.. ليـــلة المـوعـــد ..
عين تسألني .. متى وقت الوصـول
وعين تحسب هالثـواني .. في وله
هـو تأخـر ؟ ولاّ انا .. دايـم عجـول
جيـت في ليــل الوعــد .. من أوله
ليــلة الموعـد .. تحمّـلت الحـمـول
آه من ليـــل الوعــــد .. يامطــوله
من غياب الشمس وعيـون العـذول
لين صـار الليــل .. كحـل المكحـله
كان عقرب ساعتي .. عقرب كسول
تسبـقه .. كل العقـارب .. ما اكْـسـله
مرّت الساعة سنة .. واربع فصـول
ومرّت فصـول السنــة .. بالأسئـله
ورحت افكر وش بسوّي وش بقول
كيف اسلّم وابتـدي .. كيـف أسـأله
أسئله .. في خـاطـري .. دايم تجول
بســأله .. عـن كلّ شي كنت اجهله
عن مطـر وصله .. وأوقـات الهطول
عـن مـواعيـــــد ٍ .. كـثـير مْأجــله
عن غيــابه .. وانتظــاره .. والذبول
عن حضــوره .. والليـــالي المقبـله
وان سألني كيـف حـالي .. مابقـول
بتركــه .. ويْـشــوف شي ٍ يذهــله
وبين لحظه واختـها .. عدّيت حول
ألـف شكوى .. بالعـتــــاب مـبــلله
هـو تأخـر ؟ ولاّ انا .. دايـم عجــول
جيـت في ليــل الوعــد .. من أوله
ليــلة الموعـد .. تحمّـلت الحـمـول
آه من ليـــل الوعــــد .. يامطــوله