[poem=font="Simplified Arabic,5,purple,bold,normal" bkcolor="transparent" bkimage="" border="none,4," type=2 line=0 align=center use=ex num="0,black"]
أبشتهر غصبٍ عن خشوم الأنذال=والله ما قد كدرّوا يوم بالي
أبشتهر ما دامني بنت رجّال=والله في تجريحهم ما أبالي
ما عندهم ألا تفاهات وأقوال=أجسام ناسٍ لكن العقل خالي
واجهت في دربي سخافات عذّال=يبغون ينهون الشعر من خيالي
إن كانهم سبعة عشر فيهم هبال=أنا أبحرقهم وأزوّد هبالي
وأقول أنا جهّال جهّال جهّال=وإن كان ما يدرون قلبي شمالي
وأغيظهم وأهدم لهم كل الآمال=اللي بنوها في مجرّة مجالي
وأمشي على فالي مع الناس واختال=وأسجّل الأشعار ويطيب فالي
شّيدت لي في قمة المجد تمثال=يبقى على مر الزمن والليالي
تكبر عليه أجيال ويعلّم أجيال=ويشغل خيال اللي من الهم سالي
وإن كانها بالعم أو سيرة الخال=ترى الطنايا هم عمامي خوالي
هم يحسبون إني لهم ( لعبة أطفال )=يا ويل حالي بس يا ويل حالي
كم ناشبوني في المعاني والأمثال=والشعر شعري والقصايد حلالي
ما عاد باقي ألا أعبّر هالأشكال=بدري عليهم يفرحون بزوالي
ما حصلوا يمّي ولا ربع مدخال=بنتٍ وأشارك بالقصيد المثالي
ثوب وشنب وشماغ مع رزّة عقال=ورشّة من العطر الجديد الرجالي
وألا الحقيقة كلها أزوال فأزوال=أنا بنيّة واستلمهم لحالي !!
على حسابي ما يصيرون أبطال =بوطا عليهم وارفع الراس عالي
ما هم حلايا الزير أو عنتر الخال=وما هم بعد مثل أبو زيد الهلالي
ولا لهم في ساحة العزّ مثقال=رخيص مبداهم ولا هوب غالي
لا من كتبت يجيهم الشعر زلزال=أرعبتهم ألين خافوا ظلالي
وإن عاودوا الحيلة مع الوقت باحتال=وأقول يا جنّ القصايد تعالي
( النايفة ) ما خافت ظروف وأهوال=ولا هزّها اللي من الخلايق يلالي[/poem]