[align=center]السلام عليكم ورحمة الله وبركاته
اتمنى ان يكون الجميع بخير وصحه وسلامه
اعلم انني مقصر كثيرا في تواجدي وحضوري خاصة في الشعر
ولكنني التمس العذر منكم لظروف منعتني من التواصل الدائم
واتمنى ان تنسيكم هذه القصيده غيابي
وان تحوز على اعجابكم [/align]
[poem=font="Simplified Arabic,4,black,normal,normal" bkcolor="transparent" bkimage="backgrounds/8.gif" border="none,4,gray" type=2 line=0 align=center use=ex num="0,black"]
الله يا قلب (( ن )) من البعد جزعان = البعد لاعه لين ضيع دليله
من لايع الفرقا غدا القلب حيران = حتى الروابع كل يوم تكيله
لاناموا السالين في الليل سهران = اسامر نجوم السما كل ليله
وقلب من الفرقا تصاليه نيران = نار (( ن )) تشب ونار تكوي بحيله
غربه وبعد وهم وافراق خلان = يا صعبها فرقا الخليل لخليله
ياصعب فرقا الربع وافراق الاخوان = عليهم دموع العين تنزف هميله
فارقتهم واصبحت في داخل احزان = والكبد من هاك الموادع عليله
عسا السحاب الي تردم بالامزان = جعله على نجد العذيه بسيله
ديرة رياجيل الوفا طلق الايمان = ياجعل يسقيها المطر من مخيله
من عقب نجد بدار الاجناب طفشان = ارض الجنوب الي قليل الحصيله
وياراكب الوانيت وارد سوبرمان = توه من المصنع جديد مديله
طرز الجميح وشد صنع الامريكان = مصدر مجهز في محطة وكيله
هو منوة الي للمواليف شفقان = لاتله الملهوف يبرد غليله
كن الرعد يرزم على كل شكمان = وكن القزوز مترجمات تحكيله
يسري مساري الذيب والذيب سرحان = يشرب قراطيع الهوى من عويله
من ديرة الصيعر قبل يبدا بالاذان = قبل الفجر جهمه وقبل المقيله
يجهم ومهزاعه قبل ياصل لنجران = يمين درب الجمس له مستويله
لاشيك البنزين مافيه نقصان = كن الهوى سرع المراوح تشيله
خلى القرى مثل المطب وهو عجلان = لين الف وخمس من الكيلو يكيله
وعانك دخلت بدار حامين الاوطان = حيث الرياض ودار فالح تجيله
واليا وصلت الدار منته بغلطان = اقلط على الطيب وهو يحتميله
في مجلس (( ن )) مافيه كاذب وخوان = فيه الرجال وطيب (( ن )) ينعنيله
وابد السلام وحاضر العلم برهان = ياصل سلامي في البيوت الجزيله
واثن السلام لكل شايب وشبان = وللي من العربان دايم تجيله
لاشك هذا الوقت في كل الاحيان = نمشي على هذا الزمن ونعديله
وذي عادة الايام راحل وسكان = هذا يحل وذاك يعلن رحيله
لو كنت للبعد مجبر ووجعان = بعدي ولا هرج النفوس الرذيله
لو بان شيب الراس ما قلت شقيان = ومن لا يمجد وقفته عزتيله
ويالله يا عالم بحالي وما كان = تفرج لحال (( ن )) من شقاها نحيله
وطالبك ياربي من الذنب غفران = ياغافر الزله لمن يشتكيله
وصلاة ربي عد سيل (( ن )) بوديان = على الرسول الي على الخلق تفضيله
اخوكم
رهين الوقت [/poem]