المشاركة الأصلية كتبت بواسطة ** عذبة النوح **
,
,
بســـــــــم الله الرحمن الرحيـــــــــم
السلام عليكم ورحمة الله وبركاته ,,, بعد انقطاع ليس بالقصير اعود
لو كنت اكتم من العتب الكثير وبصدري من - الشرهه - مالله به عليم !!!!
الم يلاحظ احد غيابي ام ان احد لم يلاحظ حضوري !!! الله المستعان
لم يسأل احد ولم يستفسر , عموما عساكم سالمين , عتاب بسيط
وعاد لكم قلبي ابيض كما كان وكما سيظل باذن الله
احبتي اطرح بين ايديكم هذه الابيات وارجو ان توافق القبول وتلقا الاعجاب
لو ان بها بعض المبالغه وذلك لتعاظم الامر بنظري ( فيما يحدث حاليا في مجتمعنا )
,
,
[poem=font="Simplified Arabic,6,darkred,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
لهينا واعمت الدنيا بصايرنا مع الابصار=وصارت في دروب الغي تسبقنا خطاوينا
جذبا بالمدى واهج نظنه نور واثره نار=دنينا دون وعي وخوف , كن النار تدعينا
مثل سرب الفراش اللي من النشوه اليها طار=وصار بغمرة النشوه شرار , وذي توالينا
نسينا من نكون وليه خلقنا الواحد القهار=وقدمنا الهوى والميل على مرضاة بارينا
عصينا الله وهونا معاصينا وقلنا صغار=كبرنا وكبرت معنا وصارت عادةٍ فينا
تطورنا مع التطوير , وجدفنا مع التيار=وتهنا في بحور الذل وانكسرت صوارينا
وسمينا الحيا ( عقده ) وحاربناه الين انهار=وشيدنا على انقاضه جدارٍ ما يغطينا
فصخنا ثوبنا الضافي لبسنا ملبس الكفار=هدفنا نوصل القمه , ولكنا تردينا !!
تشبهنا بهم واللي يناظرنا سوا يحتار=هم الاصل ولنا الصور , وذا فخرٍ يكفينا !!
وأدمنا مشاربهم بواردها وحتى الحار=واكلنا ماكلو لوهو يظر وما يغذينا !!
وصرنا نسمع غناهم ويطربنا صدى الغيتار!=رقصنا مثلهم واكثر تساليهم تسلينا !!
مشينا نفس مشيتهم ضبطناها مع التكرار=ولوّنا العيون السود , وفيها الله محلّينا
وصارو قدوه وصارت ثقافتهم هي المعيار=وضيعنا هويتنا , وفرطنا بماضينا
فلا تلقا بنا صادق ولا واصل وابنٍ بار=ولابقلوبنا رحمة ولا حشمه لاهالينا
بيوت الله تنادينا وتنشر بالفضا الانوار=ونزحف للظلام ولو يصيح بليس لبينا
تجرينا ورابينا , وسمينا الربا ( استثمار )=وكنّزنا مرابيحه ومنها ما تزكينا !!
شرينا بالحرام بيوت حميناها بكم جدار=وليت الطوب لامتنا من النيران يحمينا
وغرتنا الحياة وْزينة الدنيا وهيّ غْبار=تزيله نفخة المحشر وإلا ماعاد يمدينا
وش اللي صاب امتنا وش اللي للعروبه صار؟=ورانا ما نعز الدين ونعزز مبادينا ؟!
رفعنا الله بهذا الدين ووكلنا الولي واختار=نحمل الرايه ولكن ,,,, تهاوت من ايادينا
ورانا عايشين اسرى وربي قد خلقنا احرار؟=ونمشي ملئ ارادتنا لظيم سجون اعادينا !!
إلاهي يا مدير الكون ومقدر لنا الاقدار=بنورك اسألك يالله دروب الرشد تهدينا
ظلام البعد عن نورك ضرب حول السكون حصار=تعيش قلوبنا وحشه لو العالم حوالينا
تدارك بالهدايه ما بقى من باقي الاعمار=تلطف خذ بدينا لين تقوى المشي رجلينا
اعوذ بوجهك وبسمك من الخزي وعذاب النار=وياربي اذا تعرض بوجهك من يلفينا !!
إلاهي سيدي مولاي تجردنا من الاعذار=تعامل بالعفو معنا , ولا بالعدل تجزينا
رجانا عفوك وصفحك اذا زاغت بنا الابصار=ومن حوض النبي شربه بها يا رب تروينا
وصلي ربي وسلم عليه وصحبه الابرار=وآله , عد ما نبخل على انفسنا وتعطينا[/poem]
,
,
وسلامتكم