[glint]كل عام وانت الحب يبه [/glint]
رغم اني مستاحشه لحالي..ماغير جنبي غرابيل احط حرتي به..واطلع من غرابيل وانا طفشانه واخلاقي تجاريه
وماسكه خط مع الزهق ..واطلع على الشارع العام الا بوجهي خال بالكامري جالس يفحط بغى يقحصني
بس تفلت عليه وقلت رح يا ولد الطراره هلك ما ربوك وهاتك يا طردي وراه الين مسكته من خشمه وقلت له ان عودتها مره ثانيه ما فيه الا الكعب يمحط بخشتك يا املحيكا ((ماسكه خط بالسب))
وابليس ما غير يهوجس فوق راسي يجرني للخطيئه<<حقيقه قناة المجد نورت عقولنا ..بس ما عليكم ماخذه احتياطي .ماده لي سلك السخانه كل ما قرب جنبي كهربته ولعنت جدانه ..اغرب عن وجهي قبحك الله الله يلعنك ((ماخذه حريتي باللعن لانه تجوز اللعنه عليه))
طفيت الكمبيوتر وجلست اناظر بساعة يدي وتدق على الساعه تسع..((ساعة يدي خراشه وتستعمل لمصالح اخرى))وتقول لي قومي احتفلي يالطخمه بعيد الحب..كل خوياتك مع اخوياؤهم احتفلوا الا انتي يالمتينه قلت مين احتفل معه ما عندي حد احبه ..عشان احتفل ..بعدين ما عندنا شي اسمه عيد الحب لكن بيني وبين نفسي قمت اقلب الفكره براسي . يا بنت وش ناقصك عن اللي يحتفلون ما هم احسن منك يالمتينه قلت ما فيه الا احتفل لحالي ..وبحالي ..قمت وجبت شمعه حمره من المطبخ كانت امي تكوينا اذا قلنا كلام مو حلو وأخذت لمبه من صندوق العده حق ابوي ولزقتها بلزقه حمره عشان تعطي ضوء خطير..ودخلت غرفة الشغاله كانت مسويه ورده حمره برسالتها حق رفيق زوجها واخذتها وجمعتهم .. وصبيت لي ميرندا بنكهة الشطه عشان يسوي حراره بالجو وجبت فش فاش لأن لونه احمر ..وحطيت لي الروج السحري لون احمر اللي من براا اخضر لو تحطه العبده ببرطمهاما يروح الا بعد سنه ..وصبغت براطمي به.اخذت لي مبخر وحطيت به ملح عشان تطلع بخره كثيره وفرشت طرحتي تحتي وطفيت اللمبات عشان ابدأ مراسيم الاحتفال بعيدالحب شبيت الشمعه وقفتها بين اصابع رجولي ووحده فوق راسي عشان تتضح الرؤية وجلست انفخ واتفل عليها ويطلع دخان داخل خشتي واشفطه بشهيق ويطلع لي على شكل قلوب وعشت جو ابن كلب مع نفسي وساعه اقوم وادور حول طرحتي اللي فرشتها واتنكس وانا مسبله عيوني ..بدون لأحس طمرت ابوس في الجدرانوتنطبع الجدران بلون الدماء ... متحمسه مع الجو الي خلقته بذي الليله
وتطيح الشمعه ويشب راسي .ولا حد حولي واشم ريحة حسحسه وابي اصارخ خفت يجيني ابوي ويمحط نعاله بجثتي قمت اناقز من الحراره على كبر الغرفه ..مدري وش اسوي ...وبحركه سريعه رحت للحمام ..وبطحت جثتي على جال البانيو لمن طفت الحريقه.. هلي ساعتها سمعوا دبكه وربكه بغرفتي كنه سباق الهجن .وحسوا بهزه ارضيه بقوة 2,55 في الدقيقه بالبيت..يجيني ابوي ويفتح الباب بسرعه ويقول يالناقه وراك بديتي السباق وما قلتي لنا ..وينتبه للمبه الي سرقتها من صندوق العده ويمسكني من شوشتي المحترقه ويطيح في يده حسحاس شعري .ويناظرالشعر ويناظرني ..ابتسمت له وقلت ((هابي فالنتيان يبه كل عام وانت الحب ))عرف اني مسويه مراسيم عيد الحب وجتني عقوبه واحترقت..((كان بيلعن وجهي من الظرب))
بس بحكم المعرفه اللي بيننا عطاني فرصه..قلت له يبى انت ذيب وبطل خل عنك حركات الخنبقه واجلس فهمني وش معنى عيد الحب وليه تحتفل انت وامي به((شكلي فضحته))تفل بوجهي وقال خلي عنك قلة الحيا وانا ابوتس تراني محترمتس عشانتس الكبيره واسمعي كلامي عيب عابت عليتس حنوكتس يا بقره من قال لك ان حنا نحتفل بعيد الحب اصلا كل يوم انا وامك عندنا عيد((والله ماهو هين ابوي)) لا تفضحينا تالي عمرنا بين الجيران الحين يقولون عندنا بنت لحجيه
احداث القصة خياليه ومالي دخل اذا تطابقت في الاشخاص الحقيقيين
رساله
<<تغيير عن ما يستفاد
ـ يا ناس بلا حركات مالها داعي انتم تعرفون ان عيد الحب حرام واصلا ما عندنا الا عيدين بالسنه
ـ اللي عندهم بنات وعيال انتبهوا لهم ما يطيحون في الحرام ويقلدون الغرب بالحركات اللي ما هي حلوه
ـ ((لتتبعن سنن من كان قبلكم حذو القذة بالقذه حتى لو دخلوا جحر ضب لدخلتموه))
كما قال رسول الله صلى الله عليه وسلم.