( هههههههههههه)
( خخخخخخخخخخخ)
( الله يرجك)...
وش رايكم بهالردود ؟؟؟
أنا صراحة ما اعجبتني وقلت بستشير طبيب نفسي يشرح لنا نفسية الاعضاء اللي هذي ردودهم
عاد شوفوا هاللقاء مع الدكتور النفسي واحكموا عليه،,,,
س(جواب) وش رأيك أيها الدختر باللي كل ردودهم
( هههههههههههههههههه)؟
ج(سؤال) والله هم أكثر من يرفع ضغطي،
وأحس إن فيهم عقدة من مادة التعبير،
تقول لي : كيف؟ أنا أقول لك( ما أحد سألك):
حرف الهاء المكرر كأنك تشوف براقع مسدحة على الارض :)
جنب بعض، والبراقع أكيد
ما هن فاضيات,,,،
وكثرة الأنظار حول هالشخص تصيبه بالإرباك
لذلك تلقاه يقط كلمتين وهو مستحي.
ابووووك يا لتفسير,,,,، والله عليك تحليلات منت بسيط ابد ابد
وين هيئة الأمم المتحدة عنك
طيب واللي كل ردودهم
( خخخخخخخخخخخخخخخخ)،
وش رأيك فيهم؟
اللي يكتب الرد كذا أكيد فيه لحمية،
ويعاني كثيراً في الشتاء من نزول المخيخ،
ويتسم صاحب هالرد بكثير من السماجة
وثقالة الطينة، وأكيد إنه يفتح عشرين
موضوع مع بعض، وكلهن يرد بنفس الرد،
وأكيد تلقاه ضاغط على حرف الخاء بإصبع
رجله الصغير، وهو يلعب في خشمه بصبعه :)
طيب وش رأيك باللي كل ردودهم ( الله يرجك) وش تقول فيهم؟
هذا والله أعلم أكيد إنه ساكن بحي كله مطبات ،
وأرشح حي السويدي بالرياض، وحي العدامة بالدمام... والخالديه بالخرج
ويعاني من الرج الشديد، حتى تلقاه إذا جاء يسولف ترج براطمه ( زي ياسر عرفات )
وينصح مثل هذا الشخص بأن يشد مغاط سرواله
لأنه يمكن يطيح من الرج، لذلك تلقى صاحب هالرد
يتمنى كل الناس زيه يرجون( صاروا ببسي ) >>> عايلة ولا عزابي :)
ويدعون على الناس دايماً الله يرجك.
حلو كثير طيب وش رأيك في اللي كل ردودهم:
( هههههههههههه الله يرجك)
( أنواع الإحراج=>>> لا إحراج ولا حاجة أصلاً هو أكوس دكتور)؟
هذا وأنا متاكد من كلامي إنه يعاني في حياته
من بتر الضحكات، ما يقدر يكمل ضحكته من المطبات،
وخاصة إذا كان يضحك ولسانه برا،
محتمل كثير إنه يعض لسانه :)
وأحس إنه ساقط في الفنية والتعبير. وبس.
والله إجابتك مقنعة ,,
طيب وش رأيك يا دكتور في اللي كل ردودهم:
( موضوع حلو يعطيك العافية)؟
أنا أبصم بالعشرة إن هذولي ما قروا من الموضوع
إلا اسمه وكاتبه، ويشوفون عدد الردود قبلهم،
وما فيه ما نع إنه يقرا بعض الردود القصيرة
علشان يبني عليها كلامه( موضوع حلو يعطيك العافية).
وهذولي ذابحتهم المجاملة والسعي
لأن يكونون أكثر الأعضاء مشاركة.
سؤال: وش رأيك في اللي كل ردودهم
اقتباس من ردود اللي قبلهم؟
والله ياخي إنك حيرتني،
ممكن الواحد يقتبس من اللي قبله،
لكن لا بد إنه يعلق ويزيد شوي،
أما كل مرة اقتباس والله ما يصير،
وين شخصيتك، وين أسلوبك أنت( هذا يهاوش).
طيب سؤال اخير
وش رايك في اللي يطول الصفحات ويخلي بين كل سطر وسطر كيلو ؟؟
معليش اعذرني مقدر أجاوب لأن الموضوع بينزل في الغربلة واخاف مخاوف قلب تحذف الموضوع :)
دكتوري الفاضل كل الشكر لك على آرائك الجميلة،
اللي تعطينا انطباع إنك قليل حيلة،
ولقائي معك جاب لي الفشيلة،
والله ما عاد أجيك غير ذا الليلة.
رد مع اقتباس
