[poem=font="Simplified Arabic,6,firebrick,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
قلت احبك ,, مانْكر اني قلتها=وانجذب لك واعترف بالانجذاب
قلت بك كلمة غلا , واعلنتها=ما بها شك وتردد وارتياب
وافتخر ان المشاعر بحتها=لك لوحدك ما يواريها حجاب
اذكر اني همت فيك , ووقتها=همت فيني لين لامسنا السحاب
النقايص بالهوى كملتها=وكْتمل واجتزت بك حد النصاب
كل ميلاتي معك عدلتها=وكل امرٍ تطلبه مني مجاب
في دروبك خطوتي وسعتها=الرضى زادي ورجواي الشراب
نار حبي في خلاك اشعلتها=وان خبت زدت اللهايب التهاب
زدتها ثم خْمدت واضرمتها=وكل ما غذيتها زاد العذاب !
اتعبتني حيلتني واتعبتها=وانت ساكن - لاتعين ولا تغاب -
ويوم جذوة حبنا اخمدتها=وانتصب عودي ونفّضت التراب
والجروح النازفه ضمدتها=والكرامه هونت ذاك المصاب
جيت تذكر عشرةٍ ما صنتها !=وبعيونك يلتطم موج العتاب !
ناسي انك في غرورك خنتها=يوم قلبي يرتجي قلبك ثواب
تضحياتي ما ابد قدرتها=تحسبه واجب علي خفض الجناب !
راحت ايام الوله ,,, ودعتها=لاتحسب لرجعتي ادنا حساب
طبعي الحاجه اذا ما بعتها=مارْجع اشريها ,, وذا آخر جواب
واعترف كلمة - احبك - قلتها=يوم كنت اروي ضماي مْن السراب !![/poem]