السلام عليكم ورحمة الله وبركاته
أول شئ ياليت تعذروني اني ما أتكلم باللغه العربية الفصحى لأن الموضوع شاغل تفكيري بقوووه
ويهمني كثير اني اشوف آرائكم فيه
لأن لكل انسان وجه نظر ويمكن يكون على صواب ويمكن يكون على خطأ
انا بصراحه اليوم شد انتباهي موضوع ويعلم الله انه طوال اليوم و الموضوع هذا يضع على وجهي علامات استفاهم كثيرة
طبعا كلامي هذا عن النساء ماله اي علاقه بالعلمانية أو تحرير المرأة
لان الموضوع هذا بالعاده وحسب تطلعي لكم كتاب حاولت أقرأه أو مقال بخصوص النقطة هذي أجد الموضوع يدرج تحت اسم تحرير المرأة أو العلمانية
طبعا كلنا عيال حمولة وكل واحد منا من قبيلة لها تاريخها وفوق هذا والاهم تجمعنا كلمه لا إله الى الله محمد رسول الله
في أحد المرات اتصلت بواحد من الشباب العصر وقلت له بمرك بالبيت وبنروح عندنا شغلة
قال اسمحلي عندنا زواج الليلة و أنا مشغول مع أهلي
اللي طرى على بالي إنهم معزومين على عرس لناس من قرايبهم وماحبيت اخذ واعطي بالكلام
جت الساعه 9 بالليل إلا وهو يتصل علي
ألوه فالح وينك تعال مرني
طبعا جيته وين العرس يابو الشباب ولا هو عرس جيرانكم
قالي عرس اختي !!!!
طيب وينك عن القصر ليه مارحت قال من جدك تبيني احظر عرس اختي وش تبي الناس تقول عني ؟؟؟؟
وقف عند هذا التعليق وأنا وقفت خصوص لأن الموضوع في مجتمعنا وخاصة إنه في مثل هذه الأمور هذي
حساس لأبعد درجة
سؤال صغير ؟؟؟؟ ليه الواحد يستعيب من أهله ؟؟؟؟؟؟؟
هل يوجد فيهم شيء ياخي اذا بغيتها بالمراجل وطقت براسك وقتها
ترى البدو قبلي وقبلك يتعزون بخواتهم
والكل منا يذكر عبد العزيز يوم يتعزوا بأخته في توحيد المملكه ويقول اخو نورة
ومن جهه ثانية....................
الرجال يقلطون على العشاء والحريم لهم بقايا الاكل ..............؟
خلونا من هذي بعد ....
واحد من الشباب جايني ويحلف لي يقول والله ان ابوي مايسولف مع امي ولا حتى يكلمها ولا يخليها تجلس عندنا بالمجلس انا واخواني؟؟؟؟؟؟؟؟؟؟؟؟؟؟؟؟؟
ليه طيب تستعيب منها ...............؟؟؟
وشخص انا سمعته بأذني يكلم حرمته بالجوال .....؟؟؟؟
مابقى سبه بالدنيا الى وسمعها اياها لدرجه اني ماقدرت اتحمل و أنا مالي علاقه بالموضوع
وقلت له والله لو أخوانها يدرون عن كلامك اللي تقوله مازوجوك إياها ...وإلى اللحين هالأنسان زعلان مني بسبب
كلامي
ياجماعه الخير
الرسول صلى الله عليه وسلم حث على حسن المعاملة بالذات الزوجات
إذا قدوتنا ناس شجعان على قولة البعض الفارس فلان وفلان
تذكر إنه صحيح قدوه برجولته بي بيته لا
واذا فكرت تقتدي فقدوتنا محمد صلى الله عليه وسلم
الى متى هذه الظاهرة تلهث خلفنا وتجري في عروقنا مجرى الدم؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