شاركوا معنا ..في (بدايتك على الأنتر نت)مواقف مضحكة

[الدندووووونه]

يووووه يافشفاشتي..

وربي مواقف لاتذكّرتها أموووت ضحك... أضحك على غباااائي....

لي عوده بإذن الله وأحكي لكم البلااوي والمواقف اللي صارت لي...

وحشتيييييني..

[أبوعبدالرحمن]

بقول لكم اليوم سالفتي مع النت والمعاناة اللي اعانيها فيه,,,,

بس افصلوا الاتصال اول


بدايتي في النت كانت يوم قررت فجأة اني ابيع الكيرم واشتري لي جهاز اقصاد

ونصحوني عيال حارتنا وقالوا هذي قفزة قوووووية اخاف تنصدم بالحضارة وتنقلب ويطلع الخطأ عليك مية بالمية

وقالوا شورنا عليك اشتر اتاري وبعدين بلايستيشن وبعدها طب في النت

بس قلت ماعلي شاريه شاريه ,,, ورحت طقيت لي جهاز بطئ جداً لو امشي على رجولي سبقته

وكان اول يوم لي في النت احوس في المستندات والاتصال شغال وماخذها مشاوير من سطح المكتب الى سلة المحذوفات إلى المستندات

لين طفشت ( بس كانت خمس ساعات مادريت عنها ) المهم اليوم الثاني زارني صديق عزيز وقال بدخلك شات وسولف انت مع الناس

وأنت واسلوبك قلت له يلااا وماقصر دخلني على الشات واخترت اسم ( دفني واطيح ) وعلمني كيف اكتب فيه ,,, وهبلت فيهم ذاك اليوم

كل كتاباتي س1 هـ1 ك1

وأنا في غمرة سعادتي قال لي واحد يادفني رقم (الاي بي) طالع !!!!


ما رديت عليهم المهم كررها وصار كل اللي في الغرفة يقولونها :( أنا تفشلت وقلت لهم : من وين طالع؟!!!!!

قامو يضحكون علي ,,, مالهم سيرة غير دفني و لـ (الاي بي) حسيت وجهي طاح من جد , وجيت برقع الموضوع

وقلت لهم ياشباب سامحوني لو (الاي بي) حقي مضايقكم في شي ,,, بس اقسم لكم بالله مدري من وين طلع

وياليت اذا احد شافه وهو طالع برى يدخله لاني اخاف عليه من السيارات ,,,,,

وفيه وحده اسمها سارة رحمت حالي وجتني خاص وقالت عادي اخوي بس عشان لاحد يخترق جهازك او يعرف انت من وين

لا تخلي رقمك يطلع 00000 قلت : بس كذا !!!! إذا على الاختراق ولد ابوه اللي يقرب غرفتي 000 واللي ما يعرف أنا من وين

بكتبها لكم في العام 0000 وأنا من اليوم متفشل ودي اعرف وش اللي مسويه واخرتها رقم جهاز ( بس عسى مايدرون من الرقم انه اقساط )



المهم هبلوني في الشات وكل شوي يطردوني وارجع وخاصة شخص يسمونه (اللورد ) ويقول انت بطئ في الكتابة

قلت طيب وش تبيني اسوي انتم تكتبون بسرعة واحد يقول كيف الحال والثاني يقول من وين الاخ والثالث

يقول صباح الخير والرابع يقول شكلي اعرفك وانا المخ عندي يهنق مقدر ارد على اكثر من واحد في نفس الوقت

واللي قاهرني اني انزل راسي اكتب رد وادور الحروف ويوم انتهي من الرد وانزله إلا وأنا لحالي بالغرفة

وقبل شوي كانوا سبعة مدري وين طسوا

وقلت لي قصيدة عصماء بهذه المناسبة :

[poem=font="Simplified Arabic,4,red,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
أنا مدري وش الفارة =ولا قد شفت أنا (الكيبورد)

