[poem=font="Simplified Arabic,6,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
يا فــؤادي لاوصل علم القوي شد الضلوع = اقضب اوساط المحاني بالصبر تفرج مصيبه
اجلد بصدري يا قـلـبـي لا تجي طفقٍ جـزوع = خفقتك لا لا تراعد لا عوا للهم ذيبه
لا تعدى لا توايق لا تدور لك فزوع = ازبن طويق الحنايا بندق همومك صويبه
انتظر صبحٍ دروبه ما تجي وادي الدموع = المساري في غــداري الروح تجعلها عطيبه
كيف / ليش / وليت / لو / ياعل / ماتبري وجوع = والتمني درب ضيق ما وصل ديره رحيبه
من ينام السبت وفكره ينتظر صبح الربوع = تثقل الساعة ويعيش اليوم ... لحظاتٍ عصيبه
لايهمك يافؤادي لوتجي همومك جموع = دامك معلق بعقلٍ قدوة عقولٍ لبيبه
والمواقف نعمة الله والمآسي اللي تروع = تظهر العزوة من الخزوه نتايجها رهيبه
في المصالح عونك اللي لا امرته جاك طوع = ولا انتهى فرعون يطعن بالظهر نمه وغيبه
مثل من صلى لحاجه بعدها كب الركوع = أيتمسكن لا تمكن اختلف طبعه و طيبه
الدني مهما تطبع تكشف الحاجة طبوع = للجيف ينزل من اعلا ماخشا شيٍ يعيبه
ذا الزمن حب المظاهر والتفاخر والطلوع = كم رجل ذب المبادي من اجل شيٍ يجيبه
شد لي اقطع لك شويه اصبحت تاج الطموع = لو بكيفه كل نصيب الغير مع صافي نصيبه
لا كلا غمض عيونه كنه القط الدنوع = نفسي نفسي لا كلا ضرسٍ علا ينسى صحيبه
يجمع المال ويصره ماهو من فقرٍ وجوع = حب لدنيا مايسمح لو صبغ شعره مشيبه
عنده رياله تجي اصعب ظهرته من حب كوع = كنها الروح اللي تظهر ياعسى ماله النهيبه
ناس مثل الشمعدان وناس تشبه للشموع = ذا برود إحساس وهذا واقد إحساسه لهيبه
وياشقا اللي في هواء روحه يجي دايم تبوع = ان ركض ولا وقف يلهث و روحه مستصيبه
والسعيد اللي عفيف الروح بالدنيا قنوع = مرجهن قلبه بربه الأمل مافيه ريبه[/poem]