بسم الله الرحمن الرحيم
يالله حيهم وبيهم ......... وشلونكم ياشلة المماليح .....
على فكرة كان ودي إني داري عن مسابقة المقالة الساخرة عشان أشارك بها .....
بس يالله خيرها بغيرها ....... :(
بصراحة كنت أفكر من مدة كيف أصيغ كتابتي عن موضوعي هذا ........
طبعا كنت محتار مابين إني أكتبه بالفصحى أو بالعامية .
ولكني قررت أني أخلي كل كتاباتي الجادة القادمة أو على الأقل أغلبها تكون بالعامية .
لن الهدف من المقالة هو " توصيل فكرة أو إنتقاد أمر ما " . عموما الهدف بسيط ومايحتاج أن الواحد يطلع مكنوناته الأدبية ويصيغها بطريقة فنية ليخرج لنا بتحفة أدبية .
عموما " سأخش " مباشرة في موضوعي ........
مايخفاكم إني خرجت للتو من كورس عن " الأسرة والترابط بين أفراد المجتمع " .
وقلت في نفسي ياولد مادمك عرفتا شي جديد فلاتحرم الآخرين منه مهما كان هذا الشي قليل أو بسيط .
===============
كلنا نعرف أن الأسرة وزي مادرسنا في المرحلة الثانوية في كتاب الفقة صفحة 85 السطر السادس <<< وش عنده الدافور حافظ رقم الصفحة .
الأسرة عرفت من كل الناس بأنها النواة الأولى والخلية الأساسية والمكون الأول للمجتمع .
وأي شي في العالم إذا كانت أجزاء جيدة فإنه بالإجمال بيكون جيد وممتاز .
والأسرة إذا كان أفرادها جيدين , كان المجتمع جيدا بإذن الله .
إذا كيف نخلي الأسرة تكون جيدة ؟
هنا السؤال المهم .
طبعا الأسرة تتكون من أب وأم وشلقة بزارين ...
وطبيعي جدا أن الأم والأب يبثون في أبنائهم طباعهم وأخلاقهم ويكونون مؤثر أولي في تكوين شخصياتهم .
فقد روي عنه قوله(صلى الله عليه وآله): (مامن مولود يولد الا على هذه الفطرة فأبواه يهودانه وينصرانه)
يعني الأب والأم هم اللي يخربون أو يصلحون الأبن .
وطبيعي جدا أن الأب في الغالب هو البذرة الرئيسية للأسرة . لييييييييش ؟ .
أنا أقولكم ليش ! ....... لأنه هو اللي أبلشنا عشان يتزوج فلانه ويوم تزوجها عاد مايندرى هل بتكون صالحه مصلحة له أو تكون نقمة ووبال عليه .
ولانقول إنه هو عاد ملاك منزل من السماء . حتى هو فيه حقه .. دعرمّة دعلة عربود إن قالوا الناس شرق قال غرب ( <<< جميع الأوصاف المذكورة سابقا تعني معنى واحد وهي إنه طبعه شين ) ........
عموما ....
أنا أقصد من وراء كلامي ذا كله , إن الأب والأم إذا كانوا صالحين وأخلاقهم إكه ( يعني كويسين ) أكيد بإذن الله بيطلع لنا مجموعة بزارين صالحين إنشاء الله .....
إذا من أول أسس إختيار الأسرة هو الإختيار ....
نعم إختيار الزوجة وإختيار الزوج ....
إيه إختيار الزوج وشفيكم مبققين عيونكم .... ترا حتى الحرمة تختار موب بس الرجال .....
طيب ماعلينا .... الإختيار هذا بيتم بناء على وشو ؟ ..........
يعني إذا صارت زينة " زينة وإلا نحول " <<<< الظاهر عقب هذي محد مكمل الموضوع .....
المقصد إذا كانت زينة نتهافت عليها ؟
طبعا ماأبي أطول في هالنقطة اللي كلنا أكيد نعرف حديث الرسول اللهم صلي وسلم عليه حينما قال : [ تنكح المرأة لأربع : لمالهـا ، ولحسبها ، ولجمالهـا ، ولدينها ، فاظفر بذات الدين ، تَربت يداك ].
موب إذا رحتا تشوف لك وحده ولقيتها زينة خلاص تخق وتقعد تسعبل وتسلهم عندها ..... لا ياحبيبي .....
قبل لاتروح يابو الشباب شيك على أخلاقها أول .... وأنشد عن أهلها ... وقبل كل شي شف وشلونها مع شعائر دينها وفروضها .... وأخر شي رح ناظر وجهها ....
وبعدين فيه نقطة ودي احتسي عنها ... مع إحترامي لكل بنات بلدي .....
بس تراها ذا الشباب اللي مايبون إلا بنات زينات والبنات اللي مايبون إلا شباب وسيمين وجسم صح ..... ترا والله قليل عندنا هنا بالسعودية تلقى مواصفات صح .......
كل مواصفاتنا سياحيه .......
يعني إن لقيتا وجه منتب لاقي جسم وإن لقيتا جسم منتب لاقي وجه وإحتمال كبير ماتلقى الأثنين كلهن .......
لكن ناظر للدين ....... وأنا أبعد عليك اللحين فوائد المرأة المتدينة ....
أول شي تكفيك شر الشك وقانا الله وإياكم منه .......
ترعى عرضك وتصون بيتك وتراعي الله فيك وتنصحك لدينك وتقوى صلتك بربك بإذن الله ( لأنه ماحد يقوى على الرجال مثل حرمته ) ..
تبون زود بعد ؟
طيب سجل عندك .... تنشـأ أولادك على الفطرة السليمة , وتحببهم فيك وتحب أهلك وتصل رحمك وتبر بوالديك . ( لو مايجي منها إلا الأخيرة تكفي عن الجمال والمال وكلش ) .....
عموما أبوقف هنا لأني شكلي طولت بس أحب أخبركم بأن الدعوة سلسلة يعني في الحلقة الجاية أبقولكم كم سالفة عن الخطبة وعن رؤية المخطوبة ....
وسالفة أبو حمد اللي جلد الخاطب اللي جاء لبيته .....
وتمسون على خير ........
أبوقهر ........