السلام عليكم يأهل الطبخ :)

[انسان صريح]

[ALIGN=CENTER]كيف حالكم وشخبار الطبخ وياكم

:)

بصراحة انا مستحي منكم ياراعيات الطبخ ...
( ماني عارف الموجودين عشان كذا حطيت صيغة الجمع )

هاذي اول مرة ادش فيها المطبخ ... والمفروض اجي اساعدكم بس مثلكم خابرين

محتاسين وحالتنا حالة . بس الحمدالله خلصنا وجينا نسير عليكم

:)

-------------------

اجل

ماشالله هذا مطبخ المنتدى

الله الله

على ريحة البصل والثوووم .. تصرع ياشيييييييخ

الله يقويكم ان شالله

اسمعوا ياأخواتي .. انا بصراحة جاي عشان تساعدوني

( ام المصلحة .. اثاري مسيارك مو لله )

لا والله من جد

انا توي متعلم الطبخ وحدي اعرف اسوي شاي مع الحليب

وطحت بطبخ الغدا والحمدالله بديت اتعلم اسوي لي رز بس بدون دجاج

لاني احرقه دايم بالاسبوع مرتين ..

فاكتفيت بطبخ الرز .. وانا اعتبره انجاز

اللي ابيه منكم يابنات

انا مدمن مكرونة اوكي .. وابي طبخة المكرونة بالبشميل

( الله يخلف عليك بس .. انت عدل طبخك بالرز وبعدين تفنن )

فياريت تعلموني المقادير وكذلك اذا فيه اشياء حلوة اقدر اتفنن بالطبخة زي مكرونة باللازانيا .. الخ .....:)

( ياشين اللي طموحه كبير وهو مو بقده )

الله لايهينكم

واعتبرو الطلب هذا اول مشاركة تشجيعية لكم

( طابت علومك عز الله )

يالله انتظر ردودكم لاني متحمس على الطبخ

اخوكم

انسان صريح

[/ALIGN]|290|

[أبوعبدالرحمن]

ههههههههههههههههههه

الله يالدنيا

توك امس تعطيني دروس في فن ترتيب البرامج في الملف المشهور :)

يلاا بعلمك أنا من خلال خبرتي البسيطة

1- تسلق المكرونه مع الماجي

2- تجيب لحم مفروم وتطبخه مع طماط وبصل وبهارات ( كشنة)

3- تخلي المكرونه نص استوى

4- تشيل المكرونة من فوق النار وتحطها في الثلاجة

5- تشغل سيارتك وتروح لأقرب مطعم وتشتري لك مكرونة بالبشاميل ( خمسه ريال بس )

6- إذا تزوجت طلع المكرونه من الثلاجة وخل المدام تكملها عنك :)


ابو حميد تبي الجد نسيت لا تلومني والله كنت خبرة فيها زمان

بس لا يهمك بيجيك اللي يشرح لك :)

[][*+عجــايب+*][]

أسفرت وأنورت


انسااااان صريح عندي؟؟؟؟ ووين في مطبخي؟؟؟؟


يا هلااااااااااا ومرحبااااااااااااااااا


ياخي مادامك دخلت عندنا ولا يهمك حتى لو كان أول دخول لك مصلحة

بس ان شاء الله بتكون الجايات أكثر من الرايحات

وانت مادامك عزوبي وطلبت ,,, ولايهمك >>> نحن في خدمة العزوبية


المهم يا الطيب بجيب لك طريقة المكرووونة اللي بالباشاميل ولايهمك

بس انتظر دقايق عشان أفتح دفتري الخاص بالطبخات وأجيبها لك

[][*+عجــايب+*][]

انسان صريح ,,, شرايك تاخذ هالطريقة تصبيرة ؟؟؟؟

لين أطلع لك طريقة سهلة للعزوبية ؟؟؟؟

لأني بصراحة ما لقيت عندي غير طرق لربات البيوت السنعات ,,


خذوا المقادير

علبه مكرونة سبا غيتي
2علبه جبنه تشدر صفراء
علبه قشطه
شويه زيت
2بيضه
ملح

الطريقة:
تسلق المكرونة وتصفى وتقلى بشويه زيت( لدواعي القرمشة) ثم تضاف الجبنه وتخفق البيضة مع القشطه وتضاف ثم توضع في الفرن حتى تتماسك في فرن متوسط وتترك 10 دقائق ثم تقطع ,,,


والف صحة وهنا


بس والله تراها شي ,,,

[الأميرة الناعمة]

