قبل لا يبدا الكورس الثاني ابيكم بكلمه راس

🌀..السلآم ع ـليگم..🌀*

شلونكم طالبات الكويت اشتقت لكم > الزبده

بما انه قرب بدايه الكورس الثانيه(حقيقه مؤلمه)
بس لازم نتقبلها بشجاعه >عفوا اختي داشه معركه؟؟!!!*

هذا جدول سويته لنفسي حق هالكورس وان شاء الله يجيب نتيجه وفيه بعض الشغلات التزمت فيها بالكورس الاول و ماشاء الله جايبه نسبه 91٪ و ناويه اجيب 96٪ هالكورس*

ايه لا تطالعوني جذي صج يعني الشاطرات مو احسن منا ليش ماعندنا عقل ؟*
بنات اي وحده تقدر تصير شاطره لاتقولون مستحيل مافي مستحيل عودي نفسج دايما كلما تتكيسلين قولي انا قدها مافي شي مستحيل شجعي نفسج ترا مو عيب ولا حرام ومو اذا شي مافهمتيه تطنشين الدرس كله وانا ماافهم وحاله نفسيه حاولي تفهمين مره مرتين واسالي المدرسه عادي مافيها شي شوفو البنات الي نسبهم عاليه يذبحون الابلات بالاسئله اي شي مايفهمونه يسألون لازم تغيرون نظامكم عشان تغيرون درجاتكم ولا نفس المشكله كل سنه ماراح تخلصون ..

قرقت وايد صح

المهم نبدا بالجدول وان شاء الله يكون بسيط وسهل و نشجع بعضنا عليه لازم نوصل للهدف لاااااازم ظروووووري هالكورس باذن الله يا فوق ال90٪ يا بلاها .. حتى لو عمرج ما جبتيها راح تجيبينها هالمره بس اقري الموضوع كله و سجلي هالخطوات مو بدفتر لا لا اعرفكم بعد ماراح تبطلونه خير شر سجلوه بمكان دايما تمسكونه مثل التليفون الايباد اللاب توب ... وطبقوا الخطوات حرفيا وحتى لو تكيسلتي عن خطوه يوم يومين مو تتركينها لا ارجعي وحاولي تطبقينها لين تتعودين وراح يكون نجاحج على ظمانتي ..


جدول الدراسه للكورس الثاني:-

1-اول شي ظبطوا نومكم وهو اهم شي ناموا من الساعه 9 او 10 وقوموا 5 او 6
صدقوني هالخطوه اهم شي وبتريحكم حيل وبتخليكم مصحصحين عدل بالمدرسه مو عيونكم مسكره ونايمين بنص الدرس يطق الجرس تقولون شسالفه وتتثاوبون وحالتكم حاله ..

2-الريوق: لاتروحون المدرسه بدون ريوق ابدا لاتفكرون ولا تحلمون بهالشي لانه راح تفكرون بالاكل وتنسون ام الدرس حتى لو ما تفكرون بالاكل تركيزكم راح يقل وهالشي ابدا ماراح يفيدكم خصوصا الحصص الاولى تكون ثقيله نفس الحبيب الرياضيات او العلوم والانجليزي يبوووووي .. و حتى لو صحيتي متاخره الله يخلي صمون جبن او توست بالنوتيلا مع حليب او عصير فريش شحلاته..
و تكرموا واكلو شي صحي مثل الجزر او البرتقال او التفاح اي شي تحسونه خفيف عليكم ..

3-تحظير للدروس قبل دراستها*
عاد هذي اهم شي حضري حتى لو تحظير سريع يعني تقرين الدرس او اذا فاضيه حددي النقاط المهمه الي فيه سوي مخططات وجداول وحاولي تفهمين الاشياء الي مو فاهمتها بحيث انه لما تدشين الحصه مو يكون حالج حال الدرج صاااامت ولا كلمه عالاقل تكونين فاهمه شسالفه و منها يسهل عليج الفهم و عشان تشاركين بالحصه بنات المشاركه بالحصه عليها درجات حرام تضيعون هالدرجات البسيطه ترا درجه فوق درجه تفيدج يكفينا الامتحانات تنقص من درجاتنا وايد و السلووك عليه درجه يعني التزمي بالهدوء لين تخلص الحصه بس بعدين اقلبي الصف جلسه وناسه بكفيج عادي مو علبونه الابله موعصبيه تتمصخرين ترا درجاتج بين ايدينها لاتقولين يخسي انتي الخسرانه هذي درجاتج مو درجاتها ..

