هذا الله يسلمكم واحد مقرود ( من كثر القراده وحده من أذنيه مقطوعة والثانية فيها مخوش ) والله من القشر . ما علينا هذا حب انه يدخل مجال الغزل ويتعرف على بنت تعينه على قضاء وقت الفراغ بالتسلية والرومانسية ( [blink]تفكيره كذا[/blink] ). وفي أحد الأيام الضبابية في مدينة الرياض وتحديداً في (منفوحه) قام المقرود وكشخ ولبس ثوب إذا شفته تقول[overline] قماش مجلس عربي [/overline]كاروهات وطق ذيك الغترة البيضاء من كثر ما يمسس المرزام قلب لونه اسود ( ما قلت لكم مقرود ) المهم راح وارتز قدام مدرسة البنات على باله بيحط عينه على نانسي عجرم ( [blink]اغلى طموح في حياته [/blink]) هذا تفكيره المهم شاف ذيك البنت اللي تأخذ العقل على قولته ( ما يدري ان اذا انوخذ عقله صار سفيه ) تشجع الولد ومشى قدامها وعلى باله انه يبطلع شي من مخباته وهو قصده انه يذب لها رقم الجوال ( طبعاً الجوال هذا حق أبوه ) ولتأكيد تراه [blink]شريحة سوى [/blink]وماهي باسمه الشريحه بس هو مستلفها من ابوه وكل ما سأله أبوه وين الجوال رد عليه قال في الشاحن بطاريتك فاضيه ( [blink]نصاااااااب [/blink]) المهم ذب الورقة وطلع من مخباته الثانية ( براية قلم رصاص ) تعرفونه ذيك اللي ( أربع بريال ) أم مرآية ما فيها غيرفي المكاتب - لونين احمر واخضر يعني غصب تشجع نادي الاتفاق - وركز على البنت وهو يناظر في البراية لين شاف البنت أخذت الرقم ( على باله شغال مخبر ) . البنت قصدها شريف يوم أخذت الرقم تبي تغسله علشان ما يتميلح ثاني مره . المهم الولد سيده للبقالة واخذ ( [blink]عصير راني حبيبات + بطاطس بالكتشب + بسكوت مينو[/blink] ) يلعن وش ذي الكبد اللي تقبل ( [blink]ما قلت لكم مقرود [/blink]) المهم وسيده للبيت ويدخل على أمه ويقول له أنا ما أبي الغداء ولا أحد يقومني من النوم وراح للملحق تعرفون الملحق هذا ضروري في حياة العزابي ( المكان الوحيد الذي يستطيع التنفس فيه ) وشوي اللي الجوال يدق من زود الخمه قال وعليكم السلام ( [blink]طيب انتظر شف من دق عليك [/blink]) بس مقرود المهم ويسمع ذاك الصوت اللي قام ينتفظ من زينه ( [blink]خلونا نشوف وش دار من حوار بينهم[/blink] ) :-
البنت : آلو رامي
المقرود : لا الله يسلمك وسيم ( على باله زين اصلاً هو شين بس ماسك سيم علشان يقولون ولد وسيم )
البنت : لا اجل غلطانه .. مع السلامه
المقرود : لا يا بنت الناس بس انخميت في الصوت
البنت : كيف الحال
المقرود : والله تمام والحمد لله توني طالع من الشغل ( نصاب ) [overline]مطرود من المدرسة الابتدائية طاق مشرف المقصف المدرسي بعلبة شطه كرستال حجم عائلي [/overline]
البنت : عرفتني
المقرود : لا والله بس عادي أنا دائماً يجيني مكالمات ( [blink]عمره محد سأل عنه [/blink]) [overline]حتى امه اذا بغته ارسلت له الشغاله [/overline]
البنت : أنا اللي عند المدرسة اليوم
المقرود : إيه الله حيها آمري ( يمون ولد اللذينا )
البنت : انت اللي عطيتني الرقم
المقرود : ايه صح ذكرت ( من كثر الأشغال ياحبك للنصب )
البنت : هاه وش عندك وش تبي ومن معي
المقرود : تبغين الصدق ابي اكون زيي الناس اللي يسولفون عن صديقاتهم .
