[align=center]السلام عليكم ورحمة الله وبركاته
المصافحه الأولى لي في منتدى غرابيل..
أتمنى ان تلاقي شيئا من استحسااانكم..وان أصبنا ففضل من الله وان أخطأنا فمن أنفسنا ومن الشيطان..
وتقبلوني ضيفا عليييكم[/align]
[line]
[rams]http://www.al3rabia.net/gased/ghasham/111.ra[/rams]
[align=center]ضــــيـــــفـــــه[/align]
[poem=font="Simplified Arabic,6,black,normal,normal" bkcolor="transparent" bkimage="backgrounds/17.gif" border="none,4,gray" type=2 line=0 align=center use=ex num="0,black"]
لفيتي وارحبي ضيفه بقلبٍ كنتي راعيته
= ولك قدر الضيوف وحشمة اللافي على داري
تقهوي للغلا فنجال منك ما تقهويته
= قصيده فيك ابذبحها وأقلط بك على اشعاري
ثلاث ايام ذا زادك وذا ضوك وشبيته
= بعدها ورّدي بعلمك وقولي لي وش الطاري
قالت لي غلطت وجيت دمعي دم هليته
= وفوقه نزف من قلبي يبين لك مدى اعذاري
انا المذبوحه بحبك دخيل اللي تهقويته
= دخيلك لا تخيـّبـني وتخيـّب كل مشواري
احبك والله احبك وعرقي لو تمثنيته
= تشوف بداخله شوقٍ بوسط العرق لك جاري
فراقك انكتب فجأه ووالله ما تمنيته
= ردا حظي ردا عمري ردا من سوّ اقداري
قسم بالله بغيابك لذيذ النوم ما امسيته
= واذا بغفو تفيقني دموعي وسط اسحاري
تخيّل كم يناديني صدى صوتك ولبيته
= واذا جيت احتضن يدك لقيتك بس بأفكاري
تولتني عقب فرقاك نار وصدر خليته
= ناري تشتكي صدري وصدري يشتكي ناري
حبيبي والرجا فيني بقا في قول ياليته
= يعوّد بس هالمره ويروي ذبلة ازهاري
غريقه كلي فبحرك وبحرك عاليٍ صيته
= أمانه لايهيج البحر ويكسر رجوه الصاري
تنثّر كل شي فيني بعد ماكنت لميته
= أمانه من غيابك عود ولملم كل أنثاري
مع الأحياء انا حيه لكن روحي الميته
= اذا بيطول صدودك فكفن هالجسد عاري
صدق من قال من يسكن فبيتٍ ماهو ببيته
= نزل قدره وانا عقبك نزل والله مقداري
حبيبي تذكر فلانه أخاف اسمي تناسيته
= وربي اسمك بقلبي نقشته وصارلي شعاري
حبيبي تذكر بصوتي وش احلى شي غنيته
= حبيبي ماتت اغنيتي حبيبي ماتت اوتاري
حبيبي والمشاعر دين جيت الحين اوفيته
= طلبتك اصدر لعفوك ومزق صك اعساري
حبيبي طالبك قلبي ومصيبه كان رديته
= تأكد من عقبك الموت بيسدل مسرح ستاري
اذاك بتاخذ بثارك وسيف الموت سليته
= وصيه عقب تذبحني امانه تاخذ بثاري
خلص علمك وقالت ايه قلت العلم تاليته
= عزيزه بس مشوارك معد ينفع لمشواري
تقهوي من الم فنجال من بعدك تقهويته
= ذبحت لك القصيده رد وقلطتك على اشعاري
ثلاث ايام ذا زادك وذا ضوك وشبيته
= وعقبها روّحي ماعاد من حبك سوا الطاري
لفيتي وارحبي ضيفه بقلبٍ كنتي راعيته
= ولك قدر الضيوف وحشمة اللافي على داري[/poem][line]
[align=center]
وتقبلوا خالص تحياتي
أخوكم غــشــّــام[/align]