متعلق فوق الشجر ... والقلب متعلق بمضنوني
متى يحين الفجر ... وأشوف الغالي بعيوني
^
^
أجل بتشوفها بخشمك :)
وعند الفجريه فك قيودي جدي وبدون أي كلام على الغنم وأفك شبكها ,,
وعلى المراعي والشمس ما طلعت ... باقي بعض الغنم يتثاوب في راسه نوم وأنا مسرحهم بدري ,
وأنتظر .. وأنتظر .. طلعت الشمس وأرتفعت ولا جات.. هذا الظهر ولا جات .. هذا العصر ولا جات
جدي أستغرب إني مارجعت الغنم بدري ,,
قال ماشاء الله على بندر صار عاقل ويخلي الغنم ترعى زين ..
ما درى إني منبطح على الأطلال وأرقب من خطفت قلبي ,,
وبعد ساعة من المغرب فقدت الأمل في جيتها ورجعت وأسحب خلاقيني ..
دخلت على جدي الكوخ ..
جدي \\ هلا يا بعد حيي بندر وش فيك اليوم عسا ماشر طولت بالغنم .
( بندر ما يرد وساكت )
جدي \\ ورع بلا في شكلك وش فيك .
بندر يرد مفزوعاً \\ هلا جدي مافيني شيء بس شفت الغنم مستانسه وكملت وناستهم وتأخرت .
جدي \\ أيييييه عااش مصرف .
....
ورحت لفراشي أبيع وأشتري في الأفكار .. ليه ماجات ... لا يكوون .. أو لا يكون .. لا لا صار كذا ..
لا صار كذا ..
أختبصت ولا نمت ..
طلع علي الصبح وأنا قاعد أتحكحك تقول إني جربان ..
وجيت أسرح في الغنم لكن جدي لقيته مطلعها بيروح معها ..
جدي \\ صبحت بالخير بندر روح كمل نومك أنا اليوم بأروح مع الغنم طفشان وبأطير طفش .
بندر \\ لا لا جدي ريح أنا روح للسوق أو طس .. قصدي روح بأي مكان الغنم بأروح معها أنا .
جدي \\ طس أنت يا الخمام أنا الي بأروح وانت أنطق هنا .
بندر \\ وش رأيك نروح سوى << أقولها وأنا عاض على ضروسي من القهر عارف إني جدي بيخرب .
جدي \\ يالله ألحقني بقربة المويه .
....
وألحق جدي وانا أقول وش يبي ذا .. ألحين لو تجي عمشا وش أسوي كيف أكلمها قدامها
بيسوي فيها عيب ومشاكل .. ويحرك خيول الجاهلية ( درقن درقن درقن )
جلسنا تحت شجرة أنا وجدي بعد الضحى ..
جدي \\ إيييييييه مبطي عن رعي الغنم .
بندر \\ لقيت الخبل الي يروح بدالك .
جدي \\ بندر أنا تطفش من الغنم ؟
بندر \\ لا لا مبسوووط مررره أنا في نعمة تحسدني عليها رؤساء الدول .
جدي \\ تتريق بالخبل ..
بندر \\ مو قلت لك لقيت خبل .
جدي \\ أنطم ..الغنم رعيها شرف .
بندر \\ خله لك أنا ودي أرووح للمدينة . الغنم قصمت ظهري .
جدي \\ المدينه ضياع .
بندر \\ خلني أضيع تكفى مشتاق أضيع .
جدي \\ بندر وش رأيك في هالشجرة .. بس ناقصها حبل .
بندر \\ طيب طيب شرف شرف شرفني يا جدوو .
جدي \\ أيه أركد .
(( ومن بعيد لمحت غنم عمشا .. وأستبشر القلب ومادريت عن نفسي إلا وأنا أغني
هلا بالي لفاني يا هلابه .. عدد دقات قلبي في غيابه ))
جدي \\ الله يسلمك الله يسلمك .
بندر \\ ماهي لك يا شايب الشريه ..
( وأقوم متجه يم غنمها وقلبي يسابق خطاي .... وهي يوم شافتني جتني تمشي خطوه تسوق الخطوه بهون وركود )
بندر بدون سلام \\ وين رحتي يا عمشا أمس دورتك ما لقيتك .
عمشا \\ كنت تحبانه . بس ليه تدورني .
بندر \\ سلامتك والله فيني ولا فيك .. كنت أدورك علشان ...
عمشا مقاطعه لبندر \\ وش فيك يا أبو لا تكون تميلح حلي وتسوي غزلنجي ,.
بندر \\ وليه ما أصير غزلنجي وأنا أشوف هالزين قدامي .
عمشا \\ لأنسل الشبشب على راسك .
( جدي من بعيد يصايح .... بندر ووجع من هذي يا فضحنا فضحااااه .. وأشتغلت خيول الجاهلية
درقن درقن درقن ... وخمني بشعري وقام يسفطني ضرب .. وهو يشتم يالخايس تعترض طريق بنات الناس
يالي ما تستحي ))
عمشا أنحاشت من قدامنا وكل شوي تلتفت وتلاقيني تحت رجل جدي يكفخني .
وسحبني للكوخ .. وقال من الآن وصاعد ما تروح للغنم .
يا جدي هذي عمشا ..
جدي \\ وأنا وش دخلني في عمشا ..
بندر\\ البنت كانت تعبانه ياجدي وحبيت أتطمن .
جدي \\ عيب يا بندر عيب ,.
بندر \\ يا جدي أنا أحـبـ ..
جدي \\ أيييييييييييييش .. يا فضحنا فضحااااااه .. أنت بتجيب لنا مصيبه ..
بندر \\ جدي لا مافي ...
جدي \\ أوووص بالخمام ولا كلمه لا اشوفك عند الغنم .
...
...
...
نمت وأنا متأثر من الضرب .. وغبت عن المراعي يومين ..
وبعدها وعدت جدي ما أعترض لها مره ثانيه بس يخليني أروح أرعى الغنم وأريحه لأنه تعب ,,
...
ورحت ولقيتها تنتظرني ..
عمشا تركض يمي \\ هلا بندر سلامات أبطيت حلينا ... جدك أفترى فيك ضرب .
بندر \\ لعيونك .
عمشا \\ أقول أحقل .ترا بأنادي جدك .
بندر \\ طيب طيب يا مرعبه ..
...
وبديت أنا وعمشا نتقابل بالسر,,
ونسولف نسولف .. وضحك ولعب ..
وناااااااااسه لآخر درجه
......
إلى اللقاء في الحلقة القادمة ...