السلام عليكم
حياكم الله وياهلا فيكم ( أحلى تراني أعرف للتراحيب )
تعرفون المثل إلي يقول ( الحلو حلو حتى لو قعـد من النوم )
فما بالك والحلو ذا بكامل زينه أكيد بيقول وخرو عني بس
يوم الخميس الي أقفى ,, قمت من النوم
الشعر شوشه وطفشاااااااااااااااانة طفش ما حصل و.. (والا مالوه داعي حتى ما تهجون)
كل ذا عشان عندنا عرس ومالي خلق أروح
لأني ما تعودت أحضر عرس بالديرة ذي
وكل عروسنا بالديرة ذيك (ياهي غثه)
اختكم بورطه ,, بس الحمد لله كان فيه صالون نسائي ( كوافيرة يعني )
زيييين حول بيتنا
دقيت عليهم وقلت اني أبحجز عشان عندنا عرس اليوم
وانا أول مرة أروح لهم
لقيت المرة (الي ردت) متشققه عالاخرررر
قالت لي :
لا لا لا .. مالوه داعي الحجز .. بمجرد إنك تدخلين يصير لك ما تبين (هذا شعارهم)
عاد أنا طرت وأخذت عباتي وعليهم سييييدة
دخلت المحل والا مافيه غيري وفرحت وانا أقول بنفسي :
والله انتك ذكيه يا بنت جيتي بدري
المشكلة لامني حكيت أسمع صدى صوتي يلعلع بالجدران
بدت الهواجس تصافق برأسي
بس عاد بلشنا وقلت معليش يمكن المحل جديد ما امداه يشتهر وسعي صدرتس يا بنت وشوفي النتيجة بعدين احكمي
وفجعتن
تجي هالحرمة الي مسوية الهوايل بعمرها ,, مكياج وتسريحة واصلة للسقف
بنسات أحمر وأخضر وأصفر ,, كنه اشارة هاجة
وتمشي مغمضتن عيونها عشان تورينا الشدو الي ما شاف الملح
قلت :
يمكن هي ذوقه مخيس بس شغلهم زين (ما ادري شلون تجي)
أكمل أقووول لكم
سلمتهم رويسي بما فيه من قراقيع وأفكار
وشوي الا الحريمة تقلب الكرسي على ورا وتخلي المراية من مقفاي
الظاهر ان المراية سر خسارة المحل
مع كذا قلت :
يمكن هذي ميزة لتوفير عامل المفاجعة )عاد تورطنا وش نسوي)
قعدت تحوس برأسي وترطنن ما ادري وش تهبب
ولولا طولة البال ولا كان علومن سنعة طلعت
المهم خلصت هي من شعري ,, وقمت أبدخل عشان أشوف التسريحة
الا تزعق بأذني تقل ماسه كهرب :
NO
حسيت اني بأهرس خشتها البالونية
بس بلعت لساني وقلت طيب ,, عشان ما تتنقم مني وتخرب شكلي
ورجعت انثبرت بالكرسي
وهي راحت وجابت علبة المكياج بعد ما انفضت غبرته
ماركتن ما ادري وش هي ,, يالله معليه
وبعد حال ومحتوى قضت مني بطلعت الروح
المشكلة ,, ما سألتني وش لون فستانتس و وش تحبين مكياجتس يصير
كل الي قالتوه :
انته في هيب موده؟؟ ,, أنا فيه سوي لاست موده بين قوسي موضة
بعدين جابت لي المراية
بسم الله الرحمن الرحيم
سكنهم مساكنهم
تروعت
مدري هذي أنا ولا فيه جنيه واقفه قدامي
من وين جابو هالشيفه
الا تطلع شياطيني
وبديت أهذري وأقط خيط وخيط (بكرة خيوط طاحت)
المشكلة اهاوش وانافخ وهن ماغير يقولن :
مافيه مشكل انته فيه صير مررره هلووو ,, روه هفله بأدين شوف
انته اتلع أحلا واهد في هدي هفله
قولي أمين .. جعلتس الهفة الي تقشعتس من مكانتس
والهلاك الي يهريتس هري يا البرطم المتحرك
ركبت السياره وانا أباكل نفسي من القهر
والمفروض اروح من المشغل للقاعة
عاد وصلت
ويالله نزلت
شوي ويرفسن اخوي للباب (كان موصلني وهو شاهد على الكارثة)
ماااااش
الوضع كان دمااااار على الأخر
بس نزلت وقررت أنضم لفئة المغاتيير
وهم : "نساء ملاقيف يرزون أخششهم للبحلقه بالأعراس والمناسبات"
عاد من وين يصير الي ببالي واختي مرتزتن عند الباب
اعرفتني من شنطتي
والا لوعلى السمجه كان ما درت عن أبد
اختي :
هلا يا الشينه ,, يالله وريني كشختتس
وانا بالعتن الساني وزين متحملتن روحي مع هالعشه الي فوق رأسي
فصخت عباتي أول
والا تصرخ بوجهي يامال القطع
انا خفت انها المحت وجهي ومكياجي
اثر وحده من صديقاتها وقفت وراي وكانت ترحب فيها
عاد ما امدان أفك الغطاء من وجهي
الا اسمع المشاهق من ضحك وتطنز
والدمعة اخذت طريق الدائري بعيوني ,, تبحث عن منفذ
بس ماش ,, الكحل كنه صبية عجز يسيح
أخذت زاوية بالصالة وانا على أعصابي
اخاف احد يقرب من عندي ويوسع صديره علي
الا تقبل ذيك العجيز الا كنه مركبتن كفرات من العجلة
وابدأ أنا اناقز بالكرسي كن أحد قابصن ,, اتصفط يمين ويسار
هي قعدت بالكرسي الي جنبي
تسبح وتهلل ,, وشوي الي تقول :
وش اسمتس يا المزيونه؟
أنا بديت أتلفت وأدور الحلوة الي لافزتن منا ولا منا هلي طاقتن المشوار عشانها
بس المشكله مابوه أحد غيري
قلت :
تقصدينني يا خاله ؟؟؟؟؟؟؟؟؟؟؟
ردت :
ايه الله يحفظتس ,, مين بنته أنتِ؟
عاد انا فجيت كشرتي :
بنت أمي وأبوي (اقلبي وجهتك يا الطينه)
وهي تغير وجهه
الظاهر تضايقت ,, ترى هالعجز ما ينمزح معهن
ردت علي :
وين امتس ؟
قلت ببلاهة :
هذاه ,, الي واقفه هناك ,, ام فستان قوس قزحي
شوي الا تشغل الكفرات وتسحححححب
الغبرة تطايرت والحريمه ارتزت قدام اميمتي ما ادري وش تقول له
تك تك
طن طن
دقت الساعة 3
مابغينا نخلص ونفتك من هالعجز
انحشرنا بالسيارة بعد ما داخن خواتي من الرقص والترزز
وامي هجت من طابور المهذريات
وصلنا دارنا وشبينا النار على الشاهي الي على كيف كيفكم
عشان نمخمخ بالحش على اصولووووه (ترى هذي عادة كل بيت مهب إحنا بس)
رحت اسأل أمي :
وش عندهن العجز صافات عندتس تقل باب مسجد؟
وشوي ,, الا الوجه ينور والابتسامة تلعلع ترد وتضحك:
الظاهر جازت لهن البربسه الي بخشتتس وهالعشه الي على رأستس
انا تسمرت بمكاني
ما ادري أضحك ولا أقطع روحي من القهر
الحين ياما كشخنا وما كنا نعجب والحين يوم تدحوسنا صرنا ششششي
تدرون عاد
لاعت كبد أخوي يوم سمع هرج امي
وقال له :
الله يعافيتس يمه لا تخطبين لي أبد ,, مير هونت ما ابي اعرس
والله ما الومه
هالعجز عليهن طلعات بصراحة تشيب الرأس
المهم
من يومه وخواتي وصديقاتي خاصة المقربات مني ;) معسكرات بالصالون
تركن الموضة على جنب (اثره ما توكل عيش)
قصة وسيناريو وحوار
مـللللللللللللللللللللللل لللللللللتووووووووووووشاا ااااااااااااااية
رد مع اقتباس
