[poem=font="Simplified Arabic,6,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
نايف سعد وجه السعد لقياه عيد = حبّه سكن قلبي وصعب إبادته
قرمٍ عن دروب المراجل ما يحيد = راد المراجل والمراجل رادته
من روس روق اللي يضدون الضديد = أبوه ربعه كلّهم بسيادته
ون عوّدت ل ( الشعر ) للجزله يجيد = الشعر ما يصعب عليه إجادته
دكتور في علم المراجل والقصيد = يا جاهل الثنتين مر عيادته
مازادته قصيدتي به تستزيد = زاد القصيده بالفخر مازادته
جيته قبل يومين مدري ويش اريد = بس الأكيد أشواق قلبي قادته
واللي مثل نايف عسى عمره مديد = يجيله الواحد بدون ارادته
جيت ولقيته جالس لحاله وحيد = عرفت من وجهه عدم سعادته
ملامحه تنبئك عن حزنٍ شديد = حسبي على من سببوا نكادته
رحّب وقال الله جابك يالعضيد = يومين خدّي ماقرب وسادته
هيّا مشينا لا تزيد ولا تعيد = الكلب مستذيب وهو بقلادته
بنروح نلعن جد ملعون الكديد = تجرأ المسيود يشتم سادته
قلت إركد وقلّي وش العلم الاكيد = لكن جنونه طيّرت ركادته
وانا اعرفه مايسمع وراسه عنيد = خصوص لا عصّب وعنزه صادته
لكن سايسته وخلّيته يهيد = وبعد هدى أخذت كل إفادته
قلت اذكر الله والعن إبليس المريد = وش يرجي المحسود من حسّادته
هذي هروجٍ ما تضر ولا تفيد = ما ضرّت الرجّال ولا فادته
اللاش يبقى لاش قدره فى الصعيد = والجيّد تشوف العيون جيادته
تاريخنا شامخ من العصر التليد = يبقى بعز ونجتهد لزيادته
أقولها والله على ذلك شهيد = خل الخبل ما احد طلب شهّادته
والذيب ما يدري عن خوار الهريد = ويمري على فعل الخبل رشادته
خل الخبل ماهو ضديد ولا نديد = شين الطبايع والمشاكل عادته
يهوى المشاكل معْ قريب ومعْ بعيد = ويجيلها حتى ولو ما نادته
والضرب وانا اخوك فى القلب البليد = والله ما يحييه من بلادته
مير اترك البالون يصفق فى الحديد = وبيفش مهما يوثقون سدادته
تعال بس إجلس بسمّعك الجديد = واذا اعجبك لا مانع من إعادته
ياصاحبي ذاب الصخر قبل الجليد = أخذ الجليد من الصخر جلادته
وتعلّموا طرش البحر طبخ العصيد = والاسكريم اللي وسط برّادته
جوه البدو ثم اختلط زيد وعبيد = ياشرهة العاقل ويا نقادته
تدخّل الحدّاد في شغل البريد = ليته يعوّد يالخوي لحدادته
والجندي اشوفه تقول انّه عقيد = أوامره تلغي أوامر قادته
وراع الصلاه اللي يصلّي فى المسيد = ترك صلاته وافترش سجّادته
يانايف الاوضاع حوايس عبيد = من ينجد المجلود من جلاّدته
قررت اعيش العمر فى الدنيا زهيد = وما خلّوا الزهيد مع زهادته
جاني محمد بيه من أرض الصعيد = يشكي علي من حظه وقرادته
قلت اسمع الحال الشقي ولاّ السعيد = مكتوبةٍ للعبد قبل ولادته
والموت وانا اخوك في حبل الوريد = والله خلقنا كلّنا لعبادته
اعمل ليوم الآخره يوم الوعيد = هذا إذا قلبك تبي سعادته
على كذا خلاص خلّصنا الجديد = واذا اعجبك لا مانع من اعادته [/poem]