الحمد لله حمد الشاكرين،،، والصلاة والسلام على حبيبي محمد،،،سيد الخلق أجمعين،،، وعلى آله وصحبه وأزواجه وحزبه إلى يوم الدين.
اللهم أرنا الحق حقاً وأرزقنا إتباعه،،، وأرنا الباطل باطلاً وأرزقنا إجتنابه.
كاتالوج الموضوع:
نحن نحب كل الوحشين في العالم،،، ونزرع الورود في كل مكان،،، نحن نكره الحقد ونزرع المحبة،،، من أجل تحقيق أحلامكم وتزيين سحناتكم،،،إنضموا إلى... قيثارة،،،
انضموا إلينا أو إستعدوا للقتال.
انضموا انضموا.
السلام عليكم ورحمة الله وبركاته.
مثلي مثل أي مواطن شريف وطفران وخرمان ويهوى المراسلة وجمع الطوابع،،، قررت أزور المنتدى بعد غيبة طويلة نسبياً( لعلمكم أنا اللي مخترع هدي الكلمة،،، لا يضحك عليكم الإمبريالين والمستشرقين)،،،
لبست أحلى ثوب عندي ( هو ثوب واحد اللي عندي،،، بس لما تقلبه،،، تحفة)،،، ودقيت الغترة ماركة " بنت البكَّار"،،، وفكفكت الطين عن الشرقي الأحمر حقي،،، وقررت أغامر بمصروف الشهر،،، وأركب ليموزين،،، عشان لا تخرب الكشخة،،، وعشان يحترموني عيال المنتدى ويدخلوني القسم العام،،، بدل ما يدخلوني قسم الشكاوي،،، وبالتحديد المطبخ حق القسم،،، كأني سواق مو عضو.
نزلني سواق الليموزين قدام الباب،،، بعد ما وصلني في وقت قياسي،،، أقل من الوقت اللي سجله " مايكل شوماخر" في الجولة التجريبية،،، وعلى أساسها إستحق سواق الليموزين إنو يكون أول المنطلقين لتوصيلي.
لفت إنتباهي وانا داخل المنتدى،،، زينة وهيصة وأغاني،،، وعالم داخله وعالم خارجه،،، وبزورة في كل مكان،،، وريحة حطب وطبيخ وشاهي وقهوة،،، والتيازير في كل مكان،،، وترامس الموية،،،
قلت في بالي،،، " والله فيهم الخير أعضاء المنتدى حكومة وشعباً،،، أكيد عرفوا إني رجعت من اختبارات حافلة،،، وعاملين عزومة إحتفالية على شرفي،،، ياليتني أستلفت مشلح من إمام وخطيب مسجد حارتنا"،،،
سمعت أغنية مشغلينها على أعلى شيء ,,,, أحمد حمادة ياهو ياناس سكـــــــر زيادة ,
،،، وبالذكاء الفطري اللي عندي،،، عرفت إن العزومة معمولة في سطوح المنتدى،،،
وطلعت السطوح،،، وألمح المعازيم نازلين مزمار على الأغنية،،، ولقيت صف الإستقبال واقفين عند الباب كأنهم وفد اليمن للأولمبياد،،، وعلى رأسهم " عشق ليل"،،، و " الامبراطور"،،، و " سهم المنايا"،،، و " وعاشق الحب"،،،
دخلت والإبتسامة من الإذن للإذن،،، وبأغالب دمعة كانت حتفر من عيني من كثر إحساسي بحب الأعضاء ليا،،، وقلت بأعلى صوت،،، " السلاااااااااااااام عليكم جميعاً"،،،
أنا سلمت من هنا،،، وما أدري إلا الأعضاء أتكهربوا وكل مين حط ثوبه في سنونه وقال يا فكيك،،،أو كأنك
قطعت الكهرباء وسط قاعة أفراح حريمي،،، ناس تنقز من السطوح،،، وناس تدعس فوق ناس،،، وبزورة
لاصقين في البلاط
،،، " يا جماعة إيش فيه؟؟؟!!!"،،، محد راضي يرد عليا،،، كلمين يجي يفرصع عيونه فيا ويشرد،،،
مسكت واحد وحشكته في الركن،،، وقلتله: " ممكن تفهمني إيش اللي صاير لكم؟؟".
الراجل كان بيفرفر بين يديني،،، كأنه وانيت أبلاتينه لادع،،، رحت سلمت عليه بكفين عشان يهجد ويتكلم،،، قال: " إح إح إح إح إحنا،،، كن كن كن كن كنَّا،،، فأ فأ فأ فأ فاكرينك،،، مو مو مو مو مو،،،، ".
الراجل ما قدر يكمل هرجته،،، أغمن عليه،،، بس قيدي فهمت إيش اللي حصل،،،
تبغوا تعرفوا إيش اللي حصل؟؟؟،،، على كدا لازم أحكيلكم الحكاية من الأول.
--- --- --- --- --- ---
في يوم من الأيام،،، كنت قاعد في عقر دارنا،،، أو في ما يسمى في المسلسلات المكسيكية،،، بغرفة المعيشة ( يعني الصالة،،، لغير الناطقين بالمكسيكية)،،، على أساس إني بأضيع وقت على بال ما جدتي وجدي يرجعوا من زيارة ناس المفروض إنهم رايحين يزوجوني بنتهم،،،
جالس مفرشخ على الأرضية( يعني نايم على ظهري مع شنقلة الساقين،،، وإمتصاص البطن،،، هدا لغير الناطقين أصلاً)،،، لابس الترنق الأخضر تبع المدرسة ( عواجيز المنتدى أكيد عارفينه :p ،،،وتحديد الجينات الوراثية لحامله)،،، و حاطط اللابتوب على تكاية،،، ومعين صباع رجلي الكبير لزر إنتر،،، والتاني لزر شفت،،، والثالث لزر F415،،، <<< بدري عليكم التطور في أجهزتكم،،، حدكم f12 وحرف صغير كمان.
