المحاورة جرت بين الشاعرين عبدالواحد بن سعود الزهراني وابراهيم الشيخي والتي بدأها الشيخي قائلا :
الشيخي
سلام ومرحبا والبال صافي والبرا مردود *** بردية وفا فيها النفل والشيح والــكـــادي
من أول يوم نسمع بسم عبدالواحد ابن سعود *** نقف له كلنا واليوم عادي والاسم عادي
عبدالواحد
هلا مليون ممزوجة بريح المستكا والعود *** بعون الله وباسم الله ويالله والله البــــادي
أنا موجود واللي يعتبرني ماني بموجود *** يدورني عبث في مملكة عاد بن شدادي
الشيخي
هنا تحذير : لاتفهم غلط باب الغلط مسدود *** على قول المثل فوق الشفا تسعين نقادي
وجودك دون مايلفت نظر مايبلغ المقصود *** وانك بين ضد وضد ماجمعت الاضدادي
عبدالواحد
أنا فاهم غلط ؟ فاهم غلط مير الخطا مردود *** مــن التسعين نقاد اعتبر سبعين حســـادي
أنا موجــود فعلا لكن العالم هو المفـــقــــود *** غريب وراس مالي حفنة من تربة بلادي
الشيخي
فــداك الأولــة والثــانية واللــي بعــدهـــا زود *** مجاديفك تخض الحبر رغم ان الحبر هادي
ترى مانته محصل في الفضا عالم بدون حدود *** يرغبك الجــبل لــكن يخلف ظــنك الــوادي
عبدالواحد
فداي الا فديت اللي يطفي النار بالبارود *** ويسكب دم أبوه ويشربه من عنق برادي
أنا كنت أكبر اخواني ومازلت اخر العــنــقود *** أدخل جدي أفضل مدرسة وأقوم لأحفادي
الشيخي
كثير الناس تعرف قصة ابراهيم والنمرود *** ولكن هد من روعك وغير موجة الرادي
عسى الله لايشرهني من اخوانك وابوك العود *** تسببت بوفاتك والسبب تاريخ ميــلادي
عبدالواحد
ســمعــت بـقـصـة النمرود لكــن بــعد ناقة هـود *** ذبحها واحد مطفوق مايحسب لها حـادي
تدور الأرض عكس ويصبح الطارد هو المطرود *** ويســجن حضرة السجان والصياد ينصــادي