مدخل )
(
)
من زود حب الوضح سريت انا الليل=على اللذي يطوي بعيد المسافات
السلام عليكم ورحمة الله وبركاته
ازيكم ياحلوين
ان شاء الله اموركم تمام وكيفكم مع شباط
الا على طاري شباط سمعت ان الزنجبيل مرتفع سعره هو صدق ولا لا
اليوم سلمكم الله جايب لكم صور من رحلتي الخميس الماضي جهة الشمال انطلاقة من الرياض ثمن مررت بالدوادمي لي هناك شغيل على الطاير ثمن القصيم ثمن شمال القصيم لين وصلت حايل يابعد راسي ياحايل واهلها
ماكان لي نيه في التمشيه لكن يوم جاء يوم الثلاثاء ارسل لي اخوي ابو رامي رساله وحركة المشاعر عندي شوي وفتحت الشهيه للتمشيه البريه
اخوي ابو رامي من شمال عفيف ارسل لي ابيات مشهوره مدري من شاعرها ومصور لي صورة الربيع والابل
الربيع بعيد ومن دونه حتيفه=مايطوله من يبي قرب البلادي
تاصله وضحاً زهت زين السفيفه=بالوصايف وصفها وضحا سنادي
عيبها تبعد وليفا عن وليفه =وتتعب الرعيان في حر وبرادي
وبعد ماوصلتني اتصل بي وقال وينك قلت في الدوام قال خلك في الدوام الارض ربيع ووناسه وانت جالس في المدينه وازعاج السيارات قلت غصب ياذعار ماهو بكيفي ومير شوي وارسل عليه هالابيات واتصل على رفيق الدرب عقاب قلت ماعاد هي بلحية مجلاس نبي لنا تمشيه وابيك تخاويني قال عقاب ابد مرني وانا جاهز وهذه الابيات اللي ارسلتها على اخوي ابو رامي اقول فيها
راكب اللي لامشى كنه قذيفه =من مدافع جيش في وجه الاعادي
جيب لكسز فل ماشين نظيفه= منوة اللي عايفاً لذ الرقادي
من الرياض ومتجه يبى عفيفه =ساعتين ونص له حروة هجادي
نصه اللي تكرم اليمين ضيفه=مسندي لامن بدا في الوقت بادي
ابو رامي محكم الارياء الكليفه=لابدا فالراي عشرات واحادي
خبره بالحال وضروف الوظيفه =عن نحاكم حدني ياذعار حادي
الزمان الشين ضدي سل سيفه= اطرد الاهداف ولا حقق مرادي
واهني من سج في نجد المريفه=مبعدن عن المدن واهل الدوادي
والختام المسك في القيفان اضيفه=والتحايا معطره بورداً وكادي
المهم تحركنا من الرياض يوم الاربعاء بعد الضهر مباشره وكانت انطلاقتنا من الدائري الشمالي قزازة السياره ماهي نظيفه لا تدققون :)
ثمن اتجهنا من الرياض الى الدوادمي وهذه بداية النزول من طلعة القديه غرب الرياض
وهذه بعد مابدى الخط يستوي لنا
السرعه المقطوعه في السفر والحمد لله على السلامه
ترى ماهو تهور لكن من زود شوفي لنجد ودي ابعد عن الرياض وازعاجها
ثمن على خط الرياض الطائف السريع ثمن طريق لبخه حويته ثمن الدوادمي ثمن مرينا المزرعه وشيكنا عليها هناك
ثمن التقطنا هالصوره من جنب المزرعه وحنا ماشين ع الخط
نبي نمشي قبل الليل :)
وهذه لقطه وحنا ماشين
ثمن مشينا مع هالطريق الزراعي من الدوادمي جهة القصيم على طريق نفي الرس البدائع ثمن مروراً بعنيزه :)
ثمن يوم زان لنا الجو عصير وزانة لنا الارض وحنا على الطريق اللي يودي لعنيزه وحنا نسفط ونجلس نتقهوى عصير
وهذه كانت ملحقات القهوه :)
ثمن بعد ماتقهوينا مشينا جهة الشمال مرورا بعنيزه ثمن عيون الجواء ثمن الفويلق والمغرب وحنا في الفويلق شمال القصيم ثمن وقفنا وشبينا النار وجهزنا القهوه والشاي والحليب والعشا
وهذا العشاء
ثمن نمنا والصباح اصبحنا وشبينا النار
ثمن سوينا لنا فطور قرص جمري على النااااااااار واذكروا الله :)
بعد ماقمرناها في الصاج وضعناها على الجمر عشان تنجض صح
ثمن هنا عملية عفس القرص بالسمن البري والعسل :)
ثمن بعد ماافطرنا لقطت لكم هالصوره لطلوع الشمس
ثمن بدينا نجمع عفشنا
وكان الجو غائم
والتقط لكم هالصوره
ثمن مشينا شمال غرب الفويلق للابل وكانت الارض زينه وفيها ربيع
ثمن وصلنا للأبل
ومشينا معها
ولا صار عندنا صبر نبي نشرب حليب على طول وهذه صوره للخلفات وهي تعطف على عيالها (والله من واحد ماهو عارف وش معنى هالكلمه )تعطف يعني تدر بالحليب بالعربي يطلع منها حليب اوكيه لااحد يزعجني يقول مااعرف كلامك :)
ماتلقون مثلي اترجم لكم هع
وهنا خويي الشقردي يقوم بحلب الناقه
وهذه صوره مقربه اثناء الحلب
وبعد ماحلبناها طبعا الغضاره كانت صغيره شوي اللي معنا وتسلفنا قارورة مويه :)
قولوا ماشاء الله :)
خويي يمارس هوايته المفضله ولكن مايقدر يركب الا على السياره مايلحق :)
يتبع
رد مع اقتباس
؟؟
)~
