بعد معاناة زوجة جايب لكم اليوم قصيدة أخرى كذلك للشاعر حسن باحارثه بعنوان معاناة زوج من شـــــأن نحــــقق الـــعـــدل لانه زي مافيه أزواج منغصين على زوجاتهم كذلك فيه زوجات منغصات على أزواجهن وهذة القصيدة تعــــــــــــبر عــــــن حـــــال بعض الازواج مع زوجـــــــاتـــهم
معاناة زوج
جميله كاملة لوصاف باالصدفه ألاقيها
ونصبت لي شباك الحب ونا قلبي وقع فيها
وعرّسنا وخلّفنا وذي قصتي أحكيها
جميله أصبحت أخرى تغيّر كل شيفيها
وأصبح فرق واجد بين حاضرها وماضيها
تبهذلنا تنغص عيشتي الله يهديها
ومن مشوار إلى مشوار بااللازم أوديها
بغيناها تربّي للأسف صرنا نربيها
ويا مكثر مطالبها ويا مكثر مقاضيها
ونا باالرغم من ظرفي مطالبها ألبيها
ولو طلبت لبن عصفور أجيبه مقدر أعصيها
تحب تظهر تحب تفخر وتوهم اللي حواليها
بأن ماحد معه قدره في المظهر يجاريها
ذهب في صدرها كيلو وكيلو في أياديها
ونصف الراتب الشهري خياط الثوب لي فيها
ولو ملكت كنوز الأرض يمكن ماتكفّيها
بأشياء تافهة تهتم وجم أشياء تخليها
وتهمل واجبات البيت ماتفْضَى تسويها
وحل الأنس تذكر لي مشاكل كنت ناسيها
وتلبس لي ملابس ألف مره شفتهن فيها
تولّع نار وسط البيت حمراء إيش يطفيها
وباالأوهام والغيرة مريضه إيش يداويها
ومعها أغنيه في الليل والبكره تغنيها
(مروّح وين ،قل لي وين أوقاتك تقضّيها)
ولو جاوبتها ماصدّقت ،وحلان أنا فيها
وتتْهمني وتحسب اني معي أسرارأخفيها
تنرفزنا وتحرمنا السعاده لي انا فيها
أنا من هذي الزوجة مشاكل جم أعانيها
ومن أجل العيال أصبر وأتحمل بلاويها
نصيحه من شريك العمر يا زوجتي سمعيها
عمارة حبنا انتي ونا مفروض نبنيها
وشجرة حبنا مفروض باالإخلاص نسقيها
ونرعاها بنيّه صادقه وبلطف نجنيها
نعيش أفراحنا، وهمومنا في البحرنرميها
وساعة ود تسوى هذي الدنيا وما فيها
رد مع اقتباس
