السلام عليكم وتحية تقدير وولاء لغرابيل وروادها ..
اعتذر عن الغياب واطمع ان تتسعني رحابة صدوركم اخواني زملائي في هذا الصرح الشامخ
اعود بهذه القصيده المتواضعه التي اسندها على صديق لي عزيز واتمنى ان ترقى لمستوى ذائقتكم الشعريه :
[poem=font="Simplified Arabic,5,black,normal,normal" bkcolor="transparent" bkimage="" border="none,6,black" type=2 line=0 align=center use=ex num="0,black"]
لو كان تبعد مظاهيرك يابو ضافي=نرخص لك الغاليه والروح نصخيها
ترى الصداقه لباقه سرها خافي=تصعب على سوم بايعها وشاريها
خابرك وافي وانا من عادتي وافي=وما تنقضي صحبةٍ هذي مباديها
حيثك جزوم ٍ عزوم الحيل و سنافي=ذرب السجايا وعذب ٍ في معانيها
وما بيننا شِي كلافه أو تكلاّفي=ناخذ طوارف سوالفنا ونعطيها
وين انت واللي تعابيره تغطرافي؟=في لفتت الزوم مملوح ٍ تـثـنـِّـيها
العام عندك خبرهم يا ابن الاشرافي=واليوم اشوف الدّلي قِطعت عراويها
من دونهم حال يجي عشرين حذافي=أحدٍ يعلّي بها و أحدٍ يوطّيها
واستوحش اللي على الملواح ميلافي=أقفى مع هبّة الغربي يلاحيها
ما فيه عقلان في ضيعتْه يا كافي=عندي خبر يوم بانت لي مواريها
العشره اللي بلا منهاج تنعافي=مادام ذا سيرها ينعاف تاليها
لا عادها الله عدودٍ ميّها صافي=لا صار ماهي بـتروي شفّ ضاميها
واللي سعى في قفانا بالتزلاّفي=نفسه على هفّة الزلات حاديها
من ضعف عقله يشرِّك نوره الطافي=يكحل غمص عينه الرّمدا ويعميها
هرج القفا ما يدنّس ثوبي الضافي=وإلا المناقيد تحرق كبد راعيها
وانا على سلم أبوي ومذهب أسلافي=واهل العقول الصخيفه ما نجاريها
إن كان صاب العقول جنان وشعافي؟=ماني طبيب المجنن يوم اداويها
وإن كانها عوّدت لأحزاب واحلافي=نفسي على هضبة العليا مضرّيها
ما زحزحوني وانا من دون ميقافي=وإن ولّعوا فتنةٍ بالرجل نطفيها
دام السفينه لها دفّه و مجدافي=تبحر على الموج في تقدير واليها
وصّفت وصفٍ مفصّل كافي ٍ وافي=من دون ذكر الاسامي يا مسمّيها
قل له ترى ما حسبنا جلّ و صخافي=نسمع هروجه ولا كنّا بنوحيها
من جيز غيره وشفت اشكال واصنافي=وانا اكثر الناس لا ابغضها ولا اغليها
أسمع وأميّز واشوف إسفاف وإجحافي=واهل المحابيل ما ودّي نجازيها
لا صار ما للمعرفه حق وإنصافي=وشلون تِظهر مشاريهك و تبديها؟!
وانا أحمد الله خلي القلب متعافي=لو كان رجلي على الشطّات مشقيها
في سيرها لي تدابير وتصرَّافي=أقصر خطاها وبعض احيان مرخيها
ما اهزع ولا أهوي بها مع كل مهيافي=وإن طالت المرحله شوفي يقدِّيها
واخذ مع اهل الهوى زحف و تزحلافي=مرٍّ نصيب الهدف وامرار نخطيها
إن صاب ظني رعيت الوصل بـ اكنافي=وإن خاب كفّيت نفسي عن تمانيها
ما اودعت سرِّي معَ الادنى والاطرافي=والناس تخلف روابعها هقاويها
اللي وطى الملّة الحمرا وهو حافي=يصبر على جمرته لو كان واطيها
لا صار مابين متشفّي و حوّافي=ترصد بوادر عذاريبه و تحصيها
وجهة نظر صغتها بالوزن والقافي=وأرجو السموحه ليا بان الخطا فيها[/poem]