اخواني واخواتي
اليكم هذه القصيده والتي
قد ارسلتها لزميل وخوي
لي في العمل تعرفت عليه اثنا الدوره
وهو سعدي بن غالب الحارثي
وسببها انه من الذين يهوون البر
وشبت النار وقد طلعنا طلعه
يوم الثلاثا الفايت وشبينا
النار وكان هو من يسوي القهوه
والشاي والقرص المقمر
فعديت ضلع مقابل لنا وتهيضت
بهذه الابيات ارجو قبولها
وبدون قصور في الجميع
.[poem=font="Simplified Arabic,6,white,bold,normal" bkcolor="transparent" bkimage="backgrounds/22.gif" border="double,4,gray" type=2 line=0 align=center use=ex num="0,black"]
يقول من طاب له قافه وملعوبه=وقام يسترسل ابياته ويتخير
فرايدٍ من هجوس حسين وإسلوبه=زهمتها واحضرت طوعٍ على الاسطر
ياما حلا جلسةٍ والنار مشبوبه=طعامها العتم والا سمر يتوهجر
وإدلال مجذيةٍ ودلال مصبوبه=معبر الماء بها وبهارها معبر
دوبه حمس حبها فوق الجمر دوبه=ودق في نجر منهو يسمعه يحضر
سواها قرمٍ مشمر لأجلها ثوبه=يشوش راسك لشفته جالس مشمر
شروى لبو سيف سعدي جعل من جوبه=في جنة الخلد مشربهم من الكوثر
كريم سبلا يدينه اخلت جيوبه=ياسعِد من جاه طرقي أو لفا مضطر
ياعنك ماهو معود دون ماجوبه =او دون يقضي لزومه وانا فيه اخبر
عبيه مولع في البر واكبر عيوبه=واللي يلومه ماعاش ولامشى فالبر
وجدي على خوته ومعانق دروبه=نمسي ونصبح بديرها عشبها مخضر
فيها ام سالم لحنها زان مسحوبه=والجندب مع الضحى شبعانٍ يصرصر
نشرب قراحٍ وخلفه دوب محلوبه=صبوح والا غبوقٍ ماهو مبستر
شهرين فالبر معدوده ومحسوبه=على حليبٍ وتمر وقرصٍ مقمر
واليا هقمنا نطلع مافي جروبه=بنادق تعجبك بالفعل والمنظر
احدٍ رقا ضلع واحدٍ حدر شعوبه=وان شيف صيده عليها سمي وكبر
والعصر كلٍ وصيده مثقل جنوبه=واقل واحد معه ظبيه ومتكدر
نشوي ونطبخ ونهدي للبدو نوبه=والزايد نعلقه في جانب الموتر
يومين مابان به عيبه وعذروبه=طازج وهو مادخل تبريد وفريزر
هذا هوى قلبي وشفه وطلوبه=والرجل من غير شفه عيشته تقهر
ابا تسلا واسلي نفس مغصوبه=على ضعوفٍ بداخلها الحسد عمر
تضحك والا اقفيت رجلي حِش عرقوبه=علمٍ تورده والثاني له تصدر
ردي عقوبه وصدي عنهم عقوبه=رخوم دايم على الغرات تتبشر
يالله بخير العمل والتوبه التوبه=ياعالمٍ مانكن وكلما نجهر
واغفر ذنوبي وغيري اغفر ذنوبه=قدام ندفن ونبعث عري في المحشر
يومٍ طويلٍ وفيه الخلق مرعوبه=حفاةٍ اعراه محدٍ يم أحد ينظر
وصلاة ربي عدد براق بنصوبه=على شفيع البشر في يومنا الاكبر
وسلامتكم جميع[/poem]
رد مع اقتباس