4-الانتباه للشرح بالحصه*
هذا مهمممم حيل بنات اذا انتبهتي راح تفهمين واذا فهمتي راح يكون كل شي سهل عليج بالدروس القادمه اهم شي (القادمه) لوول حتى لو جاج امتحان مفاجئ لا سمح الله او كنتي غايبه ماتدرين عنه او في بعض الابلات قبل لا يبدون حصتهم يراجعون مراجعه سريعه عالدرس الي قبله تكونين فاهمه هالشغله وتحلينها بصدر رحب بدون لا تحتاجين تدرسينها او تغشين ..

5-مراجعه وحفظ الدروس بعد دراستها
هذي الخطوه اللي الاغلب يتجاهلها ومايعرف شكثر قيمتها واهميتها الا لما يجي وقت الامتحان تفتحين حلجج شسالفه متى اخذنا هذا يووووه موقادره الحق ادرس المنهج طويل صعب .. تدرون انه لو ماسويتو هالخطوه جنكم ماسويتوا اي شي لانه المعلومه بعد ما تحظرينها وتفهمينها تحسينها سهله عليج لكن ان ما راجعتي عليها لما تردين البيت ماراح تثبت بمخج وراح تنسينها ولاجنج تعبتي لين دشت مخج .. فاحذركم يابنات هالخطوه حيييل مهمه وماتاخذ منكم الا وقت بسيييط جدا .. قبل لا تحظرين حق الدرس الجاي راجعيها وبعدها ابدي تحظير وبسسس..

6-عدم الغياب الا في ظروره
الموضه العجيبه بين البنات اليوم مافيه شي مهم بغيب .. ولا جنه وراج شي ولما تجي اليوم الثاني الوقت كله يضيع بالنقل .. بنات لا تغيبون الا يكون شي ظروري لا سمح الله مريضه ولا شي الله يكافيكم الشر ويبعد عنكم الامراض .. ماتدرين يمكن معلومات مهمه تنقال بهاليوم وانتي ماتدرين شسالفه وشلون تفهمين الشرح وتراجعين وانتي غايبه لاتقولين اجي المدرسه تشرحلي ثاني يوم او اجيب لي مدرس جذي راح يتكود عليج كل شي وبتحسين انج مو فاهمه شي وماتقدرين تلحقين وتتعبين وتملين وتخرب كل السالفه ..

7-احرص على التسميع و تسليم الدفاتر وغيرها اول باول لعدم تراكم الاشياء علي ..
بنات كلنا مسلمين ولله الحمد يعني مايصير انه ننزل باسهل ماده وهي القرآن الكريم هالماده حاولي انج تجيبين فيها الدرجه الكامله وهي سهله شنو يبي لها .. اي آيه تعطيج اياها الابله واهي تقرا انتبهي عالتجويد ولما ترجعين البيت على طول احفظيها وسمعيها لها ثاني يوم او اقرب فرصه لج وبجذي مايجي التسميع الا وانتي مخلصه عمرج وجاهزه حق كل شي و مبروك عليج الدرجه الكامله و الدفاتر بنات ظروري تكون كامله غبتي او ماكنتي موجوده بالحصه لظرف ما لاسمح الله كمليه وزينيه عشان انتي اصلا يكون لج نفس وانتي تدرسين و الكتب بعد لازم يكون كل شي عندج مرتب وكامل و استغلي هالدرجات البسيطه عشان تنفعج بالشهاده ماتدرين يكون بينج وبين ال90٪ درجه ولا درجتين ساعتها تتحسفين وتقولين ياليتني كملت واخذت الدرجه ..

8-الحرص على احظار الادوات كامله وعدم ضياعها..
بنات عشان لا تضيعون وقتكم فلانه عطيني صمغ فلانه ابي كوركتر عطيني وردي ماعندي يووو نسيت مقلمتي بالبيت مادري وين اختفى هالقلم انا عطيت وحده مسطرتي بس مادري منو هي عشان تفتكون من كل هالحوسه ومو كل اسبوع رايحين السوق عشان نشتري مسطره ولا برايه حافظوا على اغراضكم انا مااقول لاتعطون رفيجاتكم بالعكس هذا تعاون حلو بس انتبهي انتي منو عطيتي عشان بعد الحصه تاخذينه منها لانه يمكن البنت نست او شي تكونين انتي متذكره بالنهايه هذي اغراضج يعني محد راح يهتم فيها غيرج ورتبي جنطتج من اول ماتخلصين من الدراسه عشان مو الصبح تقعدين تدورين او تنقصين علامات عشان ناسيه دفتر او كتاب او تاخذين كل شوي من البنات عشان ناسيه المقلمه ..

9-اضع قفل للخزانه و اضع فيها المواد الغير مهمه وملابس الرياضه و البالطو وغير ذلك لتخفيف ثقل الجنطه..
بنات مادري اذا مدارسكم نفس مدرستي بالنهايه كل مدرسه تختلف عن الثانيه بس اللي متوفره عندهم هالخزانات حطي لخزانتج قفل وحطي فيها المواد الي غير اساسيه او شي ماتحتاجين تاخذينه معاج البيت و ملابس الرياضه وجوتيج تكرمون وشغلج كله الي تحتاجينه ومو لازم تاخذينه معاج البيت حطيه هناك ولما يجي وقته اخذيه عشان الجنطه تكون خفيفه وماتكسر ظهوركم لازم بعد احنا بنات ناعمات نعاني من هالمشكله > اشطح هالنعومه..

10-اكتب كل ماهو مهم في المواد بدفتر خاص لعدم نسيان شيء..
بنات حطوا لكم دفتر كبير حق الاشياء المهمه لماده معينه عشان لما يجي وقت الامتحان تكون جدام عيونكم او مثل مخلص شامل للدرس وتفكون نفسكم من التلخيص واستعينوا بالمذكرات اذا تبون والي تجيها مدرسه اخذي منها ملخصات عشان تفيدج وقت الامتحان وماتطوفج لا معلومه صغيره ولا كبيره الا وهي موجوده عندج..

11-اضع نوته لكتابه الواجبات والطلبات المهمه ومواعيد الامتحانات لعدم نسيان شيء..
هالمعلومه حيل مفيده عشان ماتنسون شي يعني بعد ماتخلص الحصه الابلات يعطونكم موعد حق امتحان او واجب بصفحه معينه او طالبين منكم شي تجيبونه عشان ماتنسون اكتبوه بهالنوته ولما ترجعون البيت افتحوها وشوفو شنو المطلوب منكم ..

12-محاوله حل الواجبات بمجهودي ..
هالنقطه مهمه يعني بالنهايه هذا الواجب مو بس عشان الابله تشوفه فيه واجبات تفيدج حق الدروس او تسهل عليج مراجعه الدرس حاولوا مجرد محاوله انكم تحلونها بروحكم بدون لا ترجعون للمذكره لانه بالامتحان ماراح تجي المذكره تساعدكم ..*

13-محاوله اكتساب درجات البسيطه كـ السلوك والمشاركه والدفاتر الكامله والتسميعات ودرجات المواد السهله للحصول على اعلى الدرجات..
النقطه مفهومه وواضحه ماتحتاج شرح وركزت عليها باكثر من خطوه بالي فوق لاتستهينون فيها استغلو اي درجه ترفع مستواكم الدراسي..

14-عمل ملف للاوراق المهمه لعدم ضياعها ..
هذي اخر نقطه ومهمه حيل بالحصص فيه ابلات مايقصرون يعطونكم مراجعات تقاويم اسئله مهمه بالاوراق عشان ماتنسونها حطوها بملف خاص وارجعوا لها وقت الحاجه..

وخصصوا لكم يوم بالاسبوع حق الماده الي تحتاج تقويه مثل الانجليزي حاولوا عشان ماتسقطون باي ماده وتكون سهله عليكم..

*
وبالنهايه اتمنى لي ولكم النجاح وترا الخطوات حيل سهله بس المطلوب وقت عشان تتعودون عليها ..


احبكم مع السلامه ^_^