يسموني فتى الحارة=وأنا ورطان مع ذا ( الوورد )

قهرني النت واسراره=ولا ادري وش ( الباس بورد )

سمرت وناس سمـــارة= على الشات وحذفني ( اللورد)

قطعني ( اللورد ) من سارة= وقالي انت ( نوت ريكود ) [/poem]


صراحة شعرت بإحباط من الشاتات وجتني نصيحة من شخص خبير وقال نزل الماسنجر ودور لك واحد تسولف معه وتدرب

عليه لين الله يفرجها ياتمشي صح بالنت يترجع للكيرم قبل تفقد يدك حساسيتها للعب . او دور لك منتدى وطقطق فيه

ورحت اشارك بالمنتديات

وكنت كل ما اشارك بمنتدى انطرد مدري ليه

ومره شفت لي واحد يتغزل بمشرفه اسمها فراولة

يتغزل عيني عينك بخاطرة

رحت فتحت موضوع جديد وكتبت خاطرة وسميتها حبيبتي موزه

هذي هي

7
7
[bdr][/bdr]

حبيبتي موزة

إن عملي بسوق الخضرة يجعلكِ لا تغيبين عن عيني ولا موسم


فكلما رأيت عناقيد الكرز، تذكرت عينيك الحمراوين ، كحمرة القريب فروت،

وعندما أحمل الجزر بيدي أشعر وكأني ألمس أصابعك المعشوشبة بربيع الشَّعْر،

آآآآآآآآه على أسنانك الرمانية ككشرة ( رونالدينو)، ياويح قلبي على شفتيك شبيهة الكوسة،

ألمس البرشومي فأتلذذ برقة مشاعرك الشوكية،

آآآآآآه يا حشاشة جوا فتي .

لا أطيق رؤية جوز الهند فقشرته تذكرني بروعة خدودك

لكِ خصر كأنه الكمنجة لقد كنت أعشق المشمش الحين أموووووت بالمنجا

إن رائحة الثوم تذكرني بثغر كِ المبتسم


آآآآآآآه ياحبيبتي يجرحني البيدجان بلمعته الفاتنة، فهو يذكرني بخشمك المفلطح،

أموووووووووت فيكِ يا ليمونة سوداء

الناس تعشق الخال بوجنته ***** وأنا حبيبي كله خال

وعندما أرى قصب السكر أتذكر عصاقيلك عندما تسابقين الريح في محل كل شيء بريالين،

آآآآآآآآآآآآه ياجحة عمري ، ويا فلفل لويزاتي، وياقرعة روحي،

كم أعشق استدارة وجهك الشمامية، وطول حنككِ الشبيه بالكمثرى اليمانية،

إن حزمة الكزبرة بريالين تذكرني بشوشتك الجميلة عندما تقومين من النوم

ستبقين لمواسم مغروسة بجوافتي أسقيك من ماء قلبي،

وسيكون صدري لك البيوت المحمية،

سأكون لكِ سماداً، فكوني لي غطاءً,

ولكن لا تنثري بذور الشك فيني , فتثمر انتقاماً يقتلع الأخضر واليابس

ويحرق ربيع سنيني.

ياخضرة سنيني لقد زرعتي البسمة في كل غصن من جرجيري

تقبلي أشواقي الحارة بحرارة الفلفل

محبك / ســــــ ــعد ( شيخ الخضرة)

[bdr][/bdr]

وجيت الصبح ولقيتهم مبنديني وناقلين خاطرتي للفكاهه

ومن منتدى لمنتدى

واشارك بقصايد مالها سنع مثل هذي وهي مجاراة لمحمد عبده واغنية شبيه الريح

7
7

[bdr][/bdr]

شبيه الذيـــــــــــــخ ..........وش باقي من الألام والتشليخ

وش باقي من الأفلام .........وش باقي من الأقلام
عجزت القى في دروجك شي ........ عجزت القى في صحونك مي
واعبي كرشتي بطيخ

