[poem=font="simplified Arabic,5,darkblue,bold,normal" Bkcolor="white" Bkimage="" Border="none,4,gray" Type=1 Line=1 Align=center Use=sp Num="0,black"]
(الى الملك العادل عبدالله بن عبدالعزيز من شعبٍ يشتكي من الفقر في زمن الغنى )
ياوليّ أمرنا إنشد عن الحال = صاحب الحال لاتنشد سفيها
إنشد اللي تشيل كتوفه جبال = وكل دارٍ يدلّك ساكنيها
مايعرف اللهب من عاش بظلال = وماألومه وهو ماعاش فيها
إنولد مبتسم من بد الأطفال = وابتدا رحلةٍ كلٍّ يبيها
يسمع بشيٍّ اسمه جوع واذلال = وماهقيت المآسي قد وعيها
( المعاناة ) يسمعها بموال = وينطرب مثل باقي سامعيها
بس ماعاش واقعها والأهوال = في زمانٍ تزايد حامليها
ياولي أمرنا ياطيّب الفال = الجماهير ترفع لك يديها
ترفع إيدينها تقدير واجلال = مع تظلِّم على ماحل فيها
الجماهير ليل أوجاعها طال = أكثر أغراضها عزّت عليها
( أزمة أسعار ) ماهو بعقل باخبال = كيف حاجاتنا مانشتريها !!
يابو متعب ترى فينا البخت مال = وانت ميلة بختنا ماتبيها
عارفينك صدوق أقوال وأفعال = وصل خيرك ديارٍ مانجيها
فيك عدل وصخا لو مِلت بعقال = لك عدوّك شهد إنك نزيها
دمعتك من رحَمك إتقول شلاّل = زلّة العبد دايم تتِّقيها
ندري إنك تبينا مضرب أمثال = بالرخا بس غيرك مايبيها
الحواسيد من آدم ولازال = فسّرت للحسد عن ساعديها
يدّعون الولا لكنّ الأعمال = تفضح أصحابها للي وعيها
الولا شمس ماتحجب بغربال = وافهموا كلمتي ياسامعيها
ظُلم الإنسان في تجميع الأموال = اسمه إرهاب واستفت الفقيها
احتكار وربا مع غش واخلال = هي عصابة تبي قطعة ايديها
تحتنا ياولي الأمر زلزال = يستر الله من أشياءٍ تليها
كم عذارى بكن والدمع قتّال = سبّة ثياب عرسٍ ترتديها
لاج أبوهن وصد العم والخال = طلبة الناس للعن والديها
ياولي أمرنا حنا لك عيال = شف عيالك قبل يقضى عليها
دام حنّا بطفرة نفط وريال = وخيرنا كل قمة يعتليها
أجل من حقّها ترجيك الأجيال = وبِرّنا كل دولة محتويها
شعر \ حمدان بن سالم العنزي[/poem]