[align=center]الله بالخير جميعاً
ياكثرهم اللي بيدخلون الموضوع ويقولون : ياثقل دم هالمودمي راااايق , غثييييييييييث ( بكسر الياء وضم الضاد اذا فيه ضاد خخخ
طولت اعماركم خلوكم كوووووول والواحد منكم الله يسلمه يقرأ الموضوع وله نفس بالقراءه ويكون مثلي رايق :) مو مجرد كتابة تعليق وعقبها يقفل الصفحة ويطير من المنتدى من الغثا اللي شافه ^_*
واعذروني على جراءتي وعلى اسلوبي في الطرح , وياليت الاداريين ما يقربون صوب لوحة التحكم بالمررررهـ ويتعوذون من ابليس ويأخذون الدنيا بالراحه
ابحاول اسرد موضوعي بالطريقة ( الاستقرائية ) يمكن المعلمين والمعلمات اللي بالمنتدى يعرفون هالطريقه زين واعتقد انها اسهل الطرق في ايصال المعلومة وتحقيق المهارة
المثال الأول :
مدير المدرسة اللي انا فيها ( فاسق ) هع هع يمكن تستغربون من صراحتي بس فعلاً يالربع هو فاسق وقد امتزج فسقه بالنفاق , الله يسلمكم ينقز لنا هالمدير لحيته تأصل لبطنه عقب كل صلاه ويطلب من الطلاب تقوى الله وهو لا يتقيه , يطلب من الطلاب المؤخاه وهو لا يحققها , يطالب باهمية المحافظه على الأمانه وهو خائن للامانه وخصوصاُ بعد وضوح علاقته مع احد التلاميذ ( ولحد يقول لي وش هالعلاقه ) يظاهر بانه " مطوع " وهو من حول القده " يطالبنا معشر المعلمين بالعدل والمساواه وهو يميل لعائلة آل فلان ضد عائلة آل فلان , يطالب بالمحافظة على ممتلكات وزارة التربية والتعليم وهو فاتح الأدارة لجماعته اللي يبي خطاب او تصوير او أي شئ آخر ما عليه الا التوجه الى الادارة , يطالب بالأمانة وهو سارق ميزانية المدرسة والمقصف معاها , ولا تفكرون ان احنا ساكتين عن كل هالامور , بالعكس على قولتهم " صكيناها في وجهه " وناصحناه , بس اعوذ بالله لو اقسم بان هالشخص ماهوب انسان لا كرامة ولا رجوله ولا غيرها , كلمنا المشرف المنسق وطلع شهاب الدين اطقع من اخيه وادارة التعليم بكبرها تشجع على هالتصرفات بسكوتها الفاضح
مو تشهير هذا لا والف لا ( الجملة مقتبسة من قصة ألف ليلة وليله خخخ ) لكن لضرب المثال
المثال الثاني :
اداري او مشرف باحد المواقع يسجل يومياً اكثر من مخالفة منوعه كعرض صور خالعه وجهازه متروس مقاطع وصور خالعة , او تحرش بالبنات وهو ما سلمت منه مشرفه او عضوه بالمنتدى الا وحاول يغازلها بشتى الطرق , او عدم التلفظ بألفاظ خارجه عن دائرة الشريعة وهو يقفل المنتدى ويطب بالشات وانواع السب والشتم و " الهياط الكاذب " , وبالضد هناك مشرفات او اداريات ماههمهم الا خرفنة ( الشعب الموقر ) بالخفاء , وقدام الناس ياحليها ويازينها .... لحد يتهور ما اقصد احد بس ضرب مثال
المثال الثالث :
رجل اعطى زوجته كل الثقة ولمن ينام المسكين تسحب نفسها من تحت البطانية وتشغل شريحتها الثانية وهاتك غراميات وكذبات , وبهالطريقه تخون زوجها وهو نائم بفراشها مدري من وين جايبة قوة القلب هذي حشااا ماهيب مودمية , والادهى من ذلك والأمر ( بفتح الميم والراء مع تشديد الراء ) , اللي خاينة ابوها وامها وابوها ما خلى ديرة الا وراح لها واشتغل فيها عشان يوفر لها جميع احتياجاتها وامها المسكينه اللي ما تنام الليل لا مرضت بنتها , نفسي هالانسانه تفكر بصدق لمن تخون اهلها في حال أمها وابيها اللي نايمين ومتطمنين على بنتهم وموفرين لها كل شئ وهي تلعب من وراهم , احس