جديدي لغرابيل
[poem=font="Simplified Arabic,4,darkblue,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
يا الله أنا في حياتي بطلبك غاية=غاية فؤادٍ بدرب الغي له باعي
تايه ونفسه لدرب الخير نهّاية=والعشب قفر وتحته كل لكاعي
دربه خضر والليالي السود نوّاية=والريع مسدود والفرجة بها اسباعي
واللهو وطول الأمل العمر طوّاية=والدين شحت مواريده بالاضلاعي
والشعر غاوي مادام الحب له راية=يا كون شعر الحكم لا جاك من واعي
والناس كذب ونفاق وسب وشاية=والرفقة اللي على عزٍ بالاصباعي
والمال له نسبة السبعين بالماية=خلّى الآوادم ما بين شباع وجياعي
هذي بكفة وابليس لحاله كفاية=دامه مركّد نياشينه على انصاعي
واليوم أنا بسألك حقق لي منايه=يا واحدٍ قادرٍ معطي ومناعي
يا من ذكرت بكتابك نص ذا الآية=( إني قريبٌ أجيب دعوة الداعي )
أسألك تحسن نهاية عبدك التايه=عبدٍ تحوفه مكايد كل قطاعي
ويبدي بداية نعيمٍ ما له نهايه=وينهي أشكال الشقا وهموم الأنواعي
لا نيب متشائم ولا نيب فدعاية=لكنه الخوف من قبرٍ به أوجاعي[/poem]