و هذه طريقة ثانية


المقادير

نصف كيلو معكرونة والشكل حسب الرغبة

نصف كيلو لحم مفروم

بصلتين متوسطتي الحجم

نصف ملعقة طعام فلفل أسود مطحون

ملح

ملعقتي طعام زيت

عدد 6 كؤوس صلصة بيضاء

عدد 6 ملاعق طعام طحين أبيض - لعمل الصلصة البيضاء

عدد 6 كؤوس حليب سائل بارد - لعمل الصلصة البيضاء

عدد 6 ملاعق طعام سمن كريسكو - لعمل الصلصة البيضاء

طريقة عمل الباشميل - الصلصة البيضاء

يوضع الطحين مع السمن في قدر ويترك على نار هادئة لمدة 15 دقيقة

يضاف الحليب البارد مع التحريك و يقّلب باستمرار حتى يغلظ قوامه

يضاف إليه قليل من الملح والفلفل الأسود

طريقة عمل حشوة اللحم المفروم

يقطع البصل قطع صغيرة جداً ثم يوضع على النار حتى يحمر

يضاف اللحم المفروم ويلقب جيداً ثم يتبل بالملح والفلفل الأسود

يترك على النار لمدة 30 دقيقة

الطريقة عمل المعكرونة

تسلق المعكرونة في ماء به ملعقة شاي ملح وملعقتي طعام زيت لمدة 10 دقائق

ثم تصفى

تدهن صينية البايركس بالزيت ثم توضع طبقة من المعكرونة المسلوقة

يوضع كأسين من الباشميل ويوزع بانتظام على المعكرونة

تضاف حشوة اللحم المفروم وتوزع بإنتظام في الصينية

تضاف باقي المعكرونة المسلوقة وتوزع كالسابق

يضاف باقي الباشميل ويوزع بإنتظام

توضع في الفرن على حرارة 350 فهرنهيت أو175 مئوية حتى يحمر السطح

الخارجي تقريباً 45 دقيقة


حثووووووووووووووووثة يمي يمي

[][*+عجــايب+*][]

أقوووووووووووول حسحوووووسة

راعي ان الانساااان عزوووووبي

ركزي على هالنقطة ...

والله الرجال بيهون لما يشوف طول الطريقة اللي انتي جايبتها ,,,

بس الله يعطيك العافية حسحووووس ان شالله تعجبه عاد...

[انسان صريح]

[ALIGN=CENTER]السلام عليكم

ماشالله ماشالله .. والله عيني عليكم باردة

والف شكر على اللي بذلتووه .. والله وربي خجلان صراحة .. احرجتووني

يعطيكم الف عافية على الطبخات الحلوة

عشق ليل :

يعني انتظر حتى اتزوج واخليها تفتح الثلاجة ... اخاف تنصرع من ريحة المكرونة لان اخاف اطول ماأتزوج

يعطيك العافية على العموم وتحمست والله على بالي راح تشرح لي انت

لان ماودي احرج خواتي

عجايب :

الله يحيك اختي وتسلمين والله على ترحيبك ..والله وصفتك الاولى
مكرونة بالشيدر .. شييييي ويعطيك العافية

حساسة :

مشكوورة اختي وماقصرتي بس حطمتينا .. شكلك حاقدة علي بالتصاميم وجايه ترديها هنا .. الله لايذلنا وانتي عارفة ماني قد الطبخات الثقيلة هاذي .. فليش الله يهداك التحطيم هذا |198|

عمووووما مشكووورة اختي

للكل الله يعطيكم العافية وسلمتووووا من كل شر

اخوكم

انسان صريح

ملاحظة اذا فيه طبخات زيادة وجديدة .. الله لايهينكم ابيها بس تكون سهلة :)[/ALIGN]

[الأميرة الناعمة]

افا111111111111111111

انا احطم

لا والله بس جبت لك الطريقة الاساسية قلت يمكن تقدر تسويها |3|

والله لا القصد التحطيم او غيره

حثووووووووووووثة يمي يمي

[أمل عبدالعزيز]

سبحان الله ماشفت الموضوع ألا الحين 00

رحمك الله يانسنوس من طبخ رهبوووووووووووبة أحييييييييييييه بس لو تشوفنى فالمطبخ تموووووووت من روعة طبخي ياشيخ شو ف دامهم ردو فخلاص مالى مقعاد

بس مرة ثانية أنا باعلمك

بس على فكرة فيه طريقة مكرونة اسهل من هذى كلها

ياخي خذ أندومى بريال واسلقها بالقراشيع أللى تجي معهااااا وبالعاااااافية

على فكرة ترى عشق ليل ياشباب يسوى مرقوق خيالي وخصوصا يوم تلقى بعض شعر يده فى الرقة
سلااااااااااااااااااااااا اااام

[انسان صريح]

[ALIGN=CENTER]طيييب علميني الحين الوصفة .. كل الوصفات اللي جابووها حلوة وماقول فيها شيء

بس الى الان مصر على الباشميل وتكون بطريقة اسهل اذا فيه

واذا مافيه ( طرار ويتشرط ) جيبي لي اي شيء حلو وسهل ..( والله اني ماخذ راحتي )

او اقولك سويها انتي والبنات وارسلوها علي :)

يالله ورينا شطارتك الرهيبة

انتظرك

سي ياااااااااااا

اخوك
انسان صريح
-------------

الجملة هاذي خلتني اتفقع من الضحك :
ياخي خذ أندومى بريال واسلقها بالقراشيع أللى تجي معهااااا وبالعاااااافية ؟؟

الله يرجك يأم رهب
هههههههههههههه[/ALIGN]

[الرئيسة]

انسان صريح
السلام عليكم ورحمة الله وبركاته
انا بعلمك طريقة سهلة للبشميل بس ابغى اعرف البرنامج السويش
من وين اجي ليمه تعبت وانا أناضر الكمبيوتر مالقيت هو يتركب هو ينأكل
هو ايش قصته لا تقول هذا ماتعرف شي
المشكلة انا مااخذه قلك دورات ولا سمعت بها الشي
بس بصراحة شرحك رائع لكني ماعرفت وين السويش
علشان أبدأ في البنال
وصدقني إذا فهمتني انا راح أخليك أحسن شف في الشرقية
وماعليك في عجايب وحثاثة :D
................................
ولك تحياتي

[انسان صريح]

[ALIGN=CENTER]ههههههههههههه

اختي الرئيسة ... يعني الحين مانتي معلمتني . حتى اعلمك انا ؟؟

طيب من اللي طلب اول ؟؟؟ هاااااااااا

اوكي راح نجاوبك ونشوف انتي تجاوبينا ولا لا

بالنسبة لبرنامج السويش

عندك الرابط هذا فيه ان شالله كل اللي تبين تعرفيه [/ALIGN]
اضغطي هنا

[ALIGN=CENTER]يالله نشوف انتي تعلمينا الطبخ ولا لا ؟؟؟

تحياتي

انسان صريح[/ALIGN]

[الرئيسة]

ابشــــــــــــــــــــرك م حملت السويش

وعشان كذا خذا المقادير تبع البشاميل

المقادير

مكرونة اسباغتي
لحمة مفرومة
بصل
ماجي
حليب كامل الدسم السعودية سائل 3 كاسات
2 ملعقة جبنة سائلة
4 ملاعق دقيق
فلفل اسود

الطــــــــــــــــريقة

بعد ماأتعلم على السويش اكتب لك الطريقة



هههههههههههههههههههه

جزاك الله خير

[مفرح بن مناحي]

أخوي إنسان صريح

أنا مثلك مالي في الطبخ ,,,,

يمكن أسوي شاهي بس ,,,

غيره ما أفهم ,,,, لكن شف جب كل المقادير ( طماط ,, خيار ,,, مكرونة من جيرانكم ,, ملح بطعم السكر )

وأخلطها كلها ,, وعليك بالخفق يعني فر الطبخة فر ,, وبعدين اختر أنت بتاكلها وإلا بتقعد تناظر فيها :)

أخوك / سهم المنايا ( حريف الشاهي ) :)

[][*+عجــايب+*][]

هلا انسان صريح ,,,


في يوم من الأيام وأنا أحوس في المطبخ وأددور على شي أطبخه

فتحت دولاب المعلبات إلا وألاقي فيه

علبة خلطة من خلطات السلطانة >>>>> أسوي لها دعاية

المهم وألاقي مكتوب عليها

>>>>>>> خلطة الباشاميل <<<<<<<<<

والله وأقرا الطريقة اللي مكتوبة عليها لقيتها

مرررررررررررررة سهلة

وتصلح لك ,,,

قلت والله ما أخليها تعدي وأنا أم عجب

وجيتك طااااايرة أقول لك ,,,