[frame="4 75"]مرّت وجتني لافيه مدري منين[/frame][frame="4 75"]
مثل الهبوب اللي تدرّج غمامه
يفرح بها لا جت شمال البعيدين
وتفرح بها وان جت جنوب اليمامه
فوق اشتعال البرق بين الحميمين
هلّت مدامعها تبل العدامه
كالدمعه اللي غادرت رمشة العين
مرّت على الشامه وخطّت علامه
وجه القمر في ليل نيِّف وعشرين
غاشيه من شدّة حياها لثامه
لو رمضانه عام بين الهلالين
فرضٍ على كل المداين صيامه
تعوذ بالله من عيون الشياطين
وتذكِّر الشايب بليلة فطامه
كن النهار اللي من سنين و دنين
ماحال دونه ليل واسدل ظلامه
أمسه غدير وغِبِّه اللعب في الطين
الحَرصْ من سلواه ينسى غلامه
مع سكرة النوار بين البرادين
لو يجتمع ثنتين "ثمل" و "علامه"
عديت نفسي من حساب المجانين
نوب الهبال بمثل هذي قرامه
ياحيف يا بطن الثرى وش تخبين
ماضر سيلك غير عرق الثمامه
جالٍ فرش فوقه بختري ونسرين
وجالٍ جرف قبره وبيّن عظامه
ارض الخزامى اللي عن القبر مترين
يشوبها ساقه ومفصل ابهامه
ان قلت هامه قصها السيف نصّين
هذا حماه وغالب الظن هامه
ويوم اتخيلها بتفكير هالحين
انصاف بيضه في مرابض نعامه
عديت من سود الأثاثي ثلاثين
ولقيت قدام الأثاثي زمامه
مدري من اللي كان عند المواعين
ولا ادري عليهن فاح كم من كرامه
عديت كل اطلالهم غير ثنتين
هذي عصا شلفاه.. هذا حسامه
ومحلي الاطلال ثالث حصاتين
ما كنها الا يوم احلي وشامه
وزهره هجينه تايهه بين لونين
حلّة بهاء ممزوج شامه بيامه
قولة سقى الله يوم كنا بزارين
تذير خشف الريم حزّة ريامه
ما احلى من احلام البراءه قرابين
على بحر موجه يلملم حطامه
الا زهو ينتاب بنت السلاطين
وصيفها رغبات سته دوامه
ان عاملته بلينها وانتهى اللين
اقصى حدود اللين بعض الصرامه
وان خيرته وحطته بين جيلين
أصبح وجود الشي مثل انعدامه
تشبه لبوها قدوته يوم حطين
تسبر حصون القلب قبل اقتحامه
لي من صبور الوجد سَن السكاكين
وله من جزور المجد ذروة سنامه[/frame]
للشاعر -- عامر عمار
رد مع اقتباس
