السلام عليكم ورحمة الله وبركاته
كلمة دايم على لساني (( أييييه يا حزم الضامي ))
لبطل مسلسل بدوي كان يجي الساعة 7 المغرب كنا نشبك التلفزيون
على بطارية الجيب الشراع حق عمي الله يرحمه ,,
كانت مدة الحلقه نص ساعة المشكله ماهي في المسلسل المشكلة بعد ما يخلص
المسلسل أفكر في تعب الجيب ندفه لأن البطارية تضعف من التلفزيون
الله يالدنيا
زمان حلووو كل ما ذكرته تذكرت جملة البطل البدوي وأرفع صوتي وأقول
(( أيييييه يا حزم الضامي ))
يوم كنا نحب بعضنا ونسـأل عن بعض ونخاف على بعض ويدنا بيدين بعض
>>> شوفوا كم بعض كتبت
وأشوف حالنا ألحين أرفع صوتي وأقول (( أييييييه يا حزم الضامي ))
يوم كانوا النساء يستحون من ظلهم والرجال يحشمون سابع جاره عندهم
وأدخل السوق الحين وأشوف البنات ولعانتهم وأدخل في أسرار الشباب
وألاقيه يخطط على عرض بنت عمه في المنتديات ,,,!!
أصرخ وأقول (( أيييييييه ياحزم الضامي ))
أيام كنا نوصل الرحم وفي الأعياد أدهن خدودي بفازلين من كثر سلامي على الناس
وأطالع الحين وألاقي الأخ معادي أخوه
أصرخ وأقول (( أيييييييييه يا حزم الضامي ))
زمان كنا نسوي الملف الأخظر العلاقي العصر وبكره الصبح مداوم في الوظيفه
وبشروطي وحسب رغبتي
وأطالع ألحين في حال الشباب المتراكم أمام الوزارات
تذرف دمعتي وأقول (( أيييييه يا حزم الضامي ))
نعيب زماننا والعيب فينا ,, وما لزماننا عيب سوانا
ولن نعود لك ياالزمان القديم ألا بعد ما نلجأ إلى الله ونصفي نفوسنا .
بندر النايف