شبيه الذيخ انا اقدر اكسر عظمك الناشف
شبيه الذيخ انا من لي سوى وجهك الهايف

بقى ياشين حذياني ..........ابيك تجيب حذياني

شبيه الذيـــــــــــــخ .... شبيه الذيـــــــــــــخ.......شبي� � الذيـــــــــــــخ

وش باااااااااااااااااااااااا ااااقي


ابي اغرف متى يخلص عشاكم ..........وابي اغرف عشاكم هو مثل حطة غداكم
وابي اغرف متى اغرف ومتى تغرف ...متى ...متى ابطيتوا تراكم

ابي اغرف اذا باقي في قدرك رز اكسر فيه مغرافي
وابي اغرف اذا باقي لحمكم لحم ما شالته اكتافي

بقى ياشين حذياني ..........ابيك تجيب حذياني

شبيه الذيـــــــــــــخ......شبيه الذيـــــــــــــخ..... شبيه الذيـــــــــــــخ

وش باااااااااااااااااااااااا ااااقي



سنوني كم ؟ وجهي الخايس المرعب ..... وانت الذيــــــــــــخ
بزاريني عذاب وهم ........ وزاد الدف والتطييح


وصبري صبر بيارة ..... ملوها أهل ذا الحارة
غشاهم رييييييح ........غشاهم رييييييييييح اف اف
كان من العفن اعفن. ...... كان من العفن اعفن
ولوهم تصرعوا أحسن ......... لولا كثرو التنفيـــــــــــــــخ

حبيبي الأطول الأهبل.........تعبت اوصف غرابة وجهك الأهطل

بقى ياشين حذياني ..........ابيك تجيب حذياني

شبيه الذيـــــــــــــخ.......شبي� � الذيـــــــــــــخ......شبيه الذيـــــــــــــخ

وش باااااااااااااااااااااااا ااااقي

[bdr][/bdr]

واليوم الثاني بندوني

ومن منتدى لمنتدى

لين طحت بمنتدى لأمل عبدالعزيز وكان بسمها وهي اللي تبنت قلمي وقالت انت قلم ممتاز بس لاتنزل خمس مواضيع باليوم
وقصايدك لاتحطها بالمطبخ ومشت الامور بالمنتديات .

وبعدها صار عندي ماسنجر وبرقم سري مميز وكان اول ماسنجر استخدمه

[email protected] <<< صراحة كل اللي يشوفه يقول حرام ان هالماسنجر معك

" لااحد يضيفه لاني ما افتحه نهائياً "

والله لا يوريكم هبلت بالعالم كل ما لقيت ماسنجر مرمي هنا او هنا لقطته واضفته عندي

وفي يوم من الايام وبينما انا وحدي في الماسنجر اغيّر في اعداداتي الشخصية

إذا بوحده تطلب اضافتي

أنا فرحت لانها الوحيده أون لاين ويوم دريت انها بنت زادت فرحتي ولا تسألون ليه

وداربينا حوار جاب لي المغص

أنا احلف انها شنب وهي تبت يمين انها بنت ولا تزوجت

مدري ليه مركزه على انها ماتزوجت اكثر من تركيزها على انها بنت ( يمكن تخطط علي )

المهم من كلامها واضح انها بدوووية وبدوووية وبقووووة

واحس انها تكتب وهي مقرطه في برقعها

ومرة قالت لي برب بلم شعري جلست ساعه لين فهمتها ( آي : عن اذنك سأجمع خصائل شعري )

والمرة الثانية قالت لي انا مقدر المس الفارة اخاف تصير بيضا

وقلت لها ليش توك عاجنه لك قرص ؟؟

قالت لا بس حاطه مناكير بيضا

قلت لها اخبر اللي يموت تصير اظافره بيضا << سدة نفس

ومره قالت لي وجهي بااااارد قلت لها توك تدرين ؟

قالت لا بس انا حاطه قناع للبشرة ..!!

