[align=center]
))((
أعزائي أعضاء منتدى غرابيل
اعتذر عن غيابي وأود أن أجدد ولاءي لهذا المنتدى الشامخ بهذه المتواضعة
وأتمنى لها القبول[/align]
[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=1 align=center use=ex num="0,black"]
قلت : لاقوّه ولابه غير حول=ربٍ أعلم في مضامين الطباع
وأطلق عنان القوافي لك تجول=وأبدع أبياتي لجلْك أنت ابتداع
لو تشرّه لو تقول اللي تقول=بس أنا طالبْك لا تطري الوداع
كل همٍ لا ضحك طرفك .. يزول=لا ضحكت يزول هم الإلتياع
البلا يا صاحب الطرف الخجول=لا زعلتي ضاقت فجوجٍ وساع
من غيابك صايبٍ حالي نحول=ما تشوف الحال عقبك كيف ضاع !
أنت حبك يقرع بقلبي طبول=كيف ما ارجي عقب غيبتْك اجتماع
من جمالك تاهت أفكار الزحول=واستوى هم المهاجم والدفاع
واثقلوا لجلك خفيفين العقول=واعجزوا دونك طويلين الذراع
والشهر لجلك تمنى يصير حول=والقمر ودّه يصير الك الشعاع
من يشوفك يكره أسباب النزول=يصعد القمّه بقدر المُستطاع
يا مدرّسني على كل الفصول=لين صيتي مع هل الإبداع شاع
لا تهمّلني وأنا قلبي ملول=تدري أن قلبي على اللقيا شجاع
ولا تحمّلني ثقيلات الحمول=وأنت خابر حملي اللي ما يذاع
غير زولك ما سكن فالعين زول=لوسمحت أصغي أليَ الإستماع :
فاتحٍ لك في خفوقي Big مول=وأنت تآمر والأمر لجلك مُطاع
لو يزول القلب .. حبك مايزول=لو اشيله واحفظه وسط النخاع
أنت وحدك في خفوقي ياخجول=مالقلبي في هوى الخفرات داع
لدّ لي بالك وركّز يا زعول=الزعل يرسم لطابعك انطباع
هيه ياللي صابني منّك ذهول=لا تتوّهني على درب الضياع
فالسنه ياغايتي أربع فصول=ماعرفت ألا فصل ماله قناع
فصل واحد للزهر فيه الذبول=والغصون أوراقها من فوق قاع
يا ممتّر خافقي عرضٍ وطول=ماتشوف ضلوعي اللي لك جياع
يسألك قلبي يبي منْك الحلول=وش سبايب غيبتك والأنقطاع ؟
لو لقى غيري بقلبك له قبول=وش يردّه ما يحطـّه له متاع ؟
عارف أنّه لويحاول ما ينول=السفينه ما تسير ابلا شراع !
في خفوقي ما تقول ألا تطول=ما تفكّر وش سبب هالإنصياع ؟
أسأله قلبك وقلّي وش يقول=لانوى قلبي على درب الوداع
أدري أن ماله أبد قوّه وحول=كيف عقب الحب يرضى بالضياع ![/poem]
[align=center]
Big مول : مركز كبير[/align]
[align=center]أخوكم / راكان محمد[/align]
رد مع اقتباس
المشاركة الأصلية كتبت بواسطة راكان محمد
