السلام عليكم ورحمة الله وبركاته ،،،،،،،،،،،،،،،،،،،،
هذه مرثيتي بوالدي رحمه الله واسكنه فسيح جناته ،،،،،،،،،،،،،،،
[poem=font="Simplified Arabic,5,black,normal,normal" bkcolor="transparent" bkimage="backgrounds/7.gif" border="solid,5,blue" type=0 line=0 align=center use=ex num="0,black""]
برق سرى ليله رعوده تقفاه = جعله على الباطن يحول خياله
يسقي ثرى عود على الطيب ممشاه = بالطيب قبل الموت وصى عياله
جاه القدر يوم الربوع ودفناه = ياالله تغفر له وتلطف بحاله
ياالله تجاوز عنه واغفر خطاياه = وعند السؤال تثبته في مقاله
في جنة الفردوس ياالله تجزاه = انت الوحيد اللي نلوذ بجلاله
ماذقت طعم النوم من عقب فرقاه = ودموع عيني ما تفارق خياله
والكون ضايق بي من اقصاه لادناه =والهم يطويني سوات المحاله
تركي يابوك اليوم جدك فقدناه = رحل عمود البيت واقفت رحاله
يابوك باقي بس ذكره وطرياه = وصيته جنوب الدار والا شماله
وباقي معاميله ونجره ومركاه = ووجار ناره فيه صفة دلاله
هداج تيماء يروي الناس في ماه = وابوي مزبان الضيوف اتعناله
الضيف يلقى له معزه اليا جاه = في ماجب الضيفان يرخص حلاله
الارجح اللي تفعل الطيب يمناه = من طيب راسه ما يحسب رياله
يوم البخيل يلقي الضيف علباه = ويشح في ماله على كثر ماله
بابه مشرع للمناعير تنصاه = ما صك باب البيت واحكم اقفاله
ماشي على نهجه وسلمه ومبداه = نعم بابو ثامر ليا جاء مجاله
ببوي انا اعزي هل الصيت والجاه = لانه من اهل الصيت واهل الشكاله
وابوي لو الموت يفدى فديناه = لاقول انا يالموت خذني بداله
والدمع لو انه يرده بكيناه = ابكي طوال اليوم حتى زواله
لكن ماصابه مقدر رضيناه = واليوم ماباقي يكود الدعاء له
[/poem]
رد مع اقتباس
