[poem=font="Simplified Arabic,6,black,normal,normal" bkcolor="transparent" bkimage="" border="none,4," type=2 line=0 align=center use=ex num="0,black"]
يابونايف لي سنه والنفس مدري وش بلاها=كن نفسي من عناها عن فرحها صايمه
ماقدرت أنهي عناها ولا قدرت أكسب رضاها=نفس رجال ٍ تكابر لو زمانه ضايمه
ول ْ يامقسى السنين اللي يدور بْنا رحاها=ماتجي لبْن آدم بْما يشتهي ويلايمه
الحياة حلوم ليل ٍ والزمن يقصر مداها=آه ياجور الزمان وآه ياجرايمه
الحياة إنك تعيش بْها عزيز وما عداها=وقت ماعشته ولا اعرف حد من زعايمه
مايعزيني هو إني عارف ٍ وش منتهاها=ون نفسي عن أراذل خلق ربي شايمه
الرذيل اللي خسارة خوته للي شراها=ماعليّه من مديحه لا ولا شتايمه
يابونايف جعله أرض لخطوتك ألا فداها=واحد ٍ ماله مراجل لاه ٍ بنمايمه
يحسبنا مانعرفه باخصينه لو خفاها=نيته تشبه نوايا جنسه وهلايمه
نحقر النفس الضعيفه ماعلانا من رداها=وماعرض فالسوق يبقى بين حاد وسايمه
لكن بضاعة ردي المعرفه مامن وراها=غير مطولت الحسايف والخساره دايمه
يالله إنك لاتواخذ نفسي وتغفر خطاها =وتجعله حظي ياربي من الحظوظ القايمه
ربي نوّر لي طريق ٍ غاب شمسه عن سماها=ونا ادور عن طريقي فالاجواء الغايمه
مومن ٍ بالله وساله يرشد النفس لهداها=راضي ٍ باللي كتب لي وقانع بقسايمه
من نشدني عن أموري قلت زينه ماعلاها=والحزن كاس ٍ ملامح وجهي بوسايمه
حالتي تشبه قصيده كلن بوجهي قراها=بيت عذبني هواها وبيت روحي هايمه
غارقه فيما يسمى الحب مدري وش دعاها=نفسي للي ماتعرفه تثني لعزايمه
جاها مرسول العيون وعقب مدري ويش جاها=الوكاد الحب حل وغردت حمايمه
وانتشت فيني مشاعر فرحة ٍ باللي لفاها=مدري حلت بي جديده ولا كانت نايمه
وجيت كلي صدق واشواق ٍ يزكيها وفاها=لجل مولود المشاعر تقتوي دعايمه
عشت حب ٍ شبه حلم وعاشت النفس بمناها=ولا صحيت ألا وقلبي يون من هزايمه
آه ياحلم ٍ بناني بالوعود اللي نساها=وآه ياحب ٍ توفى في حفل تمايمه
ومن بعدها...وش بعدها..؟ ايه زينه ماعلاها=أتجمل لجل ناس ٍ للهواوي لايمه
كف لومك ياعذولي واترك النفس بهواها=لو نهايتها شهيده في بحوره عايمه
هذا وصلى الله على سيد الانام ومصطفاها=عد ماهب الهبوب وذعذعت نسايمه[/poem]