القصة بدت لما طقت تسبد أمي وابوي مني (مدري وش سويت لهم أنا )
في يوم من الأيام أتصل صديق قديم لأبوي كان عايش في بريطانيا من زمان
وشكا له أبوي مني (مع أني للحين مدري وش سويت له)
فأقترح عليه صديقه أني أجي لبريطانيا كم شهر أتعلم لغة ومنها أنزلع عن وجه أبوي (مع أني مدري وش سويت له)
رحت لبريطانيا وكان أبوي حاجز لي درجة أولى (ألا قولي مالقى سياحيه وماهو ب منتظر لين يفضى لتس مكان فيها )
ركبت الطيارة ومن الوناسه أني اول مرة أركب طيارة ماغير بس أتلفت
لين أفترت رقبتي وبلشوا فيني مالقوا فكس بالطيارة
مليت من القعدة ومير أقوم أدوج في عُرصات وجُنبات الطيارة (أتحدى تطالبني بحقوق النشر ياسحر الكلام )
مريت على المضيفات أسألهن من اللي عليها التقليط اليوم يمكن تبي عونة وألا شيء
ثمين مريت على الكابتن وسألته بأي محطة بيوقف علشان أبي دورة المياة ؟؟
قال الكابتن للمضيفة: ضفيها عن وجهي لأ اللحين أخطف الطيارة
وأدور أي عمارة طويله وأصدمها (حرام عليه ماسويت له شيء)
كملت دوجاني ومير أروح لمكان مافيه ألا واحد مزبطر (أتحداكم تعرفون معناها) بلحاله
بيني وبينكم رحمته المسافه بعيدة ومامعه أحد يوسع صدره
ومير ألبط بجنبه فز الرجال وقال:وش صار مطب هوائي وألا هبوط مفاجىء
(حرام عليه ماسويت له شيء)
قعدت أسولف معه وسالفةً تجر سالفة ومير أعرف أنه أحد مستشاري الملكة اليزابيث
وأنه دايرً العالم يدور بنت ذات مواصفات خاصة علشان الملكة تبي لها بنيه تقوم بها تالي عمرها(حشا ذي مب ملكة ذي جدتي )
قلت أيه والله جاك يامهنا ماتمنى
بلا دراسة بلا كلام فاضي أروح أقعد مع الملكة أوسع صدري وأضيق صدرها
أُعجب جورج <--------طيحت الميانه فيني وبخفة دمي (تبطين ياللبخه )
قال: بأخذتس معي بس أياني وأياتس تفشليني
قلت : أبد ماعليك
وصلنا بريطانيا وبالتحديد مطار هيثرو بلندن هذا اللي أذكره لأني من وصلت والعالم محوطيني من كل مكان (تعتيم أعلامي)
وخم بط وأنا بقصر بكنجهام ومير تقابلني أمي الملكة (خلاص صارت أمي)
وخمخمة ولملمه اللي يجهلها يقول صدز أني بنتها ومن سنة طشي وأمطري ماشافتني
والله ياهالبريطانين عندهم حنان بزود ليت من أخذ منها كيلو ويكزه لأبوي ( مع أني للحين ماأكتشفت وش سويت له)
قلت لها : ممكن دورة المياة لأن الكابتن ماوقف أبد في أي محطة
قالت:خلاص بأتخذ الأجراء اللازم معاه
رحت مع حدا بناتها ( كنت أحسب أنها بنتها وأثرها الخدامه)
ولما دخلت الحمام وأنتم بالكرامة ومير تجي تدخل معي
قلت لها خير؟؟
ماردت علي
قلت لها: اللحين من صغر حمامكم كان حطيتوا بدال هالحمام اللي كبر
قريح عشر حمامات بدال ماتتزاحمون على حمام واحد
<-----------فاهمه غلط الأخت
ولما شفتها مصممة تدخل معي قلت: مير حسدً لتس مانيب داخله الحمام
ودتني لغرفتي أأأأأأأأأأأأأأأأأأههههههه هأأأأأأأأأأأأأأأأأأأأأي <--------شهقه
وش ذيك الغرفة من قال غرفة قولوا ديرة شوي وتصير البحرين
تصدقون فيها مسبح أكبر من البرتسه اللي في مزرعة عمي
وألا دولاب الثياب لعنبوا أبليسهم مب دولاب قولوا صحارى والمملكة والفيصليه كلهن متجمعات بذاك الدولاب
