[poem=font="Simplified Arabic,5,black,bold,normal" bkcolor="transparent" bkimage="backgrounds/8.gif" border="groove,5,gray" type=2 line=0 align=center use=ex num="0,black"]
لقيت لأبيـات القوافـي عفاريـت=وقضيت معهن وقتي اللي قضيتـه
زاد العذاب وضاق صدري ومليت=وقريت علـمٍ ليتنـي مـا قريتـه
ما كل من جيته يقـدّرك لا جيـت=ولا كـل رجـلٍ لا بغيتـه لقيتـه
رجلٍ تعـزّك فزتـه لا تعزويـت=ورجلٍ يكون احسن إذا انّك عزيته
رجلٍ يقـدّر هقوتـك لا تهقويـت=ورجلٍ يجي ما هو مثل ما هقيتـه
رجلٍ يلبي دعوتـك يـوم ناديـت=ورجلٍ حسافه دعوتـه لا دعيتـه
رجلٍ يغيب بغيبتـه مـا تسليّـت=ورجلٍ وهو جالس بجنبك سليتـه
رجلٍ نخيته ينتخـي لا توازيـت=ورجلٍ يزودك هم لامـن نخيتـه
رجلٍ ينادي بالكرم فاتـح البيـت=ورجلٍ تشوفه قافـلٍ بـاب بيتـه
هنا تشوف من العرب نادر الصيت=وهنا تشوف اللي يكـدرّك صيتـه[/poem]
[align=center]...
...
...
أخوكم / نواف هلال العنزي[/align]