا معي أنا أوديكم لمقهى البحيرة ونريح سيارة إبراهيم شوي .
وصلنا للمقهى ونزلنا وأنا مسوي فيها أدل وذيب
الأشخاص الذين زاروا المقهى يعلمون جيداً بأن هناك قسم خاص للعوائل وأنا متعود على مقاهي الرياض
أول باب تشوفة إدخل معة لين يردك الهندي حق الطلبات
المهم أنا أمشي قدامهم وهم يسولفون دخلت قسم العوائل بالغلط وماشي بثقة والسوداني طايرة بوهتة
وش ذا الصامل ويوم شاف الشباب قال
آآآآآآآآآآي يا زول فين رايح ؟؟
قلت له : سامع إن عندكم شاهي مغربي يدوخ :اوبس:
قال لي: أنت تعرف أحد من الإدارة أو صاحب المقهى أو أهلك داخل ؟؟
قلت له: لا ما أعرف أحد وأمي تاركها في الرياض حتى إنها قالت لي راح الله ياخذ عمرك ( بالله قد شفتوا أم كذا ؟ )
ملاحظة :قبل ما أطلع من البيت صفقت أخواني كلهم عشان ما أشتاق لهم ولا يشتاقون لي
<====== أمحق أخو :سعد:
نرجع لموضوعنا طردنا السوداني ويقول روح مع الباب التاني
جلسنا وبعدها رحنا لشقة ونمنا وعشان أختصر القصة شوي بأطمر بعض التفاصيل مثل شخير أبو محمد إلي ما خلاني أنام
اليوم الثاني رحنا قطر جلسنا يومين
وبعدها دخلنا الإمارات وبعطيكم سالفة وحدة بس
في الإمارات عادي تشوف كامري وإلا كابرس بقس فيه الأم تسوق بـ عيالها
لكن لاند كروزر وبنت وتقاوم ( هذي جديدة )
عاد أنا يوم شفت السيارة خقيت وقلت لإبراهيم خلها تقوم علينا لا أبوها حاله
وخلصنا أشغالنا بصراحة الإمارات يبغالها شهر على الأقل عشان تزور كل إمارة
رجعنا لشرقية وقلت لشباب أنا بأرجع ألحين لرياض من يخاوي ؟
قال عبدالمجيد أنا والباقين قالوا بنقعد كم يوم ونرجع
رجعنا وعبدالمجيد أنواع السعابيل على المرتبة وأنا دايخ
فوقفت عند مقهى في محطة العسكر على الخط وأخذت لي قهوة تركي وجلست أتفرج على قناة الخليجية
وشفت لي أغنية عجيبة بصراحة واحد مدري وش يبي من الدنيا يقول أنا ألبس شماغ وهي تلبس عبات
أنا شكيت في الهندي إلي سوالي القهوة وجلست أوسوس
المهم نقزت لسيارتي وعبدالمجيد مستغرق في النوم
أول ما دخلنا لرياض صحى وقال هاه وصلنا ؟
قلت أية
قال ياخي تصدق إني ما نمت !!
بغيت أمغطة في سيارتي وقلت له حسبي الله عليك أنواع السعابيل وأخرتها ما نمت زين ؟؟
صحصح شوي وفعلاً دخلنا لرياض ورحت أحطة في بيتهم الذي يقع في المعذر الشمالي
وقفت عند الإشارة وشفت صورة واحد مشخّص
قلت له شف ياخي ذا الإعلان مشاء الله على البروجية عند كل إشارة حاطين صورة واحد ويورونا إن الشماغ كويس
قال هذي شكلها دعاية المراسم مب بروجية
قلت له لا يا حبيبي المراسيم يحطون سامي وإلا واحد معروف
قال لي من عشى ؟
قلت له قدام يالله
دخلنا شارع التخصصي ( طريق بيتهم ) وشفنا خيمة وأنوار عليها وقلت له وش القصة من هذا المهبول إلي حاط عرسة هنا ؟
قال لي شكله طفران ثم قال خيمة على التخصصي أقرب وتغيير
وشوي نشوف صورة واحد ثاني
قلت يؤ كل هذولي بيعرسون في خيام ؟؟؟
طبعاً الكلام هذا في الساعة 4.50 الفجر يعني مرتفعين خلقة
وبعد أيام إكتشفنا أنهم مرشحين أنفسهم
بس كلة كوم وإلي مصور مع عيالة كوم
عمركم شفتوا أحد يرشح نفسة ويطلع معة عيالة يستهبلون ؟؟!! :مدري: ( الله يخلف عليهم )
خلصت قصتي التي لم تكتمل سطورها وتتضح نهايتها
حقوق القصة محفوظة لمنتديات غرابيل
تحياتي للجميع
الغريب
رد مع اقتباس
(
المشاركة الأصلية كتبت بواسطة الغريب