في هذي اللحظه ان انسانيتها سلبت منها , وبالنقيض نجد هناك بعض الازواج يحرمون زوجاتهم من الجوالات " الموبايلات " وجيبه متروس شرايح ثانية ويطلع من البيت وما خلا مودمية الا واتصل عليها وهتك عرضها , لا ونلقاه بعد حارمهم من " الدش " القنوات الفضائية خايف عليهم منها وهو يطلع من البيت للاستراحة او الديوانية وهاتك ياهوت بيرد تسداح وتمرداح , ولمن يهديه ربي ويروح يصلي بالمسجد وولده المسكين اللي ما ترك فرض الا وصلاه بالمسجد يتأخر عن الصلاة لضروف ويلقاه في صحن المسجد وهاتك تسفيل قدام الناس لانه تأخر عن الصلاة وماهوب زود اهتمام مير يبي ينفخ راسه قدام المصلين ... اليس هذا مزيج من الفسق والنفاق ؟
المثال الرابع :
ادري طولتها وهي قصيرة بس عاد زي ماقلت لكم خلوكم كوووووول ( الله يأخذ من غشني وقال اني مزوحي خخخخ ) . معلم يقف امام تلاميذه ويسأله واحد من الطلاب ما حكم شرب التخان ( الدخان ) وسماع الغونية ( الغناء ) ويمسك طريق هالمعلم المسكين ودوووووووس تحريم وتكفير , وبس تنتهي الحصه يروح لسيارته ويشغل المسجل ويروق ع الاغنية باحلى زقاره وأحلى روقااااااااااان لابو الشباب
ماراح اطلب من احد منكم يعترف بـ هل احدى هذه التصرفات او مشابه لها موجود به او لا , لله مانيب سائلكم , ولانيب قايل لكم زي مو متعوده السنتنا بانهوو ( بأنه ) العاملو ( العامل ) الاساسيوو ( الاساسي ) والسببوو ( والسبب ) الرئااااسي ( الرئيسي ) هو عدمووو ( هو عدم ) مخافة الله ( بكسر الهاء في لفظ الجلاله ) والبعدوو ( والبعد عن دينهووو ( دينه ) و و وو و الخ من الهرطقات اللي ياما قلناها ولحد استطاع ان يعمل بها او يتحسس بها " الا القليل " ولسان حالنا يقول : والله وتالله وبالله سوف يحاسبنا الله على ما نعلمه ولم نعمل به .
مو علمنه او لبرله او غيرها , عشان اجيكم واقول ما ابي هالجملة , لا والله الا انني اتمنى كل المنا بأن نتحسس بالمشكله ونصغر تلك الفجوه بين كلامنا وافعالنا وان نتجرد من التكلف والاصطناع وهز الرؤوس وحك الأذقان , ولعل اكبر دليل هو سردي لكم موضوعي بلهجتي البسيطه الهزيله اللي ماكله نص الحروف ومكسره اضلاع اللغة العربية تكسير
ابي تجرد طولت اعماركم ومناقشة الموضوع حول النقطة التالية بكل بساطه وحوار سهل وما راح اكثر ولا ادعو الى مخافة الله او العودة لدينه او تربية النشء والاهتمام بهم او من هالكلام اللي محد طبقة الا من رحم ربي , ابي هالنقطه بس :
* لماذا يفسق المرأ ويظاهر ويرائي وهو يعلم بواقعه ,, هل هي القناعة بحاله وتصرفاته ؟ أم جهله بما يفعله مع استبعادي النقطه الاخيره كون الأمه في تطور مستمر في التعليم والدين وغيرها ؟ وان كانت فعلاً قناعه فما الذي رسخها بداخله وجعله يؤمن بها وكيف ندعوه الى الكفر بها ؟
[align=right]معلومات قد تهمكم
الفاسق : هو الخارج عن طاعة الله
لان الفسق في اللغة هو: الخروج عن طاعة الله.
والفاسق عند اهل السنَّة والجماعة: هو من ارتكب كبيرة من كبائر الذنوب دون الشرك فهو يسمى فاسقا ساقط العدالة, لا تقبل شهادته ولا يقبل خبره.
وهو ليس بكافر بل هو مؤمن ولكنه ناقص الايمان
المنافق : في الشرع هو الذي يظهر غير ما يبطن[/align]
همسة :
الحقيقة بين الكاذب والكاذب , كالحبل بين الجاذب والجاذب , كلاهما ينتهي به الأمر إلى الانقطاع .[/align]