الأبيات هذي لها مناسبة
البارح كنت في زياره للاخ الكايد وهو من مبطي وهو يعزمني
المهم جيت وقابلت الاخ العزيز سهم المنايا لأول مره
ولزّم الرجال ان اقلط عنده وكان الوقت مضايقني مره
تعذرت منه وهو كان عنده اشغال ولا هو بمتعشي معنا
وبعد ماراح بساعه ارسل لي بيت على جوالي يقول فيه
شف دلتي قامت تشره وانا اقول***يادلتي والله عزمته ولافاد
ورديت عليه بهذي الابيات اتمنى ان تنال اعجابك
واتمنى ان تمنعني من شرهة مفرح
اقول فيها
سلام ياحرٍ على الطيب مجبول***الصاحب اللي شوفته عيد الأعياد
جتني مراسيلك وانا حييل مشغول***ولاشك شفي في مراسيل الاجواد
قل للدلال اللي اتشره على طول*** علامها ماتعذر كبار الامجاد
قل للدلال اللي بها الهيل مجعول***ضيف الكرم يلفي على غير ميعاد
قل للدلال الضيف معزوم من حول***وان اخلف الموعد وطاه التنقاد
ياشرهة العاقل من العرض للطول***الوقت خالف هقوتي وشد الاوتاد
واما انت ياسهم المنايا فمصقول*** سيف على رقاب المعادين منقاد
تحياتي للجميع
الواثق