وبراد الشاهي جنبي،،، ولي الشيشة ملصقة بفمي بسيلكون،،، قيدي بايعها من أصله وصرت أشيش قدام جدي،،، من يوم ما اتراهنا أنا وهو على مين يفوز في مباراة الأهلي والهلال،،، وما يحتاج أقولكم مين فاز طبعاً
كنت متوتر على الآخر،،، وحاسس إني حاير ومعذب،،، كأني مراهقة مرسلة مشكلتها " لفوزية سلامة" في "كلام نواعم"،،، وأفكاري تشيلني وتهبد بيا في الأرض،،، كأني واحد متسابق جالس قدام " جورج قرداحي"،،، وبأفكر في الإنسحاب في سؤال أبو مية ريال.
قللي عقلي،،، إذا المرة دي رفضوني،،، راح أهاجر وأفتك من البلد دي اللي بناتهم ما يعرفوا قيمتي،،، على إيه شايفين حالهم،،، ما أدري،،، الوحده منهم ما تفرقها عن الولد غير إن الولد يروح يصلي في المسجد وهي لأ.
،،، وإذا أهلي ما خلوني أهاجر،،، راح أقدم في رئاسة شؤون الحرمين عشان يشغلوني " أغا "،،، وراح أضطر أتخلى عن رجولتي في سبيل كرامتي،،، الأمر الذي يخولني الدخول لمصلى الحريم وأطيح فيهم فرش بالخيزرانة،،، ومحد يلومني.
وشكلها فكرة الأغا كيفتني،،، فجلست أخطط لها بكل رواقة،،، إلا أن ما دريت إلا جدتي فوق رأسي دوبها جايه،،، والدموع في عيونها كانت تتكلم عنها،،، وتعلن فشل المهمة اللي راحوا عشانها،،،
قلتلها: " بشري يا ولية" <<< للحصول على معنى كلمة ولية،،، يرجى مراجعة مدرسة المشاغبين.
قالت لي: ( بتنهيدة) " الزواج قسمة ونصيب يا ولدي".
فجأة،،، حسيت كأن جدتي أرتفعت عن الأرض شوية،،، وفجأة أختفت من قدامي،،، وظهر جدي بدالها،،، تارينه شالها من قفاها وراح حادفها على الجدار،،، ولصقت فيه،،، وما طلعناها إلا بنسباك،،، جبروت أجداد بعيد عنكم.
جدي قال بكل حب وود: " نصيب إيه اللي تتكلمي عنه يا حرمة؟؟؟ هو اللي يشوف وجه الحمار دا يشوف نصيب"،،، طبعاً جدي وبيدلعني عايدي،،، ولا تنسوا إنه هلالي ودوبه آكلها.
تابع جدي : " من فين ربنا يوفق الدب دا بزواج وهو جماله لا يمكن الإتصال به الآن؟؟،،، هدا وجهه ألعن من وجه تيس حالق كابوريا،،، والا الحبوب اللي طالعة فيه كأنها سلسلة جبال عسير،،، والا فمه اللي كأنه حاملة طائرات من الذبان اللي بيحوم حوالينه،،، وأسنانه كان عاضض على بكت سجاير مفتوح،،،والاقفاه اللي كأنه مستعمرة صراصير،،، والا شعره اللي كأنه رواسب مغارة جعيتا،،، يا شيخة حلي عني إنتي وخلفتك اللي تقرف".
كان كلام جدي عني كافي ليقضي على ما تبقى من كرامتي،،، أنا كنت عارف نفسي مو حلو،،، بس مو للدرجة هادي،،،
لكن لأ،،، أنا لازم أوضع حد لمأسآتي،،، لازم أكون شخص إيجابي وعندي إرادة،،، لازم أشوف حل لمشكلة جمالي،،،
قررت أبطل شيشة،،، وأسوي ريجيم،،، وأتنازل عن مبادئي وأتروش،،، وأسافر لبيروت،،، وأروح أسوي عمليات تجميل ونيو لوك عند هادولاكا اللي يشتغلوا مع السوبرستار،،، وأرجع وأغيظ كل العرايس اللي رفضوني زمان،،، وأثبت لجدي،،، إن أهم شي الأخلاق.
وجهزت نفسي،،، وبعت الشرايط حقت البلاي ستيشن،،، وأجرت التسعاوي حقي للمراسم الملكية،،، ونصبت على عيال الحارة ولميت منهم خمسين ريال،،، ولميت كل عوايزي وهدومي في زنبيل،،، وما بقي إلا أقول،،،
سلام يا بيروت،،، إما الجمال التام،،، أو الموت الزؤام.
نهاية الجزء الأول)
كيف يكتشف قيثارة الشرق أنه ضايع؟؟ وضاع عن إيش بالزبط؟؟
ماهي المفاجأة التي تنتظره في أرض الشتات؟؟
ماهي الطريقة العجيبة التي يتمكن فيها قيثارة من العودة للوطن؟؟
هل سيتمكن قيثارة من تعديل سحنته ليكون جميلاً؟؟
هذا ما ستعرفونه في الجزء الثاني من القصة،،، قريباً إن شاء الله،،، حسب التساهيل.
رد مع اقتباس
