يا فتيات ... هااذي سوالف الشباب في الباص :
* عشاق الكورة :
نفر (1) :: يا خووك احلى شي عاد لين السد يتصدر الدوري.
نفر (2) :: ايه .. شفت جول آيتوو عاد شق المرمى شق فديته هالريال.
نفر (3) :: روحووو مناك .. بييكم الشبح المدريدي بينثر هاليهال .
وتقوم الضرابة و التكفيخ .. وتلقى واحد منهم مسدوح ع الارض و الثاني معلق على الباب .
* المغازلجيه :
نفر (1) :: اااخ يا الحبيب شفتها .. هذي قاعده صوب الدريول .
نفر (2) :: تقصد هذي أم العباه فيها جناحين فراشه ؟!
نفر (1) :: لا ياحظي العوي .. اللي عباتها الخفاش ..
نفر (2) :: هيه هذي شفتها كشخه يابووك بس يقولون ما تعطي ويه .
نفر (1) :: ما عليك منها .. بتطيح بتطيح ..
عاد الاخو يجيب تاريخ اهلها واجدادها على اساس ان انا اعرفها ترى !
* المطنزجيه ( راعيين المطنزه ) :
نفر (1) :: شوف شوف .. هذي ام عباة راس صدقني بطيح .
نفر (2) :: شدراك انها بطيح ؟! إلا اذا عنك فرن .
نفر (1) :: يا العله بتشووف احين
" البنت بتنزل من الباص "
نفر (1) :: حجيه عباتج
طم طراخ ( طيحه على الويه )
نفر (1) و (2) :: هههههههههههههههه
و تقعد تسب فيهم وتدعي عليهم وهم للحين يظحكون عليها .
* عشاق الكتب ( ما يشيل راسه من الكتاب ساعه ) :
نفر (1) :: ( جاعد يراجع اخر درس في الماده ) .
نفر (2) :: وين وصلت أي بوينت؟!
نفر (1) :: رقم 6 بس مب فاهمها .. تشرحها لي ؟!
ويشرحون حق بعض ويدور الباص ويفتر وينزلون الطلبه كلهم وهم للحين في الباص .. لين اييهم الدريول ويقولهم يلااا فكوني بروح بيتنا .
* صبيان على غير العاده " هاذيله في حالهم " :
نفر (1) :: هلا شلونك ؟!
نفر (2) :: بخير الله يسلمك شلونك انت ؟!
نفر (1) :: الحمدلله بخير يعافيك .
انتهت المحادثه .. واحد يطالع من الدريشه و الثاني سرحان وإلا راقد .
* عشاق البته و الاونو :
نفر (1) :: ألعب خل اكسر راسك .. تقط لي ثنتين الكلفس .
نفر (2) :: عشان اتييك الاكله العدله ( يلعبون كوت )
نفر (1) :: يا عمي .. بنشوف ترى الجوكر يايك يايك .
نفر (3) :: ألعب العب حبيبي يقولك جوكر ما عليك منه زين
و الصراخ ينسمع للدريول .. ولا كنه احد يهمهم .. ويجوز احيانا ان الكل ينزل إلا هم يتمون بالباص طبعا عقب الصبيان مال الدراسه و الكتب .
* عشاق الاغاني و الطقطقه :
نفر (1) :: ( يغني من خاطره )
نفر (2) :: شو فيك عبود .
نفر (1) :: (( مطنش )) ( ويغني ) .
نفر (3) و (4) :: ( يغنو ويطقطقوا ولا حد هامنهم )
مساكين ذيله تلقاهم يفكرون يغنون في شي من العروس .. ويوم فكروا وراحوا شاتوهم بالنعل !
* فئة الموضه :
نفر (1) :: شفت وائل كفوري شمسوي عجيييب شعره مالي إلا اروح الصالون يسونه لي صاير مو شي ( واااي يحليك اسم الله عليك )
نفر (2) :: لالا ما عجبني احلى شي قصة عمرو دياب بس ناقصه صبغه اشقر على صوب ويطلع كووول .
ذيله مساكين بعد .. اخرة هالقصات اعتقد بيسون تسريحة المطربه صباح !
* فئة البناتيه :
نفر (1) :: ( دايس على ريل الثاني بدون قصد ) .
نفر (2) :: آآآي عورتني .
نفر (1) :: اوه سوري عورتك وايد ؟!
نفر (2) :: لالا خلاص طاف ولا يهمك .
نفر (1) :: لا صج عورتك ؟ اسف والله ما كان قصدي اجرح مشاعرك.
وطبعا بجيب سوالف البنات ...قريبا