وجلست احوس معها ساعة لين عرفت القناع

لانها تكتب كلمات لا تكتب في عالم النت

كلمات تنطق فقط



ومن ابرز الكلمات اللي جابت لي الصداع

الماسنجر معيّي يشتغل = آي رفض تسجيل الدخول

هه وهه ومهوب لذيك الدرجة = آي حالته متوسطة وليست كما تريد

لعنّة = اللعن : الطرد والابعاد من رحمة الله والمقصود هنا الرفض بشدة

وجع و وجججججججججع = وهو نوع من الآلم وقد حذف الفعل والتقدير وجع يوجعك ياسعد

فيان = آي أين مكانه على وجه التحديد

تسيف امسيت = آي هل نمت جيداً


ومن الغرائب مع هذه الفتاه أنني حين سألتها كيف حصلتي على جهاز الكمبيوتر الخاص بك قالت : قلت لابوي

طق لي نت وطقه لي عساه ذخر فديته

قلت في نفسي والله لو انه جاب لك مكينة خياطه انه اصرف لك واوفر لابوك

ومره من المرات كنت اكلمها ولا ترد وقلت لها وش مشغلك

توقعوا وش قالت ؟؟؟




قالت : احمل فلاتر للفتوشوب

قلت : اعقببببببببببي اعقبي منتي بهينه ياراعية الخياطة .. وش اللي طمرك على الفتوشوب



صراحة اصدمتني بقووووة

وتعلمت اني ممكن اطلع هكر

إذا راعية الخياطه عرفت الفتوشوب فأنا تقاسيم وجهي تقاسيم وجه هكر


وقررت اني اتعلم آي شيء يطيح قدام خشتي يعني لو واحد يسوي لي توقيع اناشبه لين يعلمني كيف سواه

وقررت ايضا اتخلص من الناس المتخلفه اللي معي بالماسنجر " اهل السوالف "

وافتح موقع لأن ذيك البدوية مهي اطيب مني



واسف على الاطالة

[*أهداب*]

8
8
الآن عرفت مصدر ماكينة الخياطة ..

قلت : اعقببببببببببي اعقبي= اصمتي لأني غير مصدق

منتي بهينه= أنك قوية ومغامرة (أي معجب بها ابن عمي )


ياراعية الخياطة .= ياصاحبة مهنة الخياطة

. وش اللي = تعني ماذا

طمرك = أي نقزك >>> وهي بمنعى أنى لك هذا (أي ابن عمي مستبعد على البدوية تتعلم صنعة غير الخياطة)


على الفتوشوب= برنامج تصميم





أقوول ولد عمي ..ترى ما رباك غير أم برقع ..وخلاك كبر سواقين الشاحنات

ياليت يتم حجب التواقيع ....

[سليمان]

ههههههههههههههههههههههههه هههههههههههههههه

عند الإشارة تكون الساعة ان ابو عبدالرحمن قاااااااااااااااااضي


سعد منت صاحي ودي امزعك بلوك واسمنت

[ناعمة]

ههههههههههههههههههههههههه ههههههههههههههههههههههههه ههههههههههه
ههههههههههههههههههههههههه ههههههههههههههههههههههههه ه
ههههههههههههههههههههههههه هههههههههههههههه

الهدباء

يازين بداياتك جنااااااااااان

::

ابو غانم

خليت الولد ينحاش من الدنيا

هههههههههههههههههههههه

::

ابو عبدالرحمن
والله معذورين من يطردونك انت وقصايدك
خخخخخخخخخخخخ
اجل يرجع الفضل بعد الله لحياتك النتية لاموله
:هاها:

::
والله بعد المواقف هذي
صارت مواقفي ولا شيء عندهم

ههههههههههههههههههههههههه هههههههههههههههههههههه

::

فوشي

مشكورة ياقلبي على الموضوع من جد استمتعت فيه

دام نبضك وقلمك باسماً

[محمد الدغيري]