البنت : طيب وش المطلوب
المقرود : ابد سلامتك انا انسان قصدي شريف بس ابي اكون زي العالم اقول قصائد وكلام حلو
البنت: عادي وش فيها
المقرود : يا سلام ياخي انتي بنت ديمقراطية ( لو تسئلة عن الديمقراطية ) على طول قالك ( جمهورية اليمن الديمقراطية )
البنت : طيب ما بعد عرفت وش تبي
المقرود : ابيك تسولفين معي وتقولين لي وش عيوبي وكيف اصير رومنسي ومقبول عند البنات بس ( على باله عند الشباب مقبول ) [overline]اصلاً هو عند الشباب وضيفته يشب النار ويركب روس معسل [/overline]
البنت : عاااادي . اول شي هذي مو طريقة غزل انك ترمي الرقم فيه شي اسمه بلوتوث وشي اسمه ماسنجر
المقرود : اقولك ما اعرف الرومنسية وتقولين لي البلوتوث والماسنجر
البنت : اثرك نشبه البلوتوث هذا برنامج تقدر ترسل عليه لاي احد حتى لو ما تعرفه والماسنجر هذا برنامج محادثه فوريه
المقرود : ايه هذا عند ولد جيرانا اللي في الشارع الثاني ( يموت لو مايعرف وش عند الجيران )
البنت : عليك نور
المقرود : طيب وش الحاجه الثانية
البنت : ياخي لبسك يحوم الكبد في احد في الزمان هذا يلبس ثوب كاروهات . الناس الان يلبسون بناطيل ماركة جورج ارماني وتشيرتات ويحط على راسه كاب احمر
المقرود : [blink]وين يا عمي اشاره [/blink]
البنت : ما قلت لك انك نشبه
البنت : وبعدين تترزز قدام المدرسه في الشموس من بيعطيك وجه وانت قالب لونك اسود من الشمس هذا زمان عدا وراح
المقرود : طيب وين اروح
البنت : رح للشيطان
المقرود : وش تقولين
البنت : ابد .. ولا شي .. اسولف على نفسي
البنت : رح للفيصلية ولا المملكة ولا العقارية او احد المراكز التجارية المغلقة الجديدة
المقرود : بس ما اعرف احد يدخلني
البنت : يا عمي رايح انت لبيت جيرانكم ... هذا سوق( منفقعة مرارتها )
المقرود : طيب هذا مقدور عليه وغيره
البنت : خلك ثقيل وترى البنات ما يحبون الخفيف
المقرود : قسم بالله ان وزني بس [blink]60 [/blink]كم
البنت : تراك ذبحتين واين الله بلشني فيك .. تراني بس مسويه فيك خير .. ولا انت والله لو دهر ما تعلمت
المقرود : تحمليني على نياتي ( [blink]احسن كلمه قالها في المكالمة كلها[/blink] )
البنت : وحاول انك تاخذ من الكوفي شوب ( موكا ) واشرب بنعومه ولا تاغر علشان ما يجيك كرتون بكلات في وجهك
المقرود : موكا مو هذا الطالب السعودي اللي كان في استار اكاديمي اللي طلع علشان ما صوت لصديقه السعودي
البنت : قسم بالله لو ما تعقل لا ادخل عليك مع السلك واحوس مريرك هذا اسمه ( موخا مو موكا ) موكا هذا شراب ساخن ولا تدري [blink]خلك على سفن اب اصرف لك وارخص[/blink]
المقرود : احسن
البنت : هين بس
المقرود : وبعدين وش اسوي
البنت : افتح البلوتوث حق جوالك وسم اسمك زين ( [overline]يعني اسم له رنه في الاذن ويجذب البنات[/overline] )
المقرود : ينفع وائل علامة
البنت : لا ينفع هيفاء كفوري ( اخلص بس )
المقرود : طيب عرفت
البنت : بعدين سو بحث في البلوتوث للي فاتحين اجهزتهم وارسل رقمك راح تلاحظ اللي فاتحين اجهزتهم يجيهم نغمات
المقرود : وبلاش ولا بفلوس ( [blink]قهرني بسوالفه [/blink])
البنت : لااقساط
المقرود : طيب
البنت : خلصنا .. راح تلقى اللي استقبلو رقمك يكلمونك
المقرود : طيب انتي اتعبتي نفسك معي وانا ابي اتعرف عليك
البنت : هذا وانا في اول المشور معك طلعت ريحتي اجل لو عرفتك وش بيصير فيني
