[align=center]
تبي تعرف قصتي ؟
ليه الفضول للي تسميه محبتي ؟
مو انت لك قسمتك وانا لي قسمتي ؟
هذه دنياكم عيشوها وخلوني اعيش بدنيتي ..
انته تحب .
وغيرك يحب .
وهذا القدر انكتب .
سواء تحب ولا ما تحب .
شوف واسمع قصتي ولا تقاطعني بسبب
يقولون يوم لك ويوم عليك
وانا كانت ايامي لي والكل يقول لبيك
البعيد والقريب وحتى الغريب قال ايدي بإيديك
كنت عايش حر نفسي ولا عندي في دنيتي اي شريك
في يوم .. انكتب اني التقي مع هذا النصيب
مثلي مثل كل البشر قلبي خفق وقلت هذا الحبيب
نظرتي ونظرته بدايتها وقلبي دقاته يمكن هالمره تصيب
تبسم وابتسمت وما عرفت ان النهايه لهذه البدايه عتمة نحيب
ما علينا .. بكمل لك مشوار السنه في حب كالذهب
ولا تقول انك بكيت يوم الكف على الكف بالنهايه انضرب
وين وصلنا ؟ ... ايه ذكرت يوم كانت هالابتسامه للبدايه سبب
خلنا نجلس يا صاحبي ترا القصه بدايتها اسردها عليك شروا الخبب
مثل ما الناس تقول .. هذول اثنين حبيبين
يعني .. افهم كل ما عندي كان له ولا يشاركني فيه اثنين
عطيته ولا بخلت .. بجسم ، وروح ، وقلب وكل ما عندي بدون دَيْـنْ
اخذ مني ولا شكيت .. وكل ما اعطيت زاد بالطلب مني له مرتين
عشت الغرام .. ذقت الهيام .. وانا مثل العذراء بين الخيام
كنت الطفل اللي يدور عالحنان ولو بالسلام
كنت الوفي .. كنت الحب .. كنت الاخلاص في الغرام
اعتبرته نص قلبي وروحي .. وانفرد فيني بين الانام
لحظتها عشت عمري الماضي بكل ما فيه .. بحلوه ومره
وقتها قلت وينه هذا من زمان يوم بالقلب حسره
بعدها قلت بيني وبين نفسي هالمره ما افرط بهالقمره
يكفيني العمر اللي مضى وخلني الايام اليايه اعيش صبره
مرت الايام وهو ياخذ وتستغرب لو قلت لك يوم القاه ارجع ادوره
ماهي نظرته ولا هي نبضاته ولا حتى في لمسته لايدي ذيك الحراره
عاتبت نفسي ولمت وقتي حتى ما ارجع واقول بعدها في المستقبل يا خساره
شفت يا صاحبي .. لو تذكر قلت لك اسمع قصتي بكل ما فيك من قوة الجساره
بختصر عليك ولا تظن اني بخبي شي بالسكوت
تراني نسيت اخبرك بعد سنة الحب وصلت لمرحلة الموت
كنت في يوم ناوي السفر وودعته ووعدته له راجع بسرعة الصوت
وانا نفسي ما كنت عارف كيف أودعه وارجولي ما تخطي من المسافه فوت
سبحانه .. مثلما قلت لك . القدر مكتوب ولا منه مهروب
تخيل .. لغيت السفر وقلت يرتاح ويشتاق لي الحبوب
تركته يومها وقلت انا برتاح ويشتاق لي مثل البر للهبوب
مليت .. من القعده والوحده ساعة بدونها حسيتها لحظة غروب
رحت اتمشى وانا عيوني مليانه فيه ولا أفكر بحد غيره
شفتهم يضحكون .. حبيب وحبيبه وأنا أدعي لهم من المولى تباشيره
تمنيت نهاية حبهم مثل حبي .. لكن .. بعد حسيت بالغيره
ووقت الغداء .. قلت خلني ادور لي شي آكله بس تصبيره
آآآآآآآآه يا صاحبي
شفت العمر انقضى مني بلحظة شفت أحلامي كلها مُـره
صاحبي وصديق العمر وربيع الطفوله مع حبيبي في غره
كيف اصدق ماضي وعوده وانه لقلبي وبقلبي كلمة وفا فيه مستقره
يخون حبي .. ؟ وين اللي وهب كل ما عنده وزاد في القلب بالجمر حّـره
وقفت ما عدت امشي ولا حتى قويت على البصيره
هذا حبيبي .. ؟ وهذا صديقي .. ؟ ما عدت عارف وفيني حيره
ليه الخيانه يا حبيبي .. ؟ وليه انته يا صديق العمر طعنتني بالعسيره
عرفتها انها نهاية حب الوفا .. وصدقني يا صاحبي ما هانت علي نفسي الكبيره
بديت اخطي ومشيت صوبهم حتى وصلت قربهم ولمحوني
ما شفت الا الظلام ونور كالطريق صوبهم يدليني
وكلمة قلتها للي أوهمني بحبه .. هل كنت تتسلى وتسليني ؟
ليتها هالسنه اللي مضت ما عرفتها ولا كانت من سنيني
بعدها يا صاحبي مت وحييت وكان الظلام بعيني رؤيا
وقالوا يا فلان لك ثلاث أيام مفارق هالدنيا
ولا تزعل ترا الحب بقلوب الناس ولا عليك بمن يحيا
حد عايش بقلب ميت وحد قلبه مات ومتعلق بالثريا
كم عانيت يا صاحبي من بعدها وكم بكيت ليوم فيه الشفا
ولا تظن يا صاحبي اني نسيت الجرح والحب .. تراني نسيته بالصبا
أوهبت عمري بعدها لكل حبيبين ولكل قلبين فيهم أسمى وأرقى معاني الوفا
ولا عدت انتظر يا صاحبي الا برود الجسم بعد هذا الدفا[/align]
رد مع اقتباس
