وقّف على جنب الرّصيف اللي شكى كثرالضّباب
فيه اللي يمشي ويعدي واللي وقف خلف العصاه
واللي على همّه سرى ماهمّ الّا الاحتطاب
لفّه ظلامٍ ماعرف شلّلي جمع شلّلي جناه
والمرتوي يلهث ظما موته على جال السّراب
وشلون حالة هالطّمع ما يقتنع والله عطاه
أوفلسفة تاجر غني قوت الفقارى له نصا ب
يسلب جياعٍ عدّلقمتها زياده في غناه
كم واحدٍ يحمل مفاتيح الأمانه مايثاب
لنّه تراخى في أداها واجبه قصّرمعاه
ورصد معي من هوحمل شوك وشكوكٍ ل/الصّحاب
ونظرمعي من هو طعن آخرخويٍّ في قفاه
ياكثرهم اللي بكو ميّت وواروه التراب
ياقلهم اللي يطرّونه بخيرٍ في ثراه
كم واحدٍ محسوب في عالم عزيزين الجناب
لصطّفت رجال المواقف ثارت غبرته وراه
والمال حسبة هالزّمن راعيه ما قاله صواب
والشّكل يعجب من جهل لوكان خبلٍ في عباه
ملّت شوارعنا خطاوي من مشى مشي الغراب
ماتت مبادي وانحنى ظهر المهابه واسفاه
زحمة مدينه والوله بارد على طراف السّحاب
واللي تمنّى شوفته صعبٍ تدلّه أو تراه
أوّاه ياذكرى الطّفوله والصّبا فوق الهضاب
أوّاه ياضوٍّ تجمّع حولها طهروبراه
برحل أدوّرعالمٍ مايجمعه صحن الكباب
يمكن ألاقي من يجوع الحب يشركني معاه