المقرود : قسم بالله العظيم ما يجي كل شي الا على خاطرك بشتري مجلات قصائد واقرا لك
البنت : من زين ذا الصوت علشان اتسمع فيك
المقرود : طيب هذا اخر كلام
البنت : والله ما اقدر ازيد عليه .. وفرصه سعيدة
المقرود : ماشاء الله عليك ياخي انتي جرئيه اسمك ( [blink]فرصه سعيدة[/blink] )
البنت : اقول وراء ما تتكل على الله وتفارق
المقرود : والله لو اني داري كان ما قلت اسمك وش فيك زعلتي اسمك حلو مره
البنت : الله يخليك بس لا تعلم فيه احد
المقرود : قسم بالله ما اعلم به احد وبكتبه في ورقه [blink]واحطه تحت الموكيت ( حريص الولد )[/blink]
البنت : شاطر يا .. وش اسمك ؟
المقرود : سامي
البنت : توك تقول وسيم والحين سامي
المقرود : لا هذا اسمي في البلوتوث
البنت : كويس بديت تفهم
المقرود : طيب متى اسمع صوتك ثاني مره ولا اكلمك على البلوتوث
البنت : لا .. كلمني على البلوتوث
المقرود : خلاص انا في الليل بعد ما اجيب خبز تميس لاهلي بكلمك
البنت : ماشاء الله عليك خدوم
المقرود : ايه ابوي دايم يمدحني قدام الناس
البنت : حولك وحوليك من العين
المقرود : ايه انا فطين
البنت : بس لا توصخ ملابسك
المقرود : لا مو كذا يعني انا ذكي وذهين
البنت : الله يسلم بس
المقرود : يعني انا اقدر دائم اذا صار ( ما خلى ضمير مستتر ما استخدمه ) فيني ضيقة صدر وتكه ( [blink]التكه تعني الغلقه والغلقه تعني شي ثقيل يطبق على الصدر[/blink] ) اكلمك ووسع صدري .
البنت : اذا جاك هذا اللي تقوله رح لمطوع يقرأ عليك .
المقرود : لا انا اعرف اقرأ حتى تصدقين ما اخلي موضوع في مجلة الشبل ما قريته .
البنت : وين اوديك .. اهبل انت .. اقولك يقرأ عليك يعني يقرأ بعض آيات القرأن الكريم علشان تروح منك الضيقه .
المقرود : وليه ( [blink]وهنا بدأت حدة التوتر [/blink]) قالو لك مجنون .. احترمي نفسك .. تراني اعجبك رهيب راعية فزعات .
البنت : طيب .. طيب انتبه لا يطق فيك عرق وابلاش فيك
المقرود : اقول .. لا يكثر هرجك بس .. اصلاً الشرهة مو عليك .. الشرهه علي يوم اني عطيتك وجه وضيعت وقتي معك ( وش من وقت عندك ... اصلاً الفراغ متوذي منك )
البنت : اشوفك قلبت علي .. توك من ساعه .. باط كبدي بغباك .. والحين مسوى نفسك علي عنتر .
المقرود : لا لا لا .. ولا تدرين .. يالله مع السلامه
البنت : في اللي ما يردك
المقرود : تدعين علي بعد .. ( [blink]اخذته العزة بالاثم[/blink] ) يا رب يارب انشاء الله يجيك عريس شايب واول ليله يموت علشان تصيرين ارمله ( [blink]والله فاهم الولد [/blink]) وما تستانسين في زواجك
البنت : لا لا حرام عليك وش سويت فيك
المقرود : بس علشان تعرفين اني اعرف ادعي عليك
البنت : لا خلاص صافي يا لبن
المقرود : خبز بالطحينيه ( [blink]جاب عاليها واطيها [/blink])
البنت : مع السلامه
المقرود : الله يسلم
البنت : عرفت الان كيف تبدأ حياتك من جديد .
المقرود : افا عليك .. اذا ضيعت بدق عليك ..
البنت : لا ..
المقرود : طيب
وهنا بدأ الولد في الخوض في غمار الغزل .. وتعرف على العديد من البنات الذين اصبحن فيما بعد يراجعن مستشفى الامراض النفسيه من هول ما اصابهن من مرض قهري جراء غبى صاحبنا المقرود .
والقادم اجمل بتواصلكم
حقوقي بتكون محفوظه وما نبغى لطش تراني بدري عن اللي لطش قصة مقرودي
رد مع اقتباس
![الصورة الرمزية ][ عبدالعزيز ][](image.php?u=78171&dateline=1208124844 "الصورة الرمزية ][ عبدالعزيز ][")