عطو ابو الدحمي جوه

تعرفون بعد الساعه 12 يفصل ... لا تاخذون منه شيء بيجحدكم بكرى

[الأكادي]

هذا وبعت الكيرم سويت كذا في نت



عاد لو بعت طاولة البلياردو وش بتسوي شكلك بتشتري مدينة الملك عبد العزيز للتقنيه




ههههههههههههههههههههههههه ههههههههههههههههههههههههه ههههههههههههههههههههههههه ههههه



اندمج لما اسمع ابو عبد الرحمن يسولف في مواقفه الي تصير له احس اني تابع توم وجيري


الله لا يحرمنا منك يابو عبد الرحمن ولا يحرمنا من مواقفك الي زي العسل




اخوك الاكادي

[الدندووووونه]

أول ماجاب أبوي الله يرحمه لنا الكمبيوتر .. قلنا لازم ندخل النت ونشوف وش هالنت؟!!

المهم شبّكنا سلك التليفون وننتظر حضرته يتصل ... أناظر أخواتي وأقول لهم ليش مايتصل .. رحت لأبوي قلت يابوي الجهاز خربان ماأشتغل النت.. قال بشوف ولد خالكم يسويه لكم ... المهم جا ولد خالي وقال لأبوي مافيه بطاقة إتصال وشلون تبوووونه يتصل!!؟؟

بعد ماصرنا ندخل المواقع أذكر كنّا مرابطين على المواقع الشعريّه وش كثر كنّا نعاني.. تدرون وش نسوي؟ ندخل الصفحه اللي فيها قصيده وحنّا محضرين القلم والورقه نبي نكتب القصيده حتى لو كانت طويله مانعرف نحفظها!!

هالموقف وربي خلاّني أموووت ضحك .. أول ماسجّلت بغرابيل نزّلت قصيده .. المهم بعد أكثر من خمسه شهور رجّعت صديقتي القصبده لأول الصفحات جيت بأرد عليها لفت نظري ردوودي القديمه بدااياااتي..
كنت أبدا الرد بمقدمه ليه مدري..
أول شي..


بسم الله الرحمن الرحيم

السلام عليكم ورحمة الله وبركاته..(( تخيّلوا))

وبعدين أقول صح بدنك ... شرفني مروورك ... دندووووونه..(( كذا ورا بعض)) خخخخخخ

وش رايكم؟.!!

[أبـو نـدى]

تحية طيبة للجميع

من المواقف الطريفة

أنني ما أعرف أعمل على الحاسوب

ومن القراده رحت أتعلم على جهاز المدرسة الوحيد واللى سرعته يمكن ماتتجاوز 200
طبعا هذا الكلام قديم
و أخوكم جاب العيد فحست الملفات و أضررت بالجهاز (كبير السن ) أضرارا كبيره

حيث تم أصلاحه وحصل لي من اللوم :زعلان: :والنصح والتحذير من الاقتراب مرة أخرى

وبعدها قررت التعلم:mf_popean وشراء جهاز خاص بي وأخذ دورات تعليميه للحاسب

أم النت فالمواقف الطريفه فنادره

أشكر الجميع
والشكر للمبدعة الأخت فش فاشه على الطرح الرائع والطريف

[ندى الحروف]

انا ما اذكر انه صارت لي مواقف طريفه بالنت :بفكر: و يمكن و لا حتى متعبه لانه طبعي مغامره ادخل اي مكان و منا يهمني انخرب الكمبيوتر و لا اتحرق المهم ادخل ..

لكن عجبتني مواقفكم بالذات ابو عبد الرحمن .. و عبد الرحمن الجبابرة.. و اهداااااب.. :قلب:

و انتي فش فش وش مواقفك <= اكيد فيها ياليل ما اطولك :قوي:

[أول خطوة]

هههههههههههههههههه

بصراحة مواقفكم شي ثاني

لكن ابوعبدالرحمن كل موقف على كثر ما هو صعب على كثرو ما هي مضحكة


دمعت عيني من كثر الضحك

للاسف ما اتذكر ان صار معي مواقف مضحكة لاني من دخلت النت و انا عارفة كل شي و بعد

احب اغامر

بداياتي اذكر طايحة في بوابة العرب و النكت المصرية هههههههههه

لاني ما بعد كنت وقتها تعلمت البحث احسبها النت هو بوابة العرب لانه الصفحة الرئيسية عندي

[TαlαL]

أنـا مـدري وش الـفـارةولا قد شفت أنـا (الكيبـورد)
يسمونـي فـتـى الـحـارةوأنا ورطان مع ذا ( الوورد )
قهرنـي النـت واســرارهولا ادري وش ( الباس بورد )
سمـرت ونـاس سـمـارةعلى الشات وحذفني ( اللورد)
قطعني ( اللورد ) من سـارةوقالي انت ( نـوت ريكـود )

صح لسانك

ههههههههههههههههههههههههه ههههههههه

فشفاشه الله يسعدك عى الموضوع

اتذكر موقف لي كنت مسجل بمنتدى وخاش متحمس بنزلهم مواضيع

واروح لمنتدى الله لايبارك بعدوهم وانسخ موضوع تقديم لمباراة

ريال مدريد وبرشلونه وحطه بالمنتدى واجي اقراه ثاني يوم

ولا الموضوع من سنة جدي له سنه يعني تقديم مباراة السنه الي فاتت

وهذاك يوم وهذا يوم ولا عاد وريتهم وجهي

[مشاعر حالمه]

امشششششششششششششش على المواقف

عزالله مواقفكم رهييييييييييييبه في ذمتي

بالنسبة لي ياطويلة العمر يافووووووشية قلبي

استخدامي لجهاز الحاسب من يومي صغيره ( على جهاز الوالد فديت روحه )وصرت اعرف للحاسب الين تخرجت من

الثانويه العامه واخذت دبلوم في الحاسب ومنها

دورات للانترنت والبريد الالكتروني ( اوت لوك اكسبريس ) <== شاهي مو برنامج هع

المهم اني تعلمت الانترنت وكنت اشره على البنات اللي يدخلون على النت ايام الدراسه في المعهد

المهم وحنا ندرس قالت معلمتنا ( مصريّه ) الله يذكرها بالخير تقول راح نطبّق الدرس يعني فيها نت

طبعا استانسنا كثير <== تشره على البنات وآخرتها تستانس الحمد لله

يوم جينا بندخل دخلتنا على موقع رااائع جدا وهو مشهور ومعروف وفيه فوايد كثيره وقامت تشرح لنا طريقة

فتح صفحه انترنت وكيف ننتقل من صفحه الى صفحه وجلست في اثناء شرحها تحذرنا من الفيروسات

سألناها وش هي الفيروسات :زعلان:

قالت : هيّا دوده بتدخل في قهازك وبتدمروه وتصير الشاشه سودا <== ماش مااعرف اتكلم مصري خخخخ

المهم حنا حطينا في بالنا الدوده انها دوده صدقيه تسير على الجهاز وتخرّبه علينا ..خذينا على هالكلمه ورحنا بيوتنا

وعلّمت اهلي قلت تقول الابلا ان الانترنت يجي فيه فيروسات منخشه معها دوده تخترق الجهاز بس شلون تدخل الدوده

يعني معقوله ماتموت والا اشلون يرسلونها <== ينعن ام الغباااااااء ياشيخه

قال ابوي لا هذي الفيروسات يالذكيه <== يتطنز هذي ملفات يرسلونها على الجهاز اللي عنده حاجز ناري يمنع اختراق

الفيروس ماراح تجيه الدوده وتاكل جهازه وقعد يضحك علي هااااااااااااااههههه <== يضحك كذا

حسيت اني غبيه وبقوة <=== ماعليج شرهه كملي بس الله يصلحج وطلّعي الفضايح هع

وجيت اليوم الثاني نتعلّم درس ثاني <== امش على السجع خخخخ

كان درسنا كيف نسوي لنا ايميل على بريد والله نسيت اسمه لانه هالبريد الحين ماشوف احد يعمل عليه

المهم وكانت مدرستنا غايبه واللي تعلمنا سعوديه ياحليلها طيوبه حيييل وصريحه وتقول يابنات انتبهوا

تراكم اذا دخلتوا النت بتشوفون مواقع كثيره ومن أكثرها شيوعا الشات انتبهوووووووا منه ترى فيه ناس حراميه

يطالعونكم من بعيد وانتم ماتدرون ويخترقون اجهزتكم ويسحبون ملفاتكم :mf_popean <== سكون ماهم اوادم

عاد تحسبون باقي فيني قلب قلبي طاح في بطني خخخخخ

المهم ان احنا صدقناها وفيه وحده معنا ملقوفه وجرييييييييئة قالت ابلا عادي والله الشات ندخله باسماء مش اسماءنا

يعني مش معروف ان احنا بنات ونلعب عليهم ونسبّ ونطلع قلت لها ايه هين اذا مالعبوا عليج وسحبوا رقم تلفونج بعد

البنت قالت هاااااااااه <== انا والله قلت كذا ماكنت ادري انهم يسحبون حتى ارقام التلفون بس لان الابلا تحذرنا

وطلع صدق انهم يسحبون ارقام التلفون اذا اخترقوا الاجهزه حسبي الله عليهم

عقب الدراسه قررت افتح النت دخلت عالم خاص بالنساء ياحلوه هاك العالم كل شي تحبه البنت فيه من ماكياج

وفساتين واكسسوارات وكل شييييي كتبت لهم موضوع عن كيف تسوين صينية حلى <== مادري وش دخل الحلى في

الفساتين والاكسسوارات :هاها: عاد يومها كان ماعرف انا اسوي حلويات بس فيني لقافه

ودي اعلمهم اني جيّده <== امحق جيده جابت العيد فيهم ذاك اليوم خخخخخ

كتبت لهم مقادير الحلى وحطيت مع الحلى حبة بركه <== مادري وشدخل الحبه خخخخخخخخخ

المهم اني عقب مانزلت لهم الموضوع تذكرت ان حبة البركه تحط على وجه الفطاير والظاهر انهم سووها

والله يعلم يمكن ذك الحلى طلع يهبل خخخخخ

استمريت معهم مده وتعرفت على بنات من جميع الاقطار عن طريق المنتدى لاني ماسويت ايميل ولا عرفت المسنجر

الا عقب ماغامرت وسويت لي عشان اسولف مع اختي حتى امي واهلي كلهم كانوا يشوفوني وانا اسولف مع اختي

ويقولون هيه لاتسولفون في اشياء خاصه ترى الناس يشوفونكم <== والله مايدرون وين الله حاطهم خخخخخ

صراحه اللي مادرس النت ولاعرف وش اخطاره لايدخله لانه الشخص بيصير تفكيره سطحي لعالم النت : )

وسلامتكم

فيه مواقف تفطس ضحك بس تفشّل خلّوها في مره ثانيه ^_____^

سلااااااااااااااااااااام

[][aJgJI pJLc][]

أبو عبدالرحمن

وكنت كل ما اشارك بمنتدى انطرد مدري ليه
ومره شفت لي واحد يتغزل بمشرفه اسمها فراولة
يتغزل عيني عينك بخاطرة
رحت فتحت موضوع جديد وكتبت خاطرة وسميتها حبيبتي موزه

قسمن أني بغيت أموت من الضحك

عليك من الله ما تستحق

[ندى الحروف]

الموضوع من سنة جدي له سنه يعني تقديم مباراة السنه الي فاتت

خخخخخخ الله لا يفضح مسلم <= تستاهل خلي الكوره تفيدك <= ما صدقت تشمت فيه :قوي: