[align=center]
غرابيل
قلت حروفي في الآونه الأخيرة
علّهم روادك ومرتاديك
يغفرون خطيئة الابتعاد
بلحظة الوصل
اتمنى ان تروق لكم
طلال ..
[poem=font="Simplified Arabic,4,black,normal,normal" bkcolor="white" bkimage="" border="outset,4,gray" type=1 line=0 align=center use=ex num="0,black"]
القاف يطربني ليامن بديته = وحروف قافي في عيوني مليحه
وإن ضقت اسويها على اللي بغيته = أترك مخابيها وأجيب الصريحه
والفكر يتثنى ليامن طريته = وإن زان فكري له تجود القريحة
فياراكب اللي للسلاطين صيته = جيب(ن) من الوعرات كاسب مديحه
سوبر سفاري جمّلك لاعطيته = يعطيك مايبخل عليك بكديحه
لونه كما ليل الدجى لاسريته = وإليا سرا ماقدم بديه يزيحه
وإليا لقم بإثنين حر(ن) نخيته = زاد انصرامه والحباري سديحه
منصاك شخص(ن) فالبشر لا إلتقيته = تلقى الشبب والعود ويّا الذبيحه
وتلقى العلوم الغانمه لا لفيته = وتلقى العرب في مجلسه مستريحه
يندل فالشده وفالضيق بيته = وأقسى صواديف الزمن ماتزيحه
حر(ن) قطامي فالنوايف لقيته = عالي ومن عاداه ذاق القميحه
لامن نخيته حل ماقد رجيته = وخلى المشاكل من ورايه طريحه
والهم لا أطغى ببوغازي كويته = أبيح له سر(ن) حشا مايبيحه
فإليا لقيت الصاحب اللي نصيته = سلم جوابي علّي ألقى النصيحه
وقله ترا حالي غدت شبه ميته = من صاحب(ن) عجزت لا أشم ريحه
الصاحب اللي بالحياة اشتريته = صد وعساي أعرف وش اللي يريحه
ضاق الزمن فيني وأنا مارويته = وأمسيت ضايق والمشاعر جريحه
ماغير أدوده والعذاب ابتليته = مرات أصيح إله ومرات أصيحه
من بعد ما أصبح حلمي اللي بنيته = أمسى ألم جا للفرح يستبيحه
يضحك وأنا من دم قلبي بكيته = ويخلط حكيه الجد ويّا مزيحه
بين الضلوع الحدب بيته بنيته = ووسط الألم خطط لقلبي مطيحه
يلعب على عمري وفيه إفتديته = وألذ لعبه من مذاق الشريحه
مثل الشهد ريقه وحكيه وليته = يسمع نداي وحبنا ما يطيحه
ويزيد شوقه والتجاهل يميته = ويكتب لقلبينا حياة(ن) مريحه
وألقاه فالنسيان لامن نسيته = ويقرا الغلا داخل عيوني وابيحه
وأقرا عيونه وأكتب اللي قريته = شعر(ن) عليه الحب كابح جميحه
وأدندنه في لحني اللي هويته = وأرقص عيونه محبه وأطيحه
في بحر شوق من الخيال إصطفيته = واتضمضمه لأمواج وتهب ريحه
واضمضمه بالحب لامن ضميته = وأزيل كل الخوف عنه وأزيحه
وأذوب لامن ضمني واحتويته = وأجمد على صدره محبه وأسيحه
وأعطيه كل اللي بعمري خذيته = وتزهر له بجوفي ركون(ن) فسيحه
وأعامله باللين وإليا عصيته = يارب تجعل خاطرينا سميحه
وإن حل ذكره بالكلام إنتشيته = كن المشاعر بالمحبه لقيحه
وإليا سهيت أسهاه كاني سهيته = وأبني بسهوي كل فكره رجيحه
وإليا تضايق من همومه حميته = لين الهموم إن حل ذكره تصيحه
وأبختره بالحب واللي جنيته = وأخلي العذال تحته رزيحه
لكن خلي يحسبني جفيته = وأقفى ومن فكره غرامي مزيحه
مدري وش اللي غيره يوم جيته = صد ونطقها قال فرقا(ن) صريحه
ماقدر اللي من حياتي عطيته = ياعبيّد ولا قال وشو يريحه
وهذاه حظي خابره من وعيته = إن زان يلقى مايسبب مطيحه[/poem]
آسف على الإطــاله..
رد مع اقتباس