ومن الفرحة قمت أنفش بذيك الخلاقين والمقاطع (جمع مقطع أي فستان بمصطلح جدة أمي )
ومير تجي النشبه اللي قبل شوي الخدامه
قالت: أرتاحي سيدتي علشان تقابلين أمتس
أنا سمعت سيدتي من هنا ويرتفع رأسي عن ألأرض ويصقع بالسما
وشمخت بكل كبرياء وقلت لها :
قولي لها مب فاضيه <-------أجل هي أمتس اللي أنتي خابرة
قالت: الملكة أمتس تبي تكحل عيونها بشوفتس
قلت: لافضيت أجي عاد لاتطولينها أذلفي
ماذلفت
قالت: أنا ياسيدتي ماأطلع من غرفتس عديني مب موجودة خوذي راحتس
أنا: والله مابقي ألا هي
زعلت ورحت وخمدت بفراشي ولما قمت لقيتها فوق رأسي ومولمتن لي الحمام تروشت ولبست ذاك الثوب المكنفش
قلت: ليه حنا معزومين على عرس
قالت: لا بس هذي هي التقاليد الملكيه
أنا: والله وناسه (مب أبوي أموت ماعطني أفصل ثياب للعروس)
قلت : وير أز أمي <--------بديت أتعلم أنقلش
قالت: تحتريتس في البهو على التي فايف كلوك
(أنا سكت قلت أخاف أسألها وش ذا تقول وش هالسبهه)
مشينا العصر وماوصلنا عند أمي ألا المسيان
والله ياهي مسافة بين غرفتي وبين البهو
تدرون وشو التي فايف كلوك
شاهي عقب العصر مثلنا بس الفرق بيننا
أنهم يغمسون فيه بسكوت وحنا نلب معه كراث
دارت الأيام وتعلقت فيني أمي الملكة
وصرت أتحكم على كيفي وأدبر وأعبر بالقصر
حتى أبوي فيليب ماعطيته وجه لأن أمي أصلاً مزلبته
في يوم كنت أتغدى وكان فيها خادمة فوق رأسي ومير أعطيها قطعة خبزة
قالت أمي :ليه
قلت: علشان ماتنظلني
قالت: هذي شغلتها تخدمتس حبيبتي
ومير أتسلط كل شوي أطيح ملعقة وألا سكين وألاشوكة وأخليها تجيب غيرها
وفي المرة الأخيرة جت خادمه غيرها قلت وين ذيك
قلت : أنتحرت ياسيدتي (قالتها وهي ترتجف مدري ليه)
المهم من جيتي للقصر وهي كاثرةً عندهم
سالفة الأنتحارات والجلطات وأرتفاع نسبة الأستقالات
وأذا حققوا مع الأحياء منهم قالوا أنه أنا السبب (مدري وش أنا مسويه لهم)
هذا التاج حق أمي أكشخ فيه أذا رحت ألعب كيرم مع ألاميرات
هذي الماسه أهداني أياها أحد حكام العرب
مع أني كانت مخيسه في بيت أهلي مااحد عطاني شيء
في مرة كان عند أمي حفلة وعازمةً كبار شخصيات العالم طبعاً اللي كانوا ذو شأن مثل قربةً ماتشوف (جورباتشوف )
وبيل كلينتون وطقتهم لأني أكتشفت أن الدبرة كلها بيد توني بلير
وألا أميمتي مالها داعي أبد بالحكم ماغير طاقتن هالتاج وبس
قعدنا على مائدة الأحتفال <------
ومير يقعد بجنبي بيل كلينتون
نغزت أمي وعلمتها أني بغير مكاني لأن بيل كلينتون مغازلجي
قالت: عيب تخربين البرتوكول
تسلط علي بيل ماغير يناظرن
جريت كم أمي وعلمتها قالت : همن عاد خليه يناظر
أنا ماعجبني الوضع ومير أقعد أتحين فرصة قومته من مكانه
ولما قام يقول كلمته
سحبت الكرسي ولما جاء يقعد لبط بالأرض لبطة تستاهل عيونكم
تفشل الرجال وصار وجهه ألوان
قامت زوجته هيلاري وسحبته وخزتني بنظرة قويه
ومير أمد عصقولي وأخطرف لها أمي بذيك اللحظة أعتذرت للجمهور بأني تعبانه ولازم أروح أرقد
مع أني ماابي ألا العافيه
مدري ليه صرفتني