محدن يطلع سليم ..{ من سوالف هالحريم ! :
<<<<<المقصود من هذي السالفه العجايز اللي يبي لهم
تسطيييييير >>>>>>
--------------------------------------------------------------------------------
.
.
.
.
بعد ماراحوا الناس .. وخلصت العزيمه .. وخلص الاكل ..وصارت الساعه 1 صباحا ً
مددن رجيلاتهن مع تنهيده قووويه .. وآآآآه يازمن
ام حمد قررت تجلس عند ام صويلح الوقت تأخر وقالت لبلعها برقد عندها بساعدها عالعزيمه
قالها ابد خوذي راحتس <<يبي الفكه منها
ام حمد:هاه بس عساتس ارتحتي اليوم يوم زال هالهم وخلصت العزيمه؟
ام صويلح: ايييه والله .. واخيرا ً قضيت منها..مير ياكثرهم ياكثرهم
ام حمد: ايه والله .. لا وبعد جايبين ذرّهم ..الله لايكثرهم ان شاء الله ماخلّوا غرفه ببيتس الا قلبوها فوق تحت
ام صوييلح:ليته جا على حوستهم وبس .. خلصو الحلى عن الحريم ..موب بزران ذولا..يأجوج ومأجوج كل شي يزطونه
ام حمد :الا اقول..ماشفتي الي لابستن فننجي وحاطتن لوقس مدري سلوق * مثل هاللون ؟
ام صويلح : ايييه ذيك الي اكلت صحنين من رزّي شكله عاجبه طبخي:$ (رفعت صدرها لفوق في حاله رزّه) ..ايه تقولين وش بها ؟
ام حمد : هذي سلّمتس الله (وطّت صوتها ومع حركات باليدين) يقولون ان رجلها موب مرتاحن معها ابببد ابد ..وانه احتمال يطلقها
ام صويلح : بعذره والله .. انا من شفتها ما ارتحت..نفس خشتها تعض..تلقينها مطيرتن عقله ..مسيكين والله مايستاهلها هي وذرّها..هو منصب(ن) واخلاق..وهي عقرب(ن) ماتنطاق
ام حمد:والا الي جنبها ..الي لابسه المخزي اعوذ بالله..اعوذ بالله بس.. لابستن هالبطلنون الي لاززززقن بسيقانه ياملا المصع
ام صويلح:مير استغفر الله ..يقولون انها دايمن تروح للسوق والملاهي مع رفيدزاته بس ولا تجي الا تالي الليول ..ياوخيتي مايندرى عنه اعوذ بالله اخاف اقول شي الحين استأثم بها ام البطلنون ذي ..شرهتس عالي خلاها تطلع من البيت وهي لابستن هالمنكر
تنهيده من ام صويلح ..
الساعه (2 ونص)
وتكمل :اقول ياوخيتي خلينا من الناس بس الا تعالي..تذكرين بنت اخو رجلي الي حضرنا عرسها من 6 شهور؟
ام حمد:ايييه ذيك الطخما .. ايه وش بها ؟
ام صويلح:يقولون من زواجها للحين مالمسها رجلها ..مايندرى وش بلاه..
ام حمد هااااااااااااو )..صادزه انتي..وش هالرجل ذا..لايكون بوه بلا والا شي ؟
ام صويلح:يقولون انه مسحور..والا منظول..بس اهلها شكلهم ماودهم احدن يدري..انا سمعتها من بعيد
ام حمد : مسيكينه وراها ماتتركه اجل ؟
ام صويلح:تحبه حبتها القراده ..مدري وش لاقيتن بوه ..برطمه هذا كبره ..وشحمه ياكثره
ام حمد: ماتسمعين يقولون ان الحِب ان جا ..يجي مرتن وحده ..مير خلينا من سالفته..وذكرتين بسالفتن ثانيه
ام صويلح : وش هي؟
ام حمد : ولد اخو عم بنت خالتي ..ذاك الي سقط 4 مرات وللحين بالثانوي..عرفتيه ؟
ام صويلح:ايييه اييه الي ابوه قد دخل السجن بسبه بلاويه؟
ام حمد:علييييييييتس نور ..يقولون انه رايحن لاندونسيا ديره الشغالات وديره السكار والعهار ..وتاركن اهله عشان شغاله يحبها هناك
ام صويلح :اللله يسسسود وجهه مثل ماسود وجه اهله بين القرايب..وش يحس بوه يوم انه مسوي فيها دايخن بالحب وذايب ؟
ام حمد :والله هالدنيا ماعاد بها خير.. قرّبت القيامه ياوخيتي ..الله يجيرنا بس
ام صويلح :ياعزّتي لأم سعد بس ..
ام حمد : وراااااااااه وش بها .. عاد والله هي ونعم الجاره..وش بلاها عسى ماشر بس؟
ام صويلح :ذاك اليوم وعت على شغالتها الا وهي كابتن قاز عليها وماسكتن الكبريت بتشب بنفسها..وتجلس ام سعد خنت حيلي تقولها انا مسويتن لتس شي يوم انتس بتنتحرين وتحرقين نفستس ؟ ..الا وهي الي تقوله ..لا ماما انتي كويس مع انا بس انا لازم فيه موت ..قالت لها وش بلاتس ..ماقصرت معتس انا..وراتس بتموتين ؟ قالت لها:
انتي مافيه خلّي بابا نوم مع انا ..
الا ومااوريتس شلون هبله ام سعد وقتها..لولا خوفها من الله تسان مسكت الكبريت وشبتها بنفسها عقب كلمتها هالفاهر الي ماتستحي..
ام حمد: ياكرهي لهالشغالات ..دمار وقله خاتمه ..
(الساعه 3)
الا قبل انسى بقولتس ..
ام صويلح:اسلمي
ام حمد :ولد اخوي ابراهيم..صار الحين عمره 17 ولا بلغ ولا خشن صوته ولا خط شنبه
ام صويلح:هو هو هو هو .. ودوه للطبيب بس اكشفوا عليه..لايكون بنت بس والا به بلى
ام حمد:امه ملسونه ونذله ان جبنا طاري المستشفى تقول ولدي مابه الا العافيه البلا منكم انتم
ام صوييلح:حسسسسبي الله عليها بتهدم مستقبل الولد الله يكفينا الشر
ام صويلح :ماقلت لتس عن اخت رجلي وش صار عليها؟
ام حمد: ايييه ذيك الي تقل دبابه..وش صار عليها مانحفت ؟
ام صويلح : اعوذ بالله بس كل ماله تسمن ..شكله اخر شي بتنفقع
ام حمد: مير لو انها بنتن لي بس..كان حبستها ولا خليت عندها الا قاروره ماء..مير ان اهلها معطينها وجه
ام صويلح: الله يعين بس
ام حمد :الا اقول ..سمعت ان ولد عم بنت عمتي ..ماسكينه ومعه حشيش وزقاير ومدخلينه للسجن
ام صويلح:ايه قصدتس مروج .. تلقينه مخندرات..والا وراه يمسكونه ويدخلونه للسجن عشان حشيش بس..اكيد بحوزته المخندرات
ام حمد :لا واخته بعد الله لا يبلانا ..مير اني ماودي اقول اخاف استأثم ..
ام صويلح :الا ياوخيتي قولي..ماعليتس ..
ام حمد : اخته تشارك بالانترنت مع رجال ومنتديات وبلاوي
ام صويلح:وشي تصير هالمنتديات طيب ؟
ام حمد : اعوذ بالله ياوخيتي..بس هي مثل المرقص تقريبا ً يجتمعون السرابيت والداشرات
ام صويلح:اعوذ بالله اعوذ بالله..الله يكفينا شر هالتكنونوجيا مير انها دشرّت بنات المسلمين ورجالهم
(الساعه 3 ونص)
ام حمد:اقول ام صويلح عسى بس ماسهرتس معي وتعبتس
ام صويلح:شدعوه ياوخيتي..انا سهرانتن عشان اصلي القيام..خبرتس بي ماحب انام الا وانا مصليتن صلاه القيام
ام حمد:ياجعل عيني ماتبتسيتس وياليت كل الحريم مثلتس..تلقين اغلب الحريم الحين اعوذ بالله يجتمعن على منكر والا اكل بلحوم هالناس
ام صويلح:ايه والله صادزه ..مير الهرج بالناس ماينبغى ..الله مير يكفينا شر الهرج بالناس ويبعده عنا
ام حمد:آمييييين ياوخيتي..يالله هاتس جلالتس ووروحي صلي..عشان بقولتس سالفه بنت اخت مرت عمنا
ام صويلح:قوليها الحين..لاحقين عالصلاه ياوخيتي..دامها قيام ولا هيب فرض واجب..لاحقين لاحقين..اسلمي بس
.
.
.
.
معاني المفردات:
* قلوس(روج ينحط عالبراطم ويعني لمعةً فريدة ً من نوعها لتلك البراطم )
زبده الموضوع :
* ما انلام الحين يوم اني اكره الحريم وسوالفهم الي على غير سنع .. كل شي غصب يسولفون بوه ..غصب يعرفونه..غصب يزينونه..لاوبعد تلقون السالفه الي مايعرفون لها تفسير..همن يحللّون على كيفهم <<اشوى انتس نفسهم
*وش رايكم بدين ام صويلح وتمسكها بصلاه القيام ..لا ماشاء الله عليها..خوش خوش ..يحلفون ان قصتين من ام حمد تنسيتس الفرض بعد..مالت على وجهتس بس<<تعطيها كف
* بعض القصص الي مكتوبه حقيقيه ..وبعضها من محض خيالي العفني .. اتمنى انكم استمتعم وانبسطتو بهالجلسه..الي ماظنيت انها بتسعد اي كائن حي الا ام حمد..وام صويلح ..
""انتظر ردوووودكم ""
SEE YOU
""منقوووووول للآهميه ""