السلام عليكم ورحمة الله وبركاته
كما هي
[poem=font="Simplified Arabic,6,black,normal,normal" bkcolor="transparent" bkimage="" border="none,6,royalblue" type=2 line=0 align=center use=ex num="0,black"]
يا حسين لو تدري عن الوضع يا حسين=ما كان تشره لا طلعت الطويله
كذا من البارح واناء خاطري شين=ازريت ازيح الهم عني واشيله
تقول في راسي ملوك الشياطين=تولع البارود جنب الفتيله
حتى غدا راسي سواة البراكين=من جور صكات الهموم الثقيله
وان جيت أعدل ما يلات الموازين=ودي الكن الوضع ما فيه حيله
تدرون ويش المشكله يا الميامين= السوق غالي والدراهم قليله
الطاق يضرب يا جماعه بطاقين=لاسعار مرتفعه معا كل ليله
امن اولى تكفي مقاضيك ميتين=والي في بالك يمكن انك تشيله
واليوم لو تدخل وفي جيبك الفين=صارت عليك اغراض بيتك مهيله
لاسعار مرتفعه والاسهم على وين=ويش نحكيله بس ويش نحكيله
وحماية المستهلك اتشوف بالعين=وكنها ما شافت حاجةٍ مستحيله
عيب عليكم عدلوا الشين بالزين= الدين واحد والبلد والفصيله
إلى متى وانا من الدين لدين=والوقت الاقشر حدنا للهزيله
واليا اشتكينا قلتوا الحل بعدين=تصبروا والصبر خصله فضيله
الضاهر أنكم كلكم بين قوسين=ما ابغى اكمل لين اشوف الحصيله
ووزيرنا ناشر خبر قبل يومين=ليتة قبل يبدى كلامه يكيله
تدرون ويش يقول راع الملايين=يقول بدل كبستك بالبليله
بدال ما ياقف بصف المساكين=زود على حما المواطن مليله
تكفا يا ابو متعب على العسر واللين=وتكفا يا راسٍ روسنا تنحنيله
وتكفا وتكفا يا ملاذ المجلاين=اتصلح الموضوع بأية وسيله
تفزع معا كل العرب في الميادين=وأن جالك المحتاج تبرد غليله
تشهد لك العالم من الغرب لصين=آنك معدل فالدول كل ميله
والآقربون أولى يا بو متعب الحين=وحنا عيالٍ لك قبيله قبيله
وقفتك يا عز البلد ناصر الدين=يالي علومك كلبوها جميله
وبلادنا والله خير البلادين=وملوكنا ملوك الشرف والفضيله
وختامها هاذا هو الوضع يا حسين=روح واناء بطلع براس الطويله[/poem]