[align=center]أيام الطفوله صراحه شي (على كيفك) انواع الفله. وما حس بقيمتها الواحد الا يوم صار(جنط) وصار عليه مسؤليات كثيره:
واستكمال لمذاكراتي بذكر لكم بعض المواقف اللي مرت علي وانا صغير:
الوالد الله يحفظه ويخليه يعرف (انقلش) وطبعا تعرفون الآباء مايعرفون وبمعنى اصح مايحبون يذاكرون لعيالهم؟!
والوالده الله يحفظها ويخليها هي اللي تذاكر لنا الين دخلنا المتوسط.
المهم مره من المرات كان علينا أختبار (انجليزي) الزبده ان ابوي قعد يذاكر لنا انا واخوي (دحيم) المهم سألني عن كلمه (باص) وقال لي وش معناتها؟!
المهم صراحه ابوي مرررررره شديد ومن جد اذا (بزر بعيونه) علي انوووووواع الخوف. وتقدرون تقولون خوفي منه مثل خوف (ضحايا الزرقاوي) من الزرقاوي قبل يذبحهم.
المهم (مخي هنق) معليش بسوي فيها مخ كمبيوتري(اجل هنق)
قلت مدري؟!
المهم انواع التهزيء!! وكل مايهزئني اكثر كل ما (ابلم اكثر)
باص ياثور
باص ياحمار
غير طبعا(التفلات)الله يعزكم الموجه ارض جو وارض ارض. المهم كل وحده منهم يبي لها (علبه مناديل)
ماتعرف وش معناة باص ؟!
قلت لا
قال (باص) معناتها باص؟!!
آها اجل باص
الزبده صار كل مايسألني عن معناة كلمه (اجيب معناتها بالعربي)
يعني لو قال لي وش معناة(وتر) اقول له ووتر؟
يقول لي غلط ياثور (وتر) يعني مويه.
آخر شي درسنا ربع ساعه وتحسف قال (عمركم ماراح تفلحون) وانواع التطنيش.
ومره كنا مع الوالد في (ساعة صفا) عاد تعرفون البزران ماينعطون وجه.
وذاك اليوم ابوي معطينا وجه على الآخر:
وارمي عليه ذيك الكلمه اللي تحوم التسبد؟
قلت له والله يا بوي انك (رومانسي)؟!
رد علي؟ تعرف وش معناة رومانسي؟قلت هاه؟ لا والله
قال رومانسي (يابقره) يعني راعي حريم وغزل؟!!
وعلى طول (انحاااااااااااش) من الغرفه و(اتحصن بالوالده) عشان (مايلجني)؟؟؟
ومره خربتها مع الوالد مرررررررررره:
كان مصدع شوي المهم جبت له (بندول) واكله وشرب مويه.
المهم في قاع الكاس باقي شوي من (حثل) حاس انه طالع غبار من فمي علة هـ الكلمه( على بالي قهوه) قلت حثل.
المهم في الكاس بقايا من البندول. قلت للوالد يابوي( وعلى بالي اتميلح ) وعلى بالي بعد اني مثقف قلت: يابوي الكاس فيه (كحول)
ويالتني ماقلت هـ الكلمه؟
رجعنا نفس الموال؟
تدري وشي الكحول؟ فتحت عيوني كبر (ريال الحديد) وقلت لا؟!
قال الكحول يعني من انواع المخدرات؟!
عاد استلمني؟
وراك دايم ثور؟!
وراك دبشه ترمي الكلام وماتدري وين الله حاطك؟!
ابوي الله يحفظه (يمووووووووت في الطق) وفي الـ24 ساعه يطقنا 26 مره.
واذا غلطنا غلط كايد وكان في شغله ننتظر (اللجنه) في الليل.
وعاد على بالي مطوع اقرى الأذكار النبويه.
وفيه حديث كلكم تعرفونه يقال اذا خفت من العدو (اللهم انا نجعلك في نحورهم ونعوذ بك من شروهم) عاد الوالده سمعتني وانا اقرى الحديث واعيده.
قالت؟وراك انت؟ داخل عليك (يهودي)!!
احد يدعى على ابوه به الدعاوي؟!
ومره من المرات كنت في ملاهي الحكير. المهم كان عمري 11 سنه الزبده شفت وحده عجبتني مره وهي بزر مثلي . وانوووواع الصدمات بالسيارات انا وياها.
عاد كنت ماخذ مقلب في نفسي ذيك الأيام(والظاهر الى الحين) بس لا تصدقون
توني لي أسبوع اكتب مذكراتي.
وكتبت عن هالبنت واني حبيتها وانها تضحك لي ومن هالكلام الرخيص والفاضي.
إلا الوالده داخله علي ذاك اليوم (وخنقتني مع رقبتي) وش هالخرابيط؟وش قلة الأدب؟
وأنا عاد (تسني) ما سويت شي؟وش فيه؟وش سويت؟وش صاير؟
قالت وش قلة الأدب اللي كاتبها بالدفتر؟!!!
ومن ذاك اليوم ماكتب شي إلا اللي عندكم في المنتدى؟! ومتأكد إن أمي ميب شايفته؟!(متعقد نفسياً) من ذاك اليوم.
وان شاء الله بكتب لكم الجزء الثالث.
تصدقون حاس اني وانا اكتب (تسني اسامه انور عكاشه) وفي نفس الوقت على بالي ان سوالفي هذي بيمثلونها وتبي تاكل الجو على مسلسل(رأفت الهجان) و(ليالي الحلميه)
وبس خلاص: على قولة شعبان عبدالرحيم. [/align]