ৣ♥الفلسفــــــهৣ♥

[صمت الوله]

وقفت واسأل من عبر وش هي صفات الفيلسوف
وهل كلامه فلسفـه .. وإلا سكوته فلسفه !


وهل ظهوره ع الملا حكمة وهل بعده خسوف
انا اخبر اللي ينحني للعلم ما يأفل سفه


وإذا نظر للشمس لم تكسف وفي عينه كسوف
وإذا وقف بين القمر والشمس قالوا سفسفه


وقفت حتى انه غشاني اليأس وأضناني الوقوف
عود جلست ومن جلس وأزداد همه وقفه


ومربي شيخ كبير الـسن ع الدنيا يطوف
حتى ولو ماتعرفه تستـشعر إنك تعرفه


قريت في عينه قطـوف وفي تجاعيده قطوف
وفي إرتخاء صوته ثمـر ويحثك إنك تقطفه


مما قريت إن الزمن جبار وأيامه صلوف
أيام تضحك من سـعه وأيام دمعك تذرفة


مما قريت إن الذي بالحيل ع الدنيا شغوف
(: يقول أبعسفها وهي لا ميل يوم تعسفة


وقال لي لولا الشتاء لم يغزلون الناس صوف
واللي يبي يشرب من الماء العذب يصنع مغرفه


الليل مايستر خبر والصبح مايحفظ حصوف
والغيم مايضمن مطر والسيف ما يلجم شفه


مابين دفات الكتب نفس الورق نفس الحروف
لكن ترتيب الحروف يميز أهل المـعرفة


لربما بعض العقول تموت من برد الكهوف
وبعضها يفقد صوابه من حـرارة الأرصفه


ماكل من ياقف على المنبر ولوعرف عروف
تصفيقنا للجاهل اللي مايعرف عرفـة


واللي بلا ظهر قوي تتعب عضوده والكتوف
واللي يبي يرقى على كتف غريب كتفه


ونقول هذولا اقوياء ونقول هذولا ضعوف
واللي يطبل للقوي يزداد ضعف وأضعفه


والقصر إذا سأسه ردي ماتنفعه مثل السقوف
وإن كان له سأس قـوي تأمن من الدهر أسقفة


في كل مايفنى عـبر ولكل مايفنى خلوف
لو كان للفاني بقى لم نعرفـه اللي يخلفه


نشوف كل عيوبنا وندٌعـي إنا مانشوف
وغيرنا لو زل مره قبل ياقف ننسفه


تبقى كتبنا ع الـرفوف حتى شكت منها الرفوف
حتى تذوب وتسمع لباقي البقايا خشرفـه


ونمتدح فـ أخبارنا وأشعرانا حـد السيوف
والموت في حـد السيوف ولا أحد يستلطفة


نشكي على الظرف الظروف حتى شكت منا الظروف
وكل ما وافق هوانا لـو خطأ نستظرفـة


نحمل قلوب تشتكي منا على بيض الكفوف
واللي سكب دمعه على الماء المنسكب ماكفكفة


وكم تجمعنا كشوف وكم تفرقنا كشوف
مامن جديد يجمع قلوب البـشر نستكشفة


نصتف إذا أبعدنا بعيد عن مواطنا صفوف
وإذا رجعنا للوطن نكره نظام الصفصفه


وكلنا حاتم متى ألفونا هل المغنم ضيوف
وإذا لفانا معسر مسكين مـحدٍ ضيفه


وكلنا أعني الرجال نفز إذا مرت هنوف
كل يقول أنا لها انا الذي مالي صفه


حتى الذي وقف بعيد وقال انا عنها عزوف
والله لو تطرق على لـحن الوصال إن يعزفه


إلا الذي يخشى من المولى وفي عينيه خوف
هنيء قلبٍ يرعوي ويخاف مما خوفـه


هذي إجتهاداتي وحكمة ذلك الشيخ العطوف
خذ من عبرنا ماتيسر وأحذف اللي تحذفـه


هذا وانا والله ما أكرة مثل طبع الفيلسوف
وكل خوفي لا تقولون إن شعـري فلسفة

[>>متعبه عسآفهآ<<]

انتقاء جميل

سلم لنا الذوق

[أنـ الذكريات ـين]

طويلة لكنها جميلة..

سلمتـ صمت الوله..


لا حُرمنا جميل انتقاءاتكـ..



دمتـِ بخير ..

تحيتيـ