مابين اجمع خيال وبين اشتت خيال
تختال فكره وفكره مات مضمونها
..
لمسامر الشعر لذه يوم جالي مجال
اشد عزم القريحه غصب بمتونها
..
مادام جتني مع الهاجس يمين وشمال
اسوار عجزو صغار القوم يرقونها
..
ابطلق عنان فكري واستصيغ المحال
لا للهزيمه وشوق البنت مجنونها
..
ماني بعبدالعزيز ولا انتسب للرجال
ان ماتعديت ذيك الدار وحصونها
..
الحب يابنت ماهو بس غنج ودلال
والا عبارات تغري من يحاكونها
..
الحب له نبرة(ن) بالصوت تصرخ تعال
يا بايع الورد وقف لا يسومونها
..
عندي ثمنها الغلا والشوق والإنفعال
ياشفت ناس(ن) هدفهم بس يشرونها
..
أكره تملق بعضهم واكره الإبتذال
واحب صدق النوايا لو يعادونها
..
وان جيت كلي أجي ما احب انا الإنفصال
الروح ترقي جميع او تنثني دونها
..
سامرت ليلي وهمت وخافقي لا يزال
يضغط على النفس لين تخالف ضنونها
..
ياشحت وجهي غديت بسكة الإحتمال
ذا صح لا ذا غلط ياللي تحسبونها
..
بعض الفراغ يتكاثر لين يصبح جبال
يصعب على رجال ماترخص بمكنونها
..
مابين اجمع خيال وبين اشتت خيال
احترت مدري وش اكتب ضاع مضمونها