السلام عليكم ورحمة الله وبركاته
حبيت اقوول تجربتي بالحب واتمنى كل بنت ماتمر بلي مريت فيه الله يستر علينا وعلى بنات المسلمين..
بدت قصتي من اول سنه لي بالكليه تعرفت ع مجموعه من البنات وكل وحده كان عندها حبيب وانا الوحيده اللي ما كان لي سوالف من قبل ولا كنت اعرف الحب ولا جربته المهم كان البنات يستغربون وضعي ويقولوون لي بنت وفي هالعمر كييف ماتكلم شاب او تحب المهم مع الوقت تأثرت فيهم ومن ثاني شهر لي تعرفت ع شاب عن طريق وحده من البنات قالت لي هذا الشاعر المعرووف اخذي رقمه المهم خذيت رقمه قلت بدق عليه وببدي اعجابي فيه لاني صدق كنت احب اشعاره المهم دقيت وكلمته المهم اهوا ما كان يعرف ان البنت عطتني رقمه طبعاً البنت كانت تعرفه قبل ومادري شنو اللي صار بينهم اللي خلها تعطيني رقمه المهم كلمته وماكان عنده علم بالموضوع والولد بدال مايوضح يلي الموضوع ويقولي انك غلطانه وانا مو الشاعر الفلاني كمل الموضوع ع اساس انا الشاعر!!
مرت شهور وانا اكلمه من يوم ليوم وانا كنت احلم متى اشوف الانسان اللي انا معجبه فيه والموضوع تعدى الاعجاب بالنسبه لي صرت اعشقه!!
وبعد فتره قال انا ودي اقوول لك شي بس مابي اخسرك قلت له قولي وانشالله ماتخسرني وصارحني وقالي انا مو الانسان اللي انتي تبين واللي خلاني اكذب عليك اسلوبك وتعامل البرئ اللي حسسني انك طاهره وغير عن كل البنات انصدمت بوقتها وسكت بعدين قلت له واللي خلاك تكذب علي وانا جد حبيتك وقالي خفت اخسرك واذا حابه تكملين معي بكيفك وراح اقوولك منو انا ونصير حبايب طوول العمر انشالله!!
فكرت شوي ورديت عليه وانا الحب تارس قلبي وكنت مو قادره استغنى عنه بوقتها وحابه اكمل معه قلت له انا ابيك اذا انت تبيني طار من الفرحه واستانس وللعلم الولد من اول مره كلمته كنت صريحه معه بكل شي يعني اهوا يعرف معلوماتي كلها ولكن حتى واهوا صارحني وقالي انا مو فلان اللي في بالك بدينا حياتنا بكذبه ثانيه بس هالمره مو بعد شهرين بعد سنتين من العشره عرف وكانت صدمتي كبيره هالمره انا اللي عرف ما قالي وصارحني!!
المهم ماطوول عليكم كنت احبه لحد الجنون يعني ماشوف غيره في الدنيا لدرجه كنت انطر اليوم اللي يقوولي بخطبك من اهلك وتصورت انه يبيني زواج واثاري الولد كان يبيني لعب بس!!
كنت اطلع معه ونروح بيتهم وللعلم اهوا كان مطلق من قبل وكبر مني بواجد انا عمري كان 20 واللي احبه كان32!!
المهم كنت اسويله كل شي يبي ومارفض طلب لهويعني كنت شبه زوجه له وكان ياخذ مني اللي يشتهي!!
كنت اتشوفه بالوقت اللي اكوون فيه بالكليه لاني ماكنت اقدر اطلع معه غير هالوقت كنت اغيب من الدوام وارووح معه من الساعه8 الصبح لين نهاية الدووام الساعه2!!
استمرينا ع هالحال مدة سنتين وانا كنت المح له متى بتجي تخطبني واهوا كل يوم يطلع سالفه ان ابوه يطلب منه ان يرد زوجته الاوليه ويغير الموضوع
بعد فتره شكيت فيه لانه ما كان يقولي اسمه الكامل ولا انا اعرف اهوا ولد منو بس اعرف اسمه وكنت لطلع معه وطلب منه اني اشوف بطاقته المدنيه ويرفض وفي يوم عصب علي وقالي انتي تشكين فيني قلت لا بس ابي اشوف شكيت بوقتها لانه كانت رده فعله غريبه وبحزتها قلب علي كأني عدووته ولمحت بوجهه شي كأنه انسان ثاني غير عن اللي اعرفه
رديت حق الكليه بسرعه لاني يوقتها زعلت عليه من رده فعله وماكملت معه اليوم كله ورحت عن صديقتي وقلت لها السالفه كلها المهم البنت ساعدتني وقالت مافي غير انه اطلع معلومات عنه عشان تطمنين قلت لها اوكي بس بسرعه قلت انشالله يومين والمعلومات تكوون عندك كامله
وبحزتها اول ماردني الكليه مادق علي ولا تطمن علي مع اني انا الزعلانه والمفروض انه يراضيني ولكن العكس طنش وكبر راسه قلت بنفسي دامه مادق دقي انتي وعاتبيه دقيت لقيت الجهاز مغلق انصدمت وقعدت احاتيه يومين وهوا مغلق جهازه استغربت وانا كنت متولعه فيه ومااقدر اصبر عنه حتى وانا اللي زعلانه عليه كنت اراضي نفسي وادق عليه لو اهوا اللي غلطان علي ماكنت اقدر ع فراقه ومرت الايام ودق علي قالي انا سافرت لان كانت عندنا حالت وفاة وماقدرت ادق عليج "طبعاً كذبه كالعاده"
وانا من لهفتي ماصدقت اسمع صوته نسيت الموضوع وكلمته بكل حب..
بعد فتره دقت علي رفيقتي وقالت لي يافلانه انا بقوول لك شي ومابيك تنصدمين اللي انتي تكلمينه انا واحد عمره38 وعنده عيال ومتزوج طبعاً انا المغفله ماصدقت قلت لا انتي غلطانه قالت كيفك انا قلت لك وانتي حره!!
للعلم انا بنت ولله الحمد مزيونه وجمالي مو بسيط كنت كامله من كل النواحي يعني ماينقصني شي والولد اللي كنت احبه ماكان حلوو وكان باين عليه الكبر بالعمر بس على قولت القايل الحب اعمى!!
ماطوول عليكم كملنا مع بعض وكثرت المشاكل بينا لاني كنت ابي استقرار انا سلمت نفسي له ومابخلت عليه بشي لاني عند اتصوره زوج لي وكل ماكلمته يقوول انا ودي بس ظروف تمنعني وبعد وقت رد الشك فيني لاني كنت اكلمه بالتلفون وفجأه سمعت صوت ولد صغير يقوووله "يبه يبه" الولد ع طوول صكر التلفون بوجهي وبعد ساعه دق علي وسألته وقالي لا هذا ولد اخووي ومشيت معه الموضوع كالعاده
ورحت وكلمت رفيقتي وقلت لها انتي متأكده من المعلومات اللي قلتيها لي قالت اذا ودك تأكدين عطيني رقم سيارته ورقم تليفونه واذا راح اطلع بيانات ع الاثنين وانشوف اذا صج اول لا وانا من زمان كنت سألته اذا سيارته بأسمه او لا قالي لا هذي سيارتي وباسمي وحتى رقم تليفونه بأسمه..
المهم راحت رفيقتي وطلبت من حبيبها انه يسويلنا هالخدمه والولد الله يوفقه وافق وطلع كل البيانات عنه وكانت الصدمه بلي عرفته!!
تخيلي انك تعيشين مع انسان طوول سنتين بكذبه وانك سلمتي نفسك حق انسان واطي وابن حرام لانه ماخاف الله فيني واهوا الوحيد اللي يدري عني طاهره بمعنى الكلمه وكنت اضحي عشانه باشياء واجد بس عشان اسعده لاني كنت اتخيله زوج لي
المهم اللي عرفته كانت صدمه لانه طلع متزوج وعنده اربع عيال وعمره كبير وكذب علي بكل شي حتى اسم عايلته كذب فيه ليش سوى معاي كذا يعني اهوا كان يلعب فيني بالوقت هذا كهرته واحتقت نفسي لاني رخصت بعمري حق انسان مايخاف الله دقيت عليه انصدم وقالي منو قالك انا راح اوديه وراء الشمس اشلون يجرا ويطلع عني بيانات وفوق هذا نكر الموضوع وسده يوجهي من الموضوع انتهى كل اللي بينا لا اتصال ولا مسج ولا شي كأنه حلم مر بحياتي بس الاحساس اللي احس فيه الحين احساس بالذنب انا خنت ثقة اهلي وعصيت ربي وسويت كل شي عشان احصل ع انسان مو لي ليته تذكر شي واحد سويته عشانه ودق يعتذر بالعكس رماني مثل اي وحده عرفها قبلي..
والله العظيم يا بنات انه يعز علي اكتب قصتي هذي بس حبيت افيدكم وانصحكم لاتغركم الكلمه الحلوه ترى الولد اذا يبي البنت مايطوول معاها يروح ويطق باب بيتهم مايستمر بالغلط ويايا..
بس انا الحين احمد الله ان ربي نور لي دربي وعرف الحقيقه وان الموضوع انتهها ع خير واحمد الله اني لحد الحين عذراء وماقدر يأخذ اللي كان يحلم فيه مع انه ختلى فيني اكثر من مره بس انا كنت احافظ ع نفسي حتى واحنا بروحنا..
اتمنى من كل واحد يقرى موضوعي انه يدعيلي بالغفران واناربي يستر علي وييسر امر ويوفقني لاني لحد الحين موقادره اغفر لنفسي اللي صار..
اتمنى تدعوولي من قلبكم وان ربي يحققلي اللي في بالي والله موطالبه غير الستر مع الانسان اللي ابيه!!
الله يحفظ بنات المسلمين ويستر عليهم ويوفقهم بالزواج الطيب بأذن الله..
وانا عن نفسي والله مارح اسامحه وعسى الله يوريني فيه يوم مثل ما حطم قلبي وسرق فرحت عمري استغل حبي له عسى الله ينتقم لي منه ويأخذ حقي وينتقم من كل شاب يكوون في هالنوعيه... أمييين انشالله..
للامانة منقول