أعزائي مشرفين وأعضاء وزوار ..... غرابيل
قصيدة بسيطة .. بعنوان ( النقد )
وقد تكون رساله للناقد أياً كان .. ولا أقصد أحد محدد
وكيف يكون النقد من وجهة نظري الخاصة وكيف يكون إيجابياً
وأتمنى ان ترقى لذائقتكم
====================
طولت أنــا بالــي كثير .. وهـانت علـي المسألـــه
................................ بس كنهــــا زادت شوي .. وماعندي شيٍ اخسره
ماقلت أنا شاعــر كبير .. هـــو درب باقي بأولــه
................................ ترى حيلتي فبحر الشعر .. مجداف وناوي تكسره
بعض البشر لامن كتبت .. دور خطــــاك وحـللــه
................................ مــاهمه زين اللـي كتبت .. الشـــــين همـه يفســـره
وحنــا ترى كلنا بشـــر .. عمــرٍ قصـــير ومسهلـه
................................ لا لا تصعبهــا يا خــوي .. والدنيا ماهي مقصـره
حياتنـــا هالحين طــــين .. وأنـت جــــــاي تبللــــه
................................ الخطــوه نخطيها غصب .. نمشـي دروب معسره
لاجيت تبين لي خطاي .. أضرب لي بعض الأمثله
................................ ولا لا تقول على المـلا .. هــــذا حروفه مكســـــره
النقـــــد لاجــــا بالخفــــا .. وبكــــل مـــــوده نقبلــه
................................ خطانا أفضل وضحـــه .. خل الصعــوبه ويســــره
ولأي واحــــد تنقـــــــده .. إرسل رسالــــه توصلـه
................................ بعد التحيه والســـــلام .. تكسبه ومــــا تخســـــــــره
قله ( هي لو جــت كذا ).. بيشـوف خطـــاه ويعدلـه
................................ وأنت تصير بوقتهـــــا .. الصاحب اللــي ينصــــره
وأنا ترى بالـــي طويل .. وتهون عــندي المسألـــه
................................ زادت وأنا ما عندي شي .. وأخاف إنــي اخســـــره
باقي أنا شاعر صــغير .. وفــــدرب باقــي بأولـــه
................................ مجداف لـي فبحر الشعر .. وأنت ناوي تكســــــــره
وتقبلوا خالص تحياتي ،،،