[poem=font=",6,,normal,normal" bkcolor="transparent" bkimage="" border="none,4," type=2 line=0 align=center use=ex num="0,black""]
عظم الله أجرك وأحسن الله عزاك = مات نبض المشاعر والعوض بالقصيد
قبر ( حبي وحبك ) .. شف مكانه هناك = ما بقى له وريث .. وما بكى له حفيد
ضاع عمري وانا اللي في رجاوي لقاك = قلت ابنعي فراقك وابتدي من جديد
أيه اببعد ما دام القرب منّك هلاك = ما عليّه خطر لو عشت عمري وحيد
كنت اداري جروحي .. واتلمّس رضاك = وأنت تفرح بجرحي .. عندك الجرح عيد
كنت ذايب معك وأجيب عذر لجفاك = وأنت قلبك مع الأشواق كنه حديد
تطلب اللي تبي واقول فالحال جاك = في عيوني وقلبي فاتح ن لك رصيد
شفت نفسك علي وأنا اتنفّس هواك = كل ماجيت يمّك شفت هجرك يزيد
بترك أحلامي اللي عشت فيها معاك = وارسل الهمّ في صندوق ساعي البريد
لو ذبحني الوله والله ما امشي وراك =يفتح الله علينا والكلام الأكيد
قالت الناس قبلي : (( خل ماك فسماك ))= ما به جروح تذبح .. مثل جرح الوريد
انتهينا وهذي هي نهاية قساك= من نتيجة عنادك .. صار راسي عنيد
لا تفكّر تدوّر في خفوقي غلاك = ولا تحاول تبادلني الغلا من بعيد
ولا تحاول تجيني تعتذر عن خطاك = أنت عذبت روحي والعذر ما يفيد
[/poem]