الحين أنا لو اني ولد وش كان صار في الدنيا ؟؟
بتخرب ؟ بتدمر ؟خلاص بيتوسع ثقب الأوزون ؟ بتتحرك براكين اليابان ؟ بتنقرض دببة الباندا ؟
يوم انتس انتي وابوي ماسكين خط الرياض سدير القصيم - القصيم سدير الرياض بخلفة العيال وراكم ماكملتوا جميلكم وجدعتوني ولد ؟!!
والا فرحانين بحالتي سحلية بين 6 تماسيح ؟؟ طبعا خواتي 4 كلهن تزوجوا < يهبن
^
^
^
كانت معكم الأسطوانه المعهوده الي اشغلها لأمي وأبوي كل ماحنشت عليهم
السلام عليكم أول حاجه
شخباركم جميعاً ؟
بصراحه وبدون مقدمات انا بنت طفشانه من حالي بمعنى اني طفشانه من كوني مخلوق ناعم الملمس ذو كشة غزيره على الراس سهلة الكسر والدف سريعة الصراخ والألم كثيرة المشاكل والاحتياجات والأهم من كل هذا اني كائن محظور من الظهور بأي شكل أو صورة << وش ناويه عليه يالفاهره
طفشت من سوالف البنات طفشت من عالمنا والله طفشتتتتتتتت ( وجه متقطع من الصياح ) طفشت من الاستشوار والمكياج والحلاوه والجلسه الانثويه والكلام بصوت واطي ؛ طفشت من مقابل خشة عبير ودلال وهيفاء طفشت من مياعة ريما وبرود ساره ومخكرة هند ؛ طفشت من قولة مااافيه طلعه اليوم ومن عبارة ( ياخزياااه أني بنت وش لون تسوين كذا ؟ ) ؛ طفشت من القهر الي احس فيه اذا شفت هالسرابيت اخواني راجعين للبيت الفجر وانا كأني دجاجه من 12 بغرفت طفشت من قولة قووومي يادجه بيجونا حريم جهزي القهوه والا صبي القهوه والا علقي عباة فلانه والا سكتي ولد علانه ؛ طفشت من ترزز هاللبنانين بوجهي في محلات المكياج والعطور وعلى قولة ( هيدا بيلبئلك ... هيدا مابيلبئلك ) طاااعوش يمشون بضاعتهم على حساب مشاعري
طفشت من السؤال الي لازم ينطرح بكل مجلس وبكل عزيمه هاا ماانخطبتي ؟ ووجعه وش دخلكم قاعده على روسكم انا ؟ طفشت من الحاح امي وخالاتي علي اني اتعلم الطبخ طفشت من حالة الخوف والهلع الي تنتابني اذا كنت اتابع مسلسل او فلم مع اخواني وجابوا دعايات بنصه ؛ طفشت من السواقه من خلف السواق الدبشه رح يمين رح يسار انتبه رصيف لا تسرع ياثور تراك في دوار باختصار تعبت وطفشت مو كوني أنثى
^
^
^
عاد ذي الشكوى كانت طالعه من صماصيم قلبي ومادريت بحالي الا الي كاتبتها بقرطاسه وداستها بمخباتي؛ لأني كنت كل ماقريتها احس براحه نفسيه رهيبه يعني احس اني فضفضت ؛؛ المهم ذاك اليوم كنت مرتزه وكعادتي بالصاله والبوز شبرين ويحلفون ان من طوله اهلي كانوا يتعثرون به اذا مشوا من قدامي وانواع التخشيب والحلطمه والتأفف تقولون اني شغاله متهاوشه مع كفيلها وبترجع لديرتها ؛؛؛ دخل اخوي محمد هو اخوي الوسط الي اكبر مني ب 3سنوات واصغر من اخوي فهد ب 2 سنه وقد سعود ولد خالتي نوره لكنه .. فكم يبلغ عمر راكان ؟؟ الي يعرف له مصاصه وشروخه << انطمي وخلصي السالفه
قال: بالخيررر يا مبوزه وش فيتس ياحظي ؟ من مزعلتس هالمره ؟
قلت له مو شغلك ! وياليت تضف وجهك لأن وقسسسم خطر افقع وجه أي احد يكلمني
قام حط يده على راسه وقال : ما انت هين ياتايسون اقول لو انتس ولد مهوب اصرف ! والا وش الفايده جالسه متنكره جسم بنت واخلاق ولد
طبعاً انا هنا استحيت اقول ياليت قمت سكت واكلت تبن وطلعت من الصاله وتوجهت للحوش هناك عندنا برحيه <-- وهي عباره عن نخله كبيره تنتج التمر البرحي وارتاح جداً لما اجلس تحت ظلالها لأحتمي من أشعة الشمس خصوصاً في الليل ( صح على فكره خلني اعلمك تدرون اني مانجحت بالتعبير الا يوم جا ابوي وجدي وعماااني كل ابوهم يتطلبون زوج المدرسه حقة الماده كانت تقول ذي وين والكتابه وين ؟ أجل عمركم سمعتوا عن وحده يقولون لها عبري عن الصداقه وتكتب " لتحل لعنة الله على خويتن لا تقدر مخاواة خويتها " ) المهم طلعت وجلست تحت النخله وانا الي اسمع اصوات الرجال بملحق ابو صالح جارنا يلعبون بلوت ويشوفون التلفزيون ويعلقون على بعض بأشنع التعليقات والرهيب أن ماحد يزعل من أحد و < صلحوا شااااي > < صلحوووا قهوه > وانواع التأمر والي يبونه يجيهم وهم قاضبين أراضيهم وانا هنا خلااااص القهر أكل جسمي وعقلي وهمين تفله يقول وع وش ذا العقل التالف الزبده يوم اني شفت الدعوه كذا وطقيها بتسوه ياراسبه واندبي حظتس الردي وانا اصيح والدوع اربع اربع بعدين صاروا ثمان ثمان همين غدوا ثنعش ثنعش لين اببببد صبت حنفيه من عيوني على الثيل الي تحتي وجلست على هالحاله نص ساعه << اقهر وانا نصابه صح ؟
يوم انتهت مرحلة الصياح دخلت مرحله المناشق عاد تعرفونها ماله داعي اقولكم وشهي !
وحسيت أني قصرت من كثر الصياح والمناشق ورجعت على ورا وتسندت على جذع النخله الي وراي <-- تراي مقطعه ام ام شكلي ودي يصير الموقف رومانسي تكفووون قولوا انكم تأثرتوا
المهم وحسيت بثقل فوق جفوني وبدت الدنيا شوي شوي تصغر يعيوني لما اختفت وكنت ساعتها خشيت بنومة عميقه ؛ خمس دقايق وصحيت بسم الله امداتس ؟
لا صدق صحيت ولقيت قدامي شي اخضر عريض وطويل <-- لاعاد توصفين ياخاله جبتي الكريسمس على هالوصف عاد هذا الي عندي عاجبكم والا ضفوا وجيهكم جلست اناظررر وش ذا الي قدامي ؟؟
واحاول اركز وافرك عيوني ؟ يمكن اني مااشوف صح !
ياربي وش ذا الي قدامي هي شجره ! والا وشو ؟
يمكنه برج راكزينه الاتصالات في حوشنا خابرين كل الحاره تشكي من الشبكة التعبانه
من وين طلعت ؟ ومتى ؟ واناظر واحاول اركز اكثررر
ويوم وقفت ولاها شجره بس بنت كلللللللللب طووووويله رفعت راسي ابي اشوف وين تنتهي عجزززت بغت تنكسر رقبتي والله
قلت بخاطري يابنت ياراسبه ورا ماتتسلقينها ؟؟
كود تطيحين وتتكسرين وافتك منتس <-- لاحظوا انا جالسه اقول هالكلام لنفسي
والله وابد اعقلها وتوكل ونويت ع الرقيه
ويوم بديت اتسلق ووصلت للربع الاول منها واذكر انها مره طويله وممكن الي بالشارع يشوفوني ياخزياه ومير واطمر للأرض مره ثانيه وادخل القط عباتي وانسفها على راسي واربطها على خصري وانطلق مره ثانيه اطلق من انطلاقة بزر يحبي لم المواعين بدروج المطبخ
واتسلق واتسلق واتسلق الزبده لين وصلت للقمه <<< مشكله الي يملون من الكتابه بسرعه
صدق تسلقت تسلقت وتعبت وقفت شوي اريح واشوف سطوح كل البيوت الي بالحاره تقريباً ووع ياهو غبار وقراااشيع مالها داعي ؛؛ حتى اني شفت جدة جيرانا مرميه مع قشهم بالسطح شكله بالغلط لأنهم مبلغين عنها انها مفقوده المهم بعد هالبريك كملت تسلق واتسلق واتسلق عيا يخلص ذا الجذع دخلت بالغيم وانا اتسلق لين نط لي من بين الاوراق قزم ابيض لابس بدلة كاروهات اصفر وازرق بغيت اتله واجدعه من فوق نجاسه : بس ماامداني لأني كنت متروعه بصراحه :وش ذااااا ياربي جن والا انس وجلست اقرا بهالمعوذات ابيه بس يختفي من قدامي وانا مغمضه عيوني وفتحت قلت كوده اختفى ::
يمممممممممممة ماراح !!!
قالي : اهلللين
قلت : هلا والله .. كيف الحال ؟ <-- يمدحون الخوف :11istling
قال : تمام ,, انتي كيفك ؟
قلت له : الحمدلله .. يالله مع السلامه .. وجيت بحط رجلي بنحاش تحت
قال : تعالي تعالي وين بتروحين هع هع دخول الحمام مش زي خروجه
قلت : وش تبي ؟ وبعدين من قال اني جايه ابي حمامك !! وقســــم بالله اني مادخلت بيتكم والله هه هذا انا حلفت وترا عندنا حمام بالبيت ::
قال : هع هع ومن قال عندي بيت ؟ تحسبين اني زي العملاق الي بقصة شجرة الفاصوليا العملاقه يالمخفه
قلت له : مخفه امك
قال : شوفي اسألك سؤال جاوبتي عليه صح , البي لك امنيه تتمنينها ؛ واذا جاوبتي عليه غلط اشوتك برجلي وتطيحين بالارض هع هع
قلت : خخخخخخ وانت عندك رجل ياحظي كلك على بعضك شبر حتى مدري وين رجلك من وجهك
قال : يعني ! وش قلتي ؟
قلت : :11istling بالحالتين ماراح اخسر شي ! موافقه
قال : تمام .. سؤالي , ماهي الدوله الي تلزم اذاعتها بــ تخصيص 80% من وقتها لبث الأغاني المحليه او بلغة الدوله الأم ؟
قعدت اعصر مخي يمكن ماره علي هالمعلومه بالطب يمكن :مااش قلت ( فرنسا ) جزافاً
قال : براااافوا
ناظرته بنص عين : بغيت اخمه بطراق احسبه يتطنز علي قلت له : تستهبل ؟
قال : يوه ليش ماعندك ثقه بنفسك ؟ انا جاد جوابك صح ؛ بس مو هذا السؤال ,, سؤالي إذا كانت الاذاعه الفرنسيه تلتزم ب 80% من وقتها للأغاني الفرنسيه .. فماهي الاذاعه التي تلتزم بــ 99% من وقتها للإعلانات التجاريه ؟
قلت مايبي لها ال MBC FM
قال : ممتااااااااااز .. خلاص تفضلي تمني وانا بحقق لك امنيتك
والله بيني وبينكم داار راسي وش اطلب وش اطلب ؟
خصوصاً اني ماتوقعت ولا واحد بالميه اني اجاوب صح بالعكس متولمه للشوته
وافكر محتاره وش اطلب ؟
اطلب اني اتزوج محمد بن راشد ال مكتوم ؟ والا اطلب ان الوليد يعيني مديرة مكتبه ؟ والا اطلب ان المنتخب ياخذ كاس العالم بلا فضايح هالمره
ميررر واذكر الي حايس علي حياتي ورغبتي المستبده <-- ترا هالكلمه من دوافع كتابة الموضوع واني اجرب حياة الولد وعساني بس مافكرت الا لساني منفلت
( ودي اصير ولد .. يوم واحد بس )
قال : اسف هذي امور خلقيه انا مااقدر عليها
قلت : اقول يالسباك :احد قايلك اقلب جسمي الحين ؟؟ انا قلتلك ابي اصير ولد مؤقتاً
يعني شووي شنب على شوية سكسوكه على حبتين عرض اكتاف وخشونة ملمس وخلاص !
قال : اممممم طيب .. بس شوفي يوم واحد بالضبط وكل شي بيرجع لطبيعة يعني حاولي تستعجلين وتسوين كل الي بخاطرك
قلت : تم
قال : بس في حاجه مهمه لا تنسينها
قلت : وشهي ؟
قال : لو كلمتي اي بنت راح ترجيعن بنت .. انتهي لا تحاكين انثى ابداً ابداً
قلت / ووه ابيها من الله انا منحاشه منهم وش ابي بهم احاتسهم
وفجأه كأن احد هزني بقوه فتحت عيوني ولاني بنفس مكاني تحت النخله
تلفت حولي وجنبي هذا بيتنا وهذا حوشنا وقدامي كان في بركه صغيره من دموعي الي بأول القصه
طليت فيها وشفت واحد غريب ابعدت بسرعه
جلست شوي ورجعت طليت : اناظر ؛ ويناظرني اغمض يغمض افتح يفتح اتفل بوجهه يتفل بوجهي
اقوله من انت ؟ يقولي من انت !!!
يووه يشبهني مرررره << قلت بخاطري
هيه هذا !؟!
هذا!
أنــــــــا
وتحقق الحلم وصرت صبي
عاد بيني وبينكم صح كنت وسيم بس ولو ماحبيت خشونتي ابد
بس مايهم هماني بحس بشعور الحريه والانطلاق
والله واطمر للبيت وادخل غرفة واحد من اخواني واخذ ثوبه والبسه واخذ الشماغ وانسفه على كتفي والبس الطاقيه
وبعدين جيت بطلع بروح لملحق ابو صالح الي جنبنا
وانا طالعه <-- الحين اقول طالعه والا طالع ؟؟
تابعوا التكمله .....<<