[align=center]السلام عليكم ورحمه الله وبركاته
تعودتو مني اني كل مواضعي فيها صور المره هذي ابشركم مافيه صوره فيه سوالف انشالله تعجب لو نصكم مهوب لازم كلكم ...
الموضوع ذكرني فيه سالفه صارت لي وانا صغير بقولها لكم بعد شوي ...بس خلوني اسولف عن زبيده واخواتها
من يذكر الطقاقات منول ويشوفهم الحين مايصدق!!!
منول يجوون في جمس احمر وابيض موديل 79 ونص الدريشه الي ورى مضلل والنص الثاني متشققه التضليله
بعدين يوقف عند القصر وينزلن منه الخالات كل وحده املح من الثانيه ..
لا وبعض المرات يجيبن بزارينهن معهن...ياحليلهم منول اطلق فرقه ب 6000 ريال الحين اشين فرقه بــ15000 غير الي نسمع عنهن بــ50.000 بزنس من جد .
سمعت انهم بعد يشترطون انهم يتعشون مع المعازيم ...منول ياحليلهم باقي العشاء مايخالفون
والفرقه منول كلها ست طيران الحين اورق ومضخمات وخرابيط ...المهم ما احب اطول عليكم بقولكم سالفتي .
كان عمري 7 سنوات يمكن او 8 لا تدققون وكان فيه حفل زواج عند جيرانا قالت لي امي تروح معي قلت اكيد عرس فيها رقص بنيات وشعور وناسه (الرقص منول احلا مافيه الشعر) المهم اني رحت معها..
اثرهم جايبين فرقه طقاقات غير طبيعيه عليهم طق مهوب صاحي انا طبعا تشققت من الوناسه ورحت تربعت بين طقاقتين قسم بالله ان كرشتي تهتز من زين الطق..
واتفرج على ها الرقص منتفخ ولابس طاقيه زري والخدود حمر مدورات وجالس بين ها الخالتين..كل وحده اسود من الثانيه وانا ادربي ها الجمجمه اهز دميجتي ماعندي ماعند جدتي
مادريت وانا في احسن حالات الانتعاش الا وذيك التكرونيه الي جااااااااايه تمشي مليون وتطير (تقمز بقوه) وتطب على ظهرها قدامي وتقعد ترافس وتصارخ وتسعبل وتشوت البيلات والفناجيل
ومره تنقلب على بطنها ومره على ظهرها وشوشتها طايره كانها ليفه مواعيين خشنه(الحديد)خخخخخخخخخخ(الي قاهرني مع كل ها المطامر شباصتها ماطاحت..من جد ليفه مو شعر)
الحريم انهبلن (لانها استنزلت الله ياخذها وانا ياغافلين لكم الله) وكل وحده عظت فستانه واطلقت السيقان في الهوى النحشه.
انا في اللحظه هذي اتلفت ادور امي طبعا ..والله ماعندك احد الطاسه ضايعه ياولد..خنقتني العبره وطقتني النفاضه وام الركب وتغرقت عيوني من الدموع
حاولت انحاش قامت العبده الي جنبي ورصتني بفخذها مشالله كأنه تريله من كبره قمت اناظرها كاني عصفور صغير يناظر غراب كبره الف مره
في اللحظه هذي مادريت الا وطرازان جاي من بين الصفوف مخترقها اختراق (امي الله يخليها جعلها في الجنه)جايتني تمشي الف من بين الحريم وتلقطين مع وحده من رجلين وتحطني في حظنها والنحشه وتطلعني عند الباب وتقعد تقرا علي ربع ساعه وانا اتنهت اشاهق من الصياح اخر شي قالت لي ياوليدي لاتدخل خلك عند الباب لين يجي ابوك قلت سمعا وطاعه توبه ادخل مره ثانيه..راحت امي وتوني ملتقط انفاسي يمكن نص ساعه يوم التفت الا ذيك الدبا كبر الصالون جايه لمي وعلى راسها قدر..انا شفت القدر من هنا ..بغيت اموت من الروعه ..احسبنهم ياكلون البزران (متاثر من جد في فلم كرتون) قلت هذا القدر الي بيطبخونك فيه ياولد المهم وصلت عندي وانا مبوبز(يعني جالس ولاني جالس) وعيوني طايره فيها كاني اناظر ديناصور
المهم طلعت راسها مع الباب وقامت تصارخ محسن يامحسن اثرها جايبه عشى رز وقرصان لولدها الي جايبهم نايم في الجمس حقهم وانا ما شفته لانه ليل:)))) وبس وبس وبس اسف جدا على الأطاله